No Kasano a Guyugoyen Dagiti Dadduma
1 Agdindinamag ni apostol Pablo kas makaguyugoy a ministro. (Ara. 19:26) Uray ni Ari Agripa kinunana kenkuana: “Iti bassit a tiempo maguyugoynak nga agbalin a Kristiano.” (Ara. 26:28) Ania ti namagbalin iti ministerio ni Pablo a makaguyugoy unay? Iti lohikal a pamay-an, nakirinnason babaen ti Kasuratan, nga imbagayna dagiti argumentona kadagiti dumdumngeg kenkuana.—Ara. 28:23.
2 Iti ministeriotayo, nasken met a makaguyugoytayo kas panangtulad ken Pablo. Kasano? Babaen ti kaadda ti nauneg a pannakaawat no makisasao ken dumdumngegtayo kadagiti dadduma. (Prov. 16:23) Adda tallo a napapateg nga addang a tumulong kadatayo a mangaramid iti daytoy.
3 Dumngegkayo a Naimbag: Bayat nga agsasao daydiay tao a kasarsaritayo, agimdengkayo ket siputanyo ti aniaman a punto a mabalinyo a pagtunosan. No supiatenna ti maysa a banag, ikagumaanyo a tarusan ti rasonna. Makatulong ti panangammo no ania a talaga ti patpatienna, apay a patienna, ken ania ti nakakombinsiranna iti dayta. (Prov. 18:13) Sitataktika nga ammuenyo dayta kenkuana.
4 Agsaludsodkayo: No mamati ti maysa a tao iti Trinidad, mabalinyo nga isaludsod: “Nabayag kadin a patpatienyo ti Trinidad?” Sayo ipasarunson: “Inadalyo kadin a nalaing no ania ti kuna ti Biblia maipapan iti dayta?” Mabalinyo met nga isaludsod: “No ti Dios ket paset ti Trinidad, saan aya a namnamaentayo a nalawag koma a kasta ti ibagbaga ti Biblia?” Dagiti sungbat a mangngeganyo tulongannakayo a makirinnason kenkuana maipapan iti ibagbaga ti Kasuratan.
5 Makirinnasonkayo a Siuumiso: Insaludsod ti maysa a Saksi iti maysa a babai a mamati a ni Jesus ket Dios: ‘No padasem nga iyilustrar nga agpada ti dua a persona, ania a relasion iti pamilia ti mabalin nga usarem?’ Insungbat ti babai: “Mabalin nga usarek ti agkabsat.” Innayon ti Saksi: “Nalabit uray ti agkalkalanga a singin. Ngem, ania ti isursuro ni Jesus no ibagana a ti Dios isu ti Ama ket isu (ni Jesus) ti Anak?” Natarusan ti babai ti punto a ti maysa ket natataengan ken dakdakkel ti autoridadna. (Mat. 20:23; Juan 14:28; 20:17) Nadanon ti panunot ken pusona babaen ti arte ti panangguyugoy.
6 Siempre, saan nga amin ket sidadaan nga umawat iti kinapudno, uray no lohikal ken umiso ti panangilawlawagtayo. Ngem kas ken Pablo, naaneptayo koma a mangsapul kadagiti nasingpet panagpuspusona iti teritoriatayo, a guyugoyentay ida a mangawat iti mensahe ti Pagarian.—Ara. 19:8.