Padayawantay Amin ni Jehova ken ti Anakna
No Kasano a Naan-anay a Magunggonaan ti Amin a Tumabuno iti Memorial Inton Abril 8
1 Siasino ita ti maipapaayan iti naisangsangayan a pammadayaw? Dagidiay matmatan ti lubong a dakkel ti nagapuananda. Ngem iti kaaduan a kasasaad, malipatanto met laeng dagita a nagapuananda. Komusta met ngay dagiti gapuanan a pudpudno a pakagunggonaan ti intero a sangatauan? Ti kangrunaan kadagitoy ti tingitingentayo inton rambakantayo ti Pangrabii ti Apo kalpasan ti ilelennek ti init inton Abril 8, 2001.
2 Siasino ti maikari iti kangrunaan a dayaw? Sumungbat ti Biblia: “Maikarika, Jehova, . . . nga umawat iti dayag ken iti dayaw ken iti pannakabalin, agsipud ta pinarsuam dagiti isuamin a bambanag.” (Apo. 4:11) Kas Namarsua, ni Jehova ti Soberano nga Agturay iti uniberso. Talaga nga agnanayon a maikari iti pammadayaw!—1 Tim. 1:17.
3 Ti Anak ti Dios a ni Jesu-Kristo, nangaramid kadagiti makagunggona a bambanag a mangipaay kadagiti awan patinggana a bendision iti sangatauan. Naan-anay a tinuladna ti Amana. (Juan 5:19) Ti naan-anay a panagtulnog ken matalek a panagserbina ti namagbalin kenkuana a “maikari nga umawat iti pannakabalin ken kinabaknang ken sirib ken bileg ken dayaw ken dayag ken bendision.” (Apo. 5:12) Pinadayawan ni Amana babaen ti panangisaadna kenkuana kas Ari. (Sal. 2:6-8) No kadatayo, gundawaytay ti mangidayaw iti Ama ken iti Anak bayat a rambakantayo ti Pangrabii ti Apo inton Abril 8, 2001.
4 Makapaladingit ta iti pakasaritaan ti tao, manmano ti nangipaay iti pammadayaw a maikari ken Jehova ken iti Anakna. Addada pay panawen idi nga uray dagiti Israelita, ti nagkauna nga ili ti Dios, nangipaayda iti parparawpaw a panagserbi ken Jehova. Agdadata a kinaawan panagraem daytoy. (Mal. 1:6) Ti umiso a panagraem kalikagumanna ti matalek a panagtulnog gapu iti ayat ken panangipateg iti amin nga inaramid ni Jehova ken ti Anakna para kadatayo. Tapno maipaaytayo ti kasta a pammadayaw ken panagraem, masapul nga adda panagbuteng ken panagraemtayo iti Dios, nga ikabilangantayo ni Jehova ken ni Jesus iti amin nga aramidentayo. Ikagumaan ti kongregasion Kristiano nga isuro ken tulongan ti dadduma a mangaramid met iti kasta.
5 Naisangsangayan nga Okasion a Maipakita ti Pammadayaw: Ti panangrambak iti Memorial ti kapatgan a panagtataripnong ti ili ni Jehova iti kada tawen. Nasken a tumabuno ti amin nga agtarigagay nga agserbi ken mangidayaw ken Jehova. (Luc. 22:19) Malaksid iti 6 a milion nga aktibo a Saksi, namnamaentayo nga adu ti umay nga interesado a tattao a mamagbalin iti bilang dagiti tumabuno a nasursurok ngem 14 milion. Anian a nagsayaat a gundaway tapno padayawantay ti nailangitan nga Amatayo! Nupay ni Jesus ti pakaisentruan ti rambak, ti pammadayaw ken panagraem kadagiti nagapuananna ket pakaitan-okan ti Ama, a nangibaon kenkuana.—Juan 5:23.
6 Kasanotay a masuportaran daytoy naisangsangayan nga okasion? Matulongantayo a magunggonaan a naan-anay dagiti interesado a tattao. Awisenyo ida a tumabuno, ket no kasapulan, siaayat a kuyogenyo ida. Ilawlawagyo ti panggep ti palawag. Iyam-ammoyo ida kadagiti kakabsat. Mabalin a dagiti makita ken mangngegda ti manggutugot kadakuada a makikaykaysa kadatayo a mangidayaw ken Jehova.
7 Diyo tagibassiten ti maaramidan ti programa. Kastoy ti kinuna ti maysa nga estudiante iti unibersidad: “Adun a daras a nakiramanak iti Komunion iti simbaanmi, ngem naidumduma daytoy. Makitak a kastoy a talaga ti imbilin ti Biblia, ket iti panagkunak ti relihionyo ti pudno.” Rinugianna ti makigimong a regular ket di nagbayag nabautisaran.
8 Tulonganyo a Rumang-ay Dagiti Kabbaro: Am-ammuenyo dagiti kabbaro a tumabuno iti Memorial, ket dagus a sarungkaranyo ida tapno mairepasoyo kadakuada dagiti makaliwliwa a bambanag a naadal ken napaliiwda. Iyam-ammoyo kadakuada ti dadduma pay a gimong, a pakagun-odanda iti kanayonan a pannakaammo iti Biblia. Ti panangrepaso iti kapitulo 17 ti libro a Pannakaammo, “Masarakanyo ti Kinatalged iti Ili ti Dios,” ipakitana kadakuada ti nakaad-adu a naespirituan a probision a nalakada a magun-od iti kongregasion. Ipabuyayo kadakuada ti baro a video nga Our Whole Association of Brothers tapno maimatanganda a mismo ti panagkaykaysa, kinaragsak, ken kinaregta ti ili ni Jehova!
9 Napateg a masursuro dagiti interesado no kasanoda a maipakita ti pammadayaw ken panagraem ken ni Jehova. Ilawlawagyo a makaay-ayo ken Jehova ti naimpusuan a panagkararag ken gubuayan dayta ti agtultuloy a naespirituan a pannakabang-ar. (1 Juan 5:14) Babaen ti leksion 8 aginggat’ 12 iti broshur a Kalikaguman, ilawlawagyo dagiti kondukta a pakaidayawan ni Jehova. No salaysayenyo ti linaon ti baro a broshur a Jehovah’s Witnesses, iti panid 30-1, paregtaenyo dagiti kabbaro a mabalinda met a padayawan ni Jehova babaen ti pannakiramanda a mismo iti trabaho a panangasaba.
10 Pakaidayawan ti Ama ken pakabendisionan dagiti dadduma no ipategtayo ti daton ni Jesus ken ti pribilehiotayo nga agserbi kas adalanna. Inkari ni Jesus: “No ti asinoman agserbi kaniak, isu padayawanto ti Ama.”—Juan 12:26.