Dagiti Bendision ti Panangapresiar iti Panagayat ni Jehova—Paset 2
1 Iti paset daytoy a topiko idi napalabas a bulan, intampoktayo ti uppat a pamay-an a maipakita iti ministerio ti apresasiontayo iti panagayat ni Jehova. (1 Juan 4:9-11) Ita inayontayo ti lima pay a pamay-an a mabendisionantayo no naan-anay a makiramantayo iti panangtulong iti sabsabali iti naespirituan.
2 Di Pormal a Panangasaba: Epektibo daytoy a pamay-an a mangbirok kadagiti mabisbisinan ken mawaw iti kinalinteg ken mangipaima kadakuada iti makatulong a literatura. Napateg a ‘gatangentayo ti nainggundawayan a tiempo’ ket mangasaba iti amin a gundaway ken iti asinoman a masabettayo. (Efe. 5:16) Mabalin a kasapulan a maaddaantayo iti tured a mangasaba iti daytoy a pamay-an, ngem no apresiarentayo ti ayat ti Dios ken ti kasapulan dagiti tattao, mangasabatayo iti tunggal gundaway.—2 Tim. 1:7, 8.
3 Nabendisionan iti kasta unay ti maysa a misionero idi nakisarita iti padana a pasahero iti taksi. Naginteres ti lalaki. Nasarungkaran, ket nairugi ti panagadal iti Biblia. Inawat dayta a lalaki ti kinapudno ket rimmang-ay agingga a nagbalin a maysa a panglakayen ti kongregasion!
4 Panagsurat: Mabalin a ditay makakasaba iti binalaybalay maigapu iti pisikal a kasasaadtayo wenno dakes a panniempo. Mabalintayo ti agsurat, a mangasaba iti ababa babaen ti panagsurat kadagiti am-ammotayo, kadagiti natayan iti patpatgen, wenno kadagiti saan a nadanon iti pagtaenganda iti teritoria. Mabalin nga iragpintayo ti maysa kadagiti naintiempuan a tract a naglaon iti makapainteres a naibatay-Biblia a mensahe ken paregtaen ti suratam nga agsubalit no adda aniaman a saludsodna. Usarenyo ti addressyo wenno ti address ti Kingdom Hall, saan a ti address ti sanga nga opisina.
5 Panangasaba Babaen ti Telepono: Nasayaat daytoy a pamay-an a makasao dagiti tattao a saantayo a madandanon kadagiti balayda. No naannad, nadayaw, ken nataktika nga aramidentayo dayta, mabalin nga aginteresda. Ti Pebrero 2001 a Ti Ministeriotayo iti Pagarian, panid 5-6, mangipaay kadagiti epektibo a singasing no ania ti kasayaatan nga aramiden.
6 Idi nangasaba ti maysa a sister babaen ti telepono, dinamagna iti maysa a babai no napanunotnan a nalaing no ania a masakbayan ti agur-uray kenkuana ken iti pamiliana. Kinuna ti babai a napanunotna daytan. Kinunana a gapu ta naawanan iti namnama, insinana ti bagina iti pagtaenganda. Gapu ta natignay iti napudno a pannakaseknan ti kabsat, immanamong ti babai nga agkitada iti asideg a tiendaan. Kas resultana, situtulok nga inawat ti babai ti panagadal iti Biblia!
7 Panangabrasa Kadagiti Bisita: No ay-ayatentayo dagiti kaarrubatayo, alertotay a mangilasin iti asinoman a kabbaro a tumabuno kadagiti gimongtayo ket mariknada koma a saanda a sabsabali. (Roma 15:7) Ipariknayo a gagayyemdakayo a pudno a maseknan iti naespirituan a pagimbaganda. Ti napudno a pannakaseknantayo ken ti panangitukon iti personal a panagadal iti Biblia ti mabalin a mangtignay kenkuana nga umawat iti tulongtayo.
8 Ti Nasayaat a Kababalintayo: Babaen ti nasayaat a kababalintayo, maarkosantayo ti kinapudno. (Tito 2:10) No nasayaat ti pakasarsaritaantayo iti lubong kas Saksi ni Jehova, pakaidayawan dayta ti Diostayo. (1 Ped. 2:12) Daytoy ti tumulong met kadagiti dadduma a magna iti dalan ti biag.
9 Apay a dikay repasuen dagitoy a lima a pamay-an tapno maipakitatayo ti apresasion iti naindaklan a panagayat ti Dios kadatayo ket iyaplikaryo dagitoy? (1 Juan 4:16) No aramidenyo dayta, agapitkayo iti adu a bendision.