Ti Eskuelaan a Mangisagana Kadatayo Agpaay iti Kapatgan iti Biag
1 Ageskuela dagiti tattao tapno masursuroda dagiti banag a tumulong kadakuada a mangragpat kadagiti kalatda iti biag. Ngem adda pay kadi ti nasaysayaat a kalat ngem ti panangidayaw iti Gubuayan ti biag ken panangisuro iti sabsabali maipapan kadagiti panggep ken dalanna? Awan. Ti panggep ti Teokratiko nga Eskuelaan ti Panagministro isu ti panangisaganana kadatayo a mangisuro kadagiti sabsabali maipapan iti pammatitayo. Gapuna, iti linawas nga itatabunotayo iti dayta nga eskuelaan, masursurotayo dagiti abilidad a mangkabal kadatayo agpaay kadagiti kapatgan nga aktibidad.
2 Naipasurot iti isyu Ti Ministeriotayo iti Pagarian idi napan a bulan ti “Eskediul iti Teokratiko nga Eskuelaan ti Panagministro Para iti 2003.” Naglaon dayta nga eskediul kadagiti detalye no kasano a maikondukta ti eskuelaan. Nalabit praktikal no iragpinyo ti eskediul iti libroyo a Magunggonaan iti Edukasion nga Ipaay ti Teokratiko nga Eskuelaan ti Panagministro, a rumbeng nga itugotyo kada lawas iti Teokratiko nga Eskuelaan ti Panagministro. Usigenyo ti sumagmamano a paset ti Teokratiko nga Eskuelaan ti Panagministro Para iti 2003.
3 Kualidad ti Panagpalawag: Mangrugi no Enero, kada sesion ti Teokratiko nga Eskuelaan ti Panagministro ket mangrugi babaen ti lima a minuto a palawag maipapan iti maysa a kualidad ti panagpalawag wenno maysa nga aspeto ti panagbasa, panagadal, wenno panangisuro. Ti manangaywan iti eskuelaan, wenno ti dinutokanna a sabali a kualipikado a panglakayen, ti mangiparang kadagitoy a panglukat a palawag. Mabalin a salaysayen ti ispiker ti depinasion ken kinapateg ti kualidad ti panagpalawag. Kalpasanna, ilawlawagna dayta a material babaen ti panangusigna kadagiti Nainkasuratan a pagarigan ken ipakitana no kasano a mayaplikar dayta a kualidad, nga itampokna no kasano a rumang-ay ti ministeriotayo no mayaplikar dayta.
4 Paset Num. 1: Maulit a maipalagip kadagiti kakabsat a lallaki a nadutokan a mangipaay iti makaisuro a palawag nga ‘iturongda ti atension iti praktikal a pateg ti maisalsalaysay nga impormasion.’ Kaipapanan daytoy nga ipakitana iti kongregasion no kasano a mayaplikar ti impormasion. No maited kadakayo daytoy a paset, basaenyo ti panid 48-9 ti libro nga Eskuelaan ti Panagministro maipapan kadagiti singasing no kasano ti agsagana, ken usigenyo dagiti reperensia nga agparang iti indise ti libro iti topiko a “Praktikal nga aplikasion.”
5 Eskediul iti Panagbasa iti Biblia: No diyo nasurot ti linawas a panagbasa iti Biblia iti napalabas, apay a diyo ikagumaan a suroten ti eskediul ita a tawen? No aramidenyo dayta, mabasayo iti makatawen ti intero a Kristiano a Griego a Kasuratan. Dagiti pagimbagan ti panangirugi iti programa a panagbasa iti Biblia iti Kristiano a Griego a Kasuratan ket naisalaysay iti panid 10, parapo 4, ti libro nga Eskuelaan ti Panagministro.
6 Dagiti Tampok iti Panagbasa iti Biblia: Napagbalin a sangapulo a minuto daytoy a paset tapno makomentuan dagiti agdengdengngeg dagiti kapitulo a nayeskediul iti kada lawas. Nasken a suroten dagiti agpaset ti naituding nga oras. Linawas a maiparang daytoy, agraman iti lawas ti oral a repaso. Bayat a basaenyo dagiti nayeskediul a kapitulo, siputanyo dagiti punto a makagunggona iti panagadal ti pamiliayo, iti ministerioyo, wenno iti panagbiagyo. Ania dagiti galad ni Jehova a nayanninaw iti pannakilangenna kadagiti tattao ken nasion? Ania ti nasursuroyo a nangpabileg iti pammatiyo ken nangparayray iti apresasionyo ken ni Jehova? Sibubuloskayo koma nga agkomento iti aniaman a punto kadagiti nayeskediul a kapitulo, uray kadagiti bersikulo a mabasa iti Paset Num. 2, yantangay saan a komentuan ti agbasa dagiti bersikulo.
7 Paset Num. 2: Ti umuna a paset ti estudiante iti kada lawas ket maysa a panagsanay iti panagbasa iti publiko. Amin a mabasa iti kada bulan ket maadaw iti nayeskediul a linawas a panagbasa iti Biblia malaksid iti maudi a lawas yantangay maadaw dayta iti Ti Pagwanawanan. Basaen ti estudiante ti nayeskediul a material a di mangted iti introduksion wenno konklusion. Iti kasta, nangnangruna a maikkanna iti atension ti panagbasana.—1 Tim. 4:13.
8 Paset Num. 3 ken Num. 4: Dadduma kadagitoy a paset ti addaan iti ad-adu a reperensia a naadaw iti libro a Panakirinnason; dadduma ti addaan laeng iti tema. Kadagidiay maikkan kadagiti paset a limitado ti naited a reperensia wenno tema laeng ti naited, addaanda iti gundaway a mangbukel kadagiti pasetda babaen ti panagsukimatda kadagiti Nakristianuan a publikasiontayo. Daytoy ti mamagbalin a nalaka para kadagiti sister a mangibagay iti sawenda kadagiti kaduada nga agpaset.
9 Eksena: Kas nadakamat iti panid 45 ti libro nga Eskuelaan ti Panagministro, mabalin a mangituding ti manangaywan iti maysa nga eksena. No awan ti itudingna, mabalin dagiti sister ti agpili iti eksena a nailista iti panid 82. No agpaset ti maysa a sister kada dua a bulan, umdas para iti lima a tawen ti 30 a nagduduma nga eksena. No pilien dagiti sister ti Num. 30, “Sabali pay nga eksena a maikanatad iti lugaryo,” nasken nga isuratna ti eksena iti baba wenno likud ti porma a nakaisuratan ti pasetna (S-89). Isurat ti manangaywan iti eskuelaan ti petsa ti panagpaset ti estudiante iti panid 82 ti librona iti abay ti eksena nga inusarna. Aramiden daytoy ti manangaywan bayat a markaanna ti porma a pangbalakadan iti estudiante.
10 Porma a Pangbalakadan: Naglaon ti libroyo iti porma a pangbalakadan kadakayo. Adda dayta iti panid 79-81. Gapuna, masapul nga itedyo ti libroyo iti manangaywan iti eskuelaan kada malpas ti pasetyo. Ti manangaywan iti eskuelaan ket masapul nga addaan iti rekord dagiti punto a pakabalakadan a nasken a parang-ayen ti estudiante.
11 Oral a Repaso: Oral a maikondukta ti panagrepaso iti Teokratiko nga Eskuelaan ti Panagministro. Maangay dayta maminsan iti uneg ti dua a bulan ken agpaut iti 30 a minuto. Dagiti saludsod a mausig kabayatan ti panagrepaso ket agtultuloy nga agparang iti Ti Ministeriotayo iti Pagarian. No ti nayeskediul nga oral a repaso ket mairana iti lawas ti asamblea sirkito wenno panagbisita ti manangaywan iti sirkito, dagiti nayeskediul a paset iti sumaruno a lawas ti nasken a maiparang iti dayta a lawas, sa maaramid ti oral a repaso iti sumaruno a lawas.
12 Kanayonan a Klase: Kadagiti kongregasion a nasurok a 50 ti estudiante, mabalin a kitaen dagiti panglakayen no kasapulan dagiti kanayonan a klase. “Mabalin a maiparang iti daytoy a klase ti amin a paset dagiti estudiante wenno uray ti dua laeng a maudi a paset (Paset Num. 3 ken 4).” (Eskuelaan ti Panagministro, p. 285) Ti naud-udi a singasing ket para kadagiti kongregasion nga adu ti kabsat a babbai ngem manmano ti kakabsat a lallaki nga agpaset iti panagbasa. Nasken a mangpili dagiti panglakayen kadagiti kualipikado a lallaki a mangikondukta kadagita a klase.
13 Katulongan a Mamalbalakad: Kas nadakamat iti eskediul para iti Teokratiko nga Eskuelaan ti Panagministro, masapul a mangdutok ti bagi dagiti panglakayen iti maysa a katulongan a mamalbalakad tapno mangipaay iti pribado a balakad kadagiti panglakayen ken ministerial nga adipen a mangiparang kadagiti tampok iti Biblia ken makaisuro a palawag. Masapul nga eksperiensiado ti kabsat a madutokan, daydiay mangted iti balakad a raemen dagiti padana a panglakayen. Nasken a makaisuro ti balakadna, a komendaranna dagiti nasayaat a pamay-an ti panagpalawag ken panangisuro ken mangisingasing iti maysa wenno dua a punto a pangparang-ay. No masansan nga agpaspaset ti maysa a kabsat a lalaki, saan a masapul a balakadan kalpasan ti tunggal palawagna. Ngem nasken a mannakaawat ken mabigbig ti katulongan a mamalbalakad a mabalin pay a matulongan a rumang-ay uray dagiti kualipikadon nga agpalpalawag iti publiko.—1 Tim. 4:15.
14 No Ania ti Siputan ti Mamalbalakad: Ania ti makatulong iti mamalbalakad a mangusig iti maysa a paset? Ti maikatlo a kahon iti kaaduan kadagiti 53 a nanumeruan a kapitulo iti libro nga Eskuelaan ti Panagministro ket naglaon iti ababa a sumario no ania ti rumbeng a siputan. Nasken met a kitaen ti manangaywan iti eskuelaan dagiti dadduma a palagip wenno singasing ti libro tapno nalakana a mausig ti naurnos a pannakasangal ti material ken kinaepektibo ti maysa a paset. Kas pagarigan, imutektekanyo dagiti agsasaruno a saludsod iti makinngato ti panid 55 ken dagiti kapanunotan iti maudi a parapo iti panid 163.
15 Suratanyo Dagiti Blanko: Malaksid kadagiti nalawa a pingirna, ti libro nga Eskuelaan ti Panagministro ket naglaon iti sumagmamano a blanko nga espasio a nairanta a paginotaranyo bayat ti personal a panagadalyo ken no tumabunokayo iti Teokratiko nga Eskuelaan ti Panagministro. (Kitaenyo ti panid 77, 92, 165, 243, 246, ken 250.) Siguraduenyo nga itugot ti libroyo kada lawas. Sumurotkayo bayat ti panglukat a palawag. Kanayon koma a nakalukat ti libroyo kabayatan ti programa. Imutektekanyo dagiti singasing ti manangaywan iti eskuelaan. Siputanyo dagiti metodo ti panangisuro, saludsod, pagarigan, pangyaspingan, ilustrasion, makita a katulongan, ken panamaggidiat nga usaren dagiti ispiker. No aginotarkayo kadagiti nasayaat a punto, malagip ken mausaryonto ti adu nga agkakaimbag a punto a masursuroyo iti eskuelaan.
16 Ammo ni Jesu-Kristo a ti panangikasaba iti naimbag a damag ti Pagarian ti Dios ti katan-okan a pribilehio a maited iti asinoman. Dayta ti kangrunaan a komisionna. (Mar. 1:38) Kinunana: “Masapul nga ideklarak ti naimbag a damag ti pagarian ti Dios, agsipud ta naibaonak maigapu iti daytoy.” (Luc. 4:43) Kas kadagidiay immawat iti awisna a sumurot kenkuana, okupadotayo met unay a mangikaskasaba iti naimbag a damag, ken kanayon nga ikagkagumaantayo a pasayaaten ti kualidad ti “sakripisio ti panagdaydayaw[tayo].” (Heb. 13:15) Tapno maaramidantayo dayta, sapay koma ta determinadotayo a makipaset a regular iti Teokratiko nga Eskuelaan ti Panagministro, ti eskuelaan a mangisagana kadatayo agpaay iti kapatgan iti biag.