Naragsakkayo Koma nga Agtrabaho
1 Kinuna ni Jesus a bayat ti kaaddana, kaaduan ti ‘di mangikankano,’ kas idi kaaldawan ni Noe. (Mat. 24:37-39) Manamnama ngarud nga adu ti di mangipangag iti naimbag a damag ti Pagarian. Ania ti makatulong tapno mataginayontayo ti rag-o bayat nga itungtungpaltayo ti ministeriotayo?—Sal. 100:2.
2 Umuna, laglagipentay koma a naggapu iti Dios agpadpada ti mensahe ken ti rebbengentayo a mangasaba. No dida man ipangag ti mensahe iti laksid nga inkabiltayo ti amin a kabaelantayo, ni Jehova ti talaga a linaksidda. Mataginayontayo ti rag-o ken makin-uneg a ragsak kas managtungpal iti sao ti Dios no silalagiptayo a maragragsakan ni Jehova gapu ta matalektayo a mangaskasaba.—San. 1:25.
3 Maikadua, adda pay dagidiay madadaan nga umawat iti panangisalakan nga ididiaya ni Jehova. Nupay mabalin a di mangikankano ti kaaduan, adda pay dagiti arig karnero a tattao a nasken a maurnong uray ita, sakbay unay ti panungpalan. Masapul nga itultuloytayo ti mangasaba, a mapantayo “iti aniaman a siudad wenno purok” tapno ‘biroken no asino iti dayta ti maikari.’—Mat. 10:11-13.
4 Taginayonen ti Positibo a Kababalin: Adda dagidiay nadismaya gapu iti nagdakes a rekord ti palso a relihion. Dadduma ti ‘linalatan ken winarawara’ ti agdama a sistema ti bambanag. (Mat. 9:36) Nalabit adu ti aburido gapu iti kinaawan ti panggedan, mangsaluad iti salun-at, ken kinatalged. No matarusantayo daytoy, makapagtalinaedtayo iti trabahotayo. Ikagumaantay ti mangirugi iti saritaan maipapan kadagiti isyu nga ad-adda a pakaseknan dagiti tattao iti teritoriatayo. Tulonganyo ida a mangbigbig a ti Pagarian ti Dios ti kakaisuna a solusion. Usarenyo ti Kasuratan ken dagiti espesipiko a punto kadagiti publikasion tapno dumanon iti pusoda ti naimbag a damag.—Heb. 4:12.
5 Dagiti naragsak a managtungpal iti sao ti Dios silalagipda iti daytoy: “Ti rag-o ni Jehova isu ti pigsayo.” (Neh. 8:10) Awan ti rason a mapukaw ti rag-otayo. “No ti balay maikari, ti koma talna a tarigagayanyo iti dayta dumteng iti dayta; ngem no di maikari, ti koma talna manipud kadakayo agsubli kadakayo.” (Mat. 10:13) Pabaruen ni Jehova ti rag-o ken pigsatayo bayat nga aganustayo iti sagrado a panagserbi kenkuana, ket iti kasta bendisionanna ti kinamatalektayo.