Makaguyugoy Koma ti Panangisuroyo

1. Ania ti ramanen ti epektibo a panangusar iti Sao ti Dios iti ministerio?

¹ Dagiti epektibo a ministro a kas ken apostol Pablo, bigbigenda a ti ‘panangaramat a siuumiso iti sao ti kinapudno’ ket saan la a basta panagadaw iti Nasantuan a Kasuratan. (2 Tim. 2:15) No usarentayo ti Sao ti Dios, kasano nga agbalin a ‘makaguyugoy’ ti panangisurotayo?—Ara. 28:23.

2. Kasanotayo a maparayray ti panangapresiar dagiti tattao iti Sao ti Dios?

² Ibasayo ti Sao ti Dios: Umuna, iturongtayo iti Biblia ti atension dagiti dumdumngeg tapno maapresiarda ti nadiosan a sirib a linaon daytoy. No kombinsidotayo iti ibasbasatayo a teksto, mabalin a matignay dagiti tattao a dumngeg a naimbag. (Heb. 4:12) Mabalintayo nga ibaga: “Nakitak a makagunggona no ikabilangantayo ti panangmatmat ti Dios maipapan iti daytoy a banag. Imutektekanyo no ania ti kuna ti Biblia.” No posible, direkta nga ibasatayo ti Sao ti Dios.

3. Kalpasan ti pannakaibasa ti maysa a teksto, ania ti aramidentayo tapno matarusan dagiti dumdumngeg ti kaipapananna?

³ Maikadua, ilawlawagtayo dagiti naibasa a teksto. Adu a tattao ti marigatan a mangtarus iti teksto iti damo a pannakaibasa dayta. Masapul ngarud nga ilawlawagtayo tapno maawatanda no apay a napateg dayta. (Luc. 24:26, 27) Itampoktayo dagiti kangrunaan a sasao. Makatulong no agsaludsodtayo tapno maammuantayo no naawatanda met laeng a naimbag ti punto.—Prov. 20:5; Ara. 8:30.

4. Ania ti maudi nga addang tapno agbalin a makaguyugoy ti panangisurotayo?

⁴ Makirinnason Babaen ti Kasuratan: Maikatlo, ikagumaantayo a danonen ti isip ken puso ti bumalay. Tulongantayo a mangilasin no kasano nga agaplikar kenkuana ti teksto. No usarentayo ti Kasuratan a makirinnason mabalin a maguyugoy ti maysa a tao a mangbalbaliw iti kapanunotanna. (Ara. 17:2-4; 19:8) Kas pagarigan, kalpasan a maibasa ti Salmo 83:18 mabalin nga ilawlawagtayo a napateg nga ammuen ti nagan ti maysa a tao tapno makasinningedtayo. Kalpasanna, mabalin nga iyimtuodtayo, “Iti panagkunayo, sumayaat ngata ti kararagyo no ammoyo ti nagan ti Dios?” No ibagaytayo ti teksto iti personal a biag ti bumalay maipakitatayo ti praktikal a kinapateg dayta. Ti makaguyugoy a panangisuro iti Sao ti Dios iyadanina dagiti napudno ti panagpuspusona a tattao nga agdayaw iti pudpudno ken sibibiag a Dios a ni Jehova.—Jer. 10:10.