Parang-ayenyo ti Pannakaawatyo

¹ Daytoy nariribuk a maudi nga al-aldaw a pagbibiagantayo ket nangyeg iti adu a kita ti dumegdegdeg a pakarigatan ken nakaro a pannubok kadagiti adipen ti Dios iti sadinoman. (2 Tim. 3:1-5) Kasapulantay amin ti pammaregta tapno makapagtakdertayo a natibker iti pammati. (1 Cor. 16:13) Maaramidantayo dayta iti tulong ni Jehova bayat nga itultuloytayo ti regular a panagadal iti Saona, agpannuray iti espirituna, ken agtalinaed a nadekket iti organisasionna.—Sal. 37:28; Roma 8:38, 39; Apoc. 2:10.

² Adda naimbag a rason a nailawlawag ti tema nga “Agmataengan a Naan-anay iti Pannakaawat” iti programa ti aldaw ti espesial nga asamblea idi napalabas a tawen. Naibatay dayta iti 1 Corinto 14:20, a pakabasaantayo kadagitoy a sasao ni apostol Pablo: “Dikay agbalin nga ubbing no kadagiti pannakabalin iti pannakaawat, no di ket agbalinkayo a maladaga no iti kinadakes; ngem agbalinkayo a nataenganen kadagiti pannakabalin ti pannakaawat.” Ania ti makunayo iti programa?

³ “Anian a makaparegta!” “Dayta ti apag-isu a kasapulanmi!” Dagita ti dua laeng kadagiti sungbat. Uray ti maysa a saan a Saksi nga immay iti aldaw ti espesial nga asamblea tapno imatanganna ti bautismo ti dose anyos a balasitangna ti nagkuna a nagustuanna unay ti programa ken nakitana a makagunggona unay daytoy iti pamiliana. Kasta met kadi ti panagriknayo? Lagipentayo ti sumagmamano a tampok ti programa.

⁴ Nasken ti Umiso a Pannakaammo Tapno Maparang-ay ti Pannakaawat: Iti panglukat a palawag a, “Parang-ayenyo Itan ti Pannakaawatyo,” ania ti impaganetget ti ispiker a kasapulan tapno mapagballigian dagiti pakarigatan ita? Saan laeng a laing ti kasapulantayo. Masapul a maparang-ay ken mapauneg ti pannakaawattayo iti Biblia, tapno saantayo a maparukma kadagiti amin a kinadakes iti aglawlawtayo. Masapultayo ti panangiturong ti Dios tapno maaddaantayo iti kasta a pannakaawat. Kas iti salmista, masapul a nainkararagan a kiddawentay ti tulong ni Jehova tapno matarusantayo dagiti linteg ken pammalagipna. Iti kasta, naimpusuan a makapagserbitayo kenkuana.—Sal. 119:1, 2, 34.

⁵ Iti simmaganad a paset, inlawlawag ti manangaywan iti sirkito nga ipapaayannatayo ni Jehova kadagiti “Tulong Tapno Agmataengantayo iti Pannakaawat iti Biblia,” babaen ti Sao ken organisasionna. Nadepinar ti pannakaawat kas “ti abilidad a makita ti maysa a banag ken mangtarus iti pakabuklanna babaen ti panangtarus kadagiti nakainaigan dagiti paset iti pakabuklan, iti kasta, maawatan ti kababagas dayta.” Siasino ti makatulong kadatayo a maaddaan iti kasta nga abilidad? Nangipaay ni Jehova iti sagut a lallaki a tumulong kadatayo a rumang-ay iti naespirituan. (Efe. 4:11, 12) Idagadag kadatayo ti naindagaan nga organisasionna nga inaldaw a basaentayo ti Sao ti Dios ken regular a tumabuno kadagiti amin a gimong ti kongregasion. (Sal. 1:2) Naisuro kadatayo no kasano nga usaren ti Biblia ken dagiti Nakristianuan a publikasiontayo iti personal ken sangapamiliaan a panagadal kasta met iti panagsagana para kadagiti gimong ken iti tay-ak ti serbisio. Ap-aprobetsarenyo kadi amin dagitoy nga urnos? Adda kadi regular ken personal a programayo nga agbasa iti Biblia? Nasken daytoy tapno masalaknibantayo kadagiti nailubongan a pagannayasan, estilo, pilosopia, ken mangallilaw nga impluensia.—Col. 2:6-8.

⁶ Masapul a Masanay ti Pannakaawattayo: Iti umuna a palawagna a napauluan “Saluadan ti Espiritualidad Babaen ti Panangsanay iti Pannakaawatyo,” inlawlawag ti bisita nga ispiker a dagiti tattao iti lubong dida mapaggidiat ti naimbag ken dakes. (Isa. 5:20, 21) Pagkedkedanda ngamin a bigbigen ken suroten dagiti nalinteg a pagalagadan ti Dios. Maisungani iti dayta, datayo a nakaawat iti naespirituan a pannakasanay iti organisasion ni Jehova bigbigentayo dagiti pagalagadan ti Dios, nga agserbi a giya kadagiti aramid ken kababalintayo. Gapuna, nakabalantayo a mangaramid iti naimbag ken makaay-ayo iti imatang ni Jehova ken no ania ti maitunos iti perpekto a pagayatanna.—Roma 12:2.

⁷ Tapno maliklikantayo ti nariribuk a panagpampanunot ti lubong ken dagiti dakes nga ibungana, masapul nga itultuloytayo a sanayen ti pannakaawattayo. Kasano a maaramid daytoy? Kas nairekord iti Hebreo 5:12-14, impaganetget ni apostol Pablo a kasapulan ti pannangan saan laeng nga iti “gatas” ti sao. Masapultayo ti nakired a naespirituan a taraon, kas iti maaw-awattayo iti panangadal iti padto ni Isaias iti Panagadal iti Libro ti Kongregasion. Kalpasanna, masapul a sidadaantayo a mangyaplikar iti maad-adaltayo. No aramidentayo dayta, mapaneknekantayo ti kinaumiso dagiti prinsipio ken pagalagadan ni Jehova. Daytoy ti mangsanay iti pannakaawattayo tapno nalawag a mabigbigtayo ti naimbag ken dakes.

⁸ Makapaladingit ta dadduma ti kimmapuy iti naespirituan. Apay? Dida impamaysa ti panunotda kadagiti matmatan ni Jehova a naimbag ken nalinteg. Kas resultana, naguyugoyda kadagiti saritaan iti radio ken telebision a maikontra iti Kasuratan ti linaonna, dakes a musika, wenno mangirubo a computer chat room. Babaen ti nainsiriban a panagtignay, maliklikantayo ti maimpluensiaan kadagiti imoral, maag, wenno dakes a tattao.—Prov. 13:20; Gal. 5:7; 1 Tim. 6:20, 21.

⁹ Dagiti Agtutubo Masapul nga ‘Agbalin a Maladaga no iti Kinadakes’: Adda dua a paset ti programa a nangnangruna a nangparegta kadagiti agtutubo tapno maparang-ayda ti pannakaawatda. Inlawlawag ti ispiker a ti panagbalin a “maladaga iti kinadakes” kaipapananna ti panagtalinaed nga awan kapadasanna, kayatna a sawen, inosente kas maladaga, no maipapan kadagiti banag a narugit iti imatang ti Dios. (1 Cor. 14:20) Naiparegta kadatayo amin nga itultuloytayo nga aluadan ti panangusar iti tiempotayo tapno ditayo maisarang iti amin a kita ti kinadakes ket maliklikantayo ti maimpluensiaan kadagitoy. (Efe. 5:15-17) Naiparegta nga kuentaentayo no mano nga oras ti busbusbosentayo iti panagbasa kadagiti material a saan a direkta a makatulong iti panagrang-ay ti pannakaawattayo kadagiti naespirituan a banag. Inaramidyo kadi dayta? Ania ti ipakita ti nasukimatyo? Malaksid iti inaldaw a panagbasa iti Biblia, determinadokayo koma a mangitultuloy iti panagbasa kadagiti publikasion nga ipapaay ti organisasion. Ti panangaramid iti dayta ti tumulong kadatayo amin, agraman dagiti agtutubo, a ‘gumun-od iti pannakaawat.’​—Prov. 4:7-9.

¹⁰ “Gunggona ti Panangyaplikar Kadagiti Prinsipio ti Biblia a Nabuyogan iti Pannakaawat”: Daytoy ti tema ti pangserra a palawag iti programa ti aldaw ti espesial nga asamblea. Inlawlawag ti bisita nga ispiker a ni Jehova ti Gubuayan ti mangted-biag a pannakaawat, a natantan-ok nga amang ngem iti pannakaawat dagiti tattao. Panunotenyo laengen ti maaddaan iti gundaway a makasursuro manipud iti pannakaawat ni Jehova! Sipaparabur nga ipaayna dayta kadagidiay sipapasnek a mangsapul ken mangkiddaw iti dayta. (Prov. 2:3-5, 9; 28:5) Naan-anay kadi nga ap-aprobetsarenyo ti ipapaayna?

¹¹ Naiparegta a sursuruentayo nga ilasin dagiti prinsipio bayat a basaentayo ti Biblia. (2 Tim. 3:16, 17) Adalenyo a naimbag dagita tapno maaddaankayo iti umiso a pannakaawat iti ibagbaga ni Jehova. Mennamennaenyo dagita a prinsipio ken itukityo iti panunot ken pusoyo. Daytoy ti mangsanay iti pannakaawatyo tapno makapagballigikayo no mangaramidkayo iti dadakkel a desision. (Jos. 1:8) Usigentayo ti sumagmamano a kasasaad ti adu a kakabsat ket kitaentayo no kasano a matulongannatayo nga agballigi babaen ti panangyaplikar kadagiti prinsipio ti Biblia.

¹² ‘Rumbeng kadi a tuladek ti maysa nga estilo ti panagkawkawes ken panaglanglanga?’ Masansan a mangyanninaw iti espiritu ti iyaalsa ti pagannayasan ti lubong a maaddaan iti modelo nga estilo ti kawes ken panaglanglanga. Ti kasta nga espiritu ti mangimpluensia kadagiti tattao nga agkawes a di nanakman ken di makaay-ayo wenno makagargari. Ania dagiti napateg a prinsipio iti Biblia a tumulong kadatayo a mangsaranget kadagita a pagannayasan? No nasanay ti pannakaawattayo, ipangagtayo ti prinsipio iti 1 Timoteo 2:9, 10, nga agkawes “buyogen ti kinaemma ken kinasimbeng ti panunot . . . , iti wagas a maitutop [kadagiti tattao] nga agkunkuna nga agraemda unay iti Dios.” Dadduma pay a maitutop a prinsipio ket pakaibilangan dagiti nadakamat iti 2 Corinto 6:3 ken Colosas 3:18, 20.

¹³ ‘Ania ti maaramidak tapno mataginayonko ti nabileg a singgalut ti pamiliak?’ Napateg ti nasayaat a komunikasion dagiti miembro ti pamilia. Kunaen kadatayo ti Santiago 1:19: “Tunggal tao masapul a nasiglat no iti panagdengngeg, nainayad no iti panagsao, nabannayat no iti panagpungtot.” Dumngeg ken agsasarita koma dagiti miembro ti pamilia tapno adda komunikasionda. Uray no husto ti ibagatayo, no nauyong, natangsit, wenno di nataktika ti pannakaibagana, ad-adda a makapasakit imbes a makatulong. Gapuna, maysatayo man nga asawa, nagannak wenno anak, ti panagsaotayo “kankanayon koma a mabuyogan iti kinaparabur, natemplaan iti asin.”​—Col. 4:6.

¹⁴ ‘Naapektaranak kadi iti materialismo?’ Ti materialismo ket nailubongan nga impluensia a mamagrikut iti biag ti maysa a tao. Dina maipaay ti pudno a kinaragsak. (Ecl. 5:10; Luc. 12:15; 1 Tim. 6:9, 10) Tapno maliklikantayo ti silo ti materialismo, insuro kadatayo ni Jesus daytoy a napateg a prinsipio: Taginayonen ti simple a panagbiag. Ti balanse, di narikut a panagbiag ket mangkalikagum iti panangipamaysa iti pampanunottayo kadagiti interes ti Pagarian, nga aramiden a maikadua ti aniaman a banag.—Mat. 6:22, 23, 33.

¹⁵ No Ania Koma ti Panggeptayo: Iti sao ti Dios, addaantayo iti mapagtalkan a gubuayan dagiti nalinteg a prinsipio a mangibagnos kadatayo no agdesisiontayo. Nasken nga adalentayo dagitoy a prinsipio, mennamennaen, ken tarusantayo no kasano a mayaplikartayo dagitoy. Babaen ngarud ti ‘panangsanay iti pannakaawattayo a mangilasin iti naimbag ken dakes,’ magunggonaantayo ket maidayawtayo ni Jehova.—Heb. 5:14.