Ti 2015 Teokratiko nga Eskuelaan ti Panagministro Tulongannatayo a Mangpasayaat iti Panangisurotayo

¹ Insurat ni salmista David: “Dagiti sasao ti ngiwatko ken ti panagmennamenna ti pusok agbalinda koma a makaparagsak iti sanguanam, O Jehova a Batok ken Mannubbotko.” (Sal. 19:14) Kayattayo met a makaay-ayo ken Jehova ti panagsasaotayo gapu ta ipatpategtayo ti pribilehiotayo a mangisarsarita iti kinapudno iti kongregasion ken iti ministerio. Ti Teokratiko nga Eskuelaan ti Panagministro ti maysa kadagiti pamay-an a panangsanay ni Jehova kadatayo iti ministerio. Linawas a maang-angay daytoy a panangsanay iti nasurok a 111,000 a kongregasion iti sangalubongan. Nakatulong daytoy kadagiti kakabsat iti intero a lubong—aniaman ti kasasaadda iti biag—nga agbalin a naan-anay a kualipikado kas ministro ti naimbag a damag, ken makabael a mangisuro iti makagutugot a pamay-an, nataktika, ken natured.—Ara. 19:8; Col. 4:6.

² Ti eskediul ti eskuelaan para iti 2015 ramanenna dagiti topiko a nailawlawag iti “An Introduction to God’s Word” (“Introduksion iti Sao ti Dios”), iti “Glossary of Bible Terms” iti New World Translation, ken ti material iti Pannakatarus iti Kasuratan, Tomo 1. Maysa pay, adda panagbalbaliw iti oras a nailatang iti paset a Dagiti Tampok iti Panagbasa iti Biblia ken iti Paset Num. 1. Mailawlawag kadagiti sumaganad a parapo dagitoy a panagbalbaliw agraman dagiti instruksion iti pannakaiparang dagiti paset iti eskuelaan.

³ Dagiti Tampok iti Panagbasa iti Biblia: Dagiti kakabsat a lallaki a mangiparang iti daytoy a paset ket maikkan iti dua a minuto a mangilawlawag iti maysa a makapainteres ken praktikal a punto iti Kasuratan manipud iti naituding a mabasa iti Biblia iti dayta a lawas. No agsaganada a naimbag, makairanudda iti napateg a punto iti kongregasion iti uneg ti dua a minuto. Kalpasanna, kas iti dati, adda gundaway ti kongregasion nga agkomento iti 30 a segundo wenno awan pay, iti uneg ti innem a minuto, maipapan kadagiti makapainteres a punto a nagustuanda iti naituding a basaen iti Biblia iti dayta a lawas. Pudno a kasapulan ti panagsagana ken disiplina tapno makaipaaytayo iti makagunggona a komento iti 30 a segundo, ngem nagsayaat dayta a panangsanay kadatayo. Adu pay ti maikkan iti gundaway a mangikomento iti nasursuroda iti personal a panagsukimatda.

⁴ Paset Num. 1: Naksayan ti nailatang nga oras para iti panagbasa iti Biblia. Maipaay laengen daytoy iti tallo a minuto wenno awan pay ken basbassiten ti saklawenna a material. Dagidiay mangiparang iti daytoy a paset rumbeng nga agensayoda iti sumagmamano a daras, a basaenda dayta a sipipigsa, umiso ti pannakaibalikasna, ken naannayas tapno maawatan ti kababagasna. Rumbeng nga ikagumaan ti amin nga adipen ni Jehova ti agbalin a nalaing nga agbasa, yantangay napateg ti akem ti panagbasa iti panagdaydayawtayo. Anian a ragsaktayo ta adu kadagiti annaktayo ti nalaing nga agbasa! Makomendaran dagiti nagannak gapu iti naayat a panangikagumaanda a mangtulong kadagiti annakda nga agbalin a nalaing a bumabasa.

⁵ Paset Num. 2: Daytoy ket lima a minuto a presentasion nga iparang dagiti kakabsat a babbai. Rumbeng a mausar ti naituding a tema. No ti material ket naibatay iti New World Translation, masapul a mayaplikar dayta iti maysa nga aspeto ti panagserbi iti tay-ak a realistiko ken praktikal iti teritoria ti kongregasion. Ngem no naibatay iti karakter iti Biblia a nailawlawag iti Pannakatarus iti Kasuratan, Tomo 1, masapul nga adalen ti estudiante ti impormasion nga adda iti babaen ti karakter iti Biblia, mangpili iti maitutop a teksto nga usarenna, ken ipakitana no ania ti maadal iti ulidan dayta a karakter. Mabalin ti mangiraman iti kanayonan a teksto nga adda pakainaiganna iti tema. Mangdutok ti manangaywan iti eskuelaan iti kadua ti estudiante nga agpaset.

⁶ Paset Num. 3: Daytoy ket lima a minuto a presentasion nga iparang ti kabsat a lalaki wenno babai. No maited iti kabsat a babai, maiparang daytoy a kas iti Paset Num. 2. No maited iti kabsat a lalaki, ti material a naibatay iti Pannakatarus ket maiparang kas palawag agpaay kadagiti tumabuno. Masapul a buklen ti estudiante ti naituding a tema, mangpili kadagiti mayanatup a teksto nga usarenna, ken ipakitana no ania ti maadal iti ulidan dayta a karakter ti Biblia.

⁷ Baro nga Aspeto ti Paset Num. 3 Para Kadagiti Kabsat a Lallaki: No ti paset ket naibatay iti material iti New World Translation, maiparang daytoy kas demostrasion maipapan iti panagdaydayaw ti pamilia wenno panangasaba. Gagangay a mangted ti manangaywan iti eskuelaan iti kadua ti estudiante nga agpaset ken iti eksena. Rumbeng a ti kadua ti estudiante ket kapamiliana wenno maysa a kabsat a lalaki iti kongregasion. Mabalin ti mangiraman kadagiti kanayonan a teksto a mangitampok kadagiti prinsipio iti Biblia nga adda pakainaiganna iti tema ti presentasion. Mabalin a sagpaminsan a panglakayen ti mangiparang iti daytoy a paset. Mabalin a dagiti panglakayen ti mangpili iti eksena ken kaduada. Sigurado a maparegta ti kongregasion no makitada ti pamay-an a panangisuro dagiti panglakayen iti pamiliada wenno iti sabali a kabsat a lalaki.

⁸ Balakad: Kalpasan ti paset ti tunggal estudiante, mangbusbos ti manangaywan iti eskuelaan iti dua a minuto a mangipaay iti komendasion ken makaisuro a balakad maibatay iti Magunggonaan iti Edukasion nga Ipaay ti Teokratiko nga Eskuelaan ti Panagministro. No iyam-ammo ti manangaywan iti eskuelaan ti paset ti estudiante, saanna a dakamaten ti punto a pakabalakadan ti estudiante. Kalpasan ti tunggal paset, mangted ti manangaywan iti eskuelaan iti mayanatup a komendasion iti estudiante, dakamatenna ti punto a pakabalakadanna ken ibagana no apay a nasayaat ti naaramidan ti estudiante iti dayta a punto wenno siaayat nga ilawlawagna no apay a nasayaat nga ipaayan pay ti estudiante iti kanayonan nga atension dayta a punto.

⁹ Ti porma a pakabalakadan ti estudiante ket masarakan iti panid 79-81 iti librona nga Eskuelaan ti Panagministro. Kalpasan ti panangiparang ti estudiante iti pasetna, markaan ti manangaywan iti eskuelaan ti libro ti estudiante ken saludsodenna iti pribado no inaramidna ti ensayo nga adda pakainaiganna iti punto a pakabalakadanna. Kalpasan ti gimong wenno iti sabali a gundaway, mabalinna ti mangipaay iti komendasion ken dadduma pay a makatulong a singasing iti estudiante. Ti personal nga atension a maawat ti tunggal estudiante iti eskuelaan ket rumbeng a maibilang kas oportunidad a tumulong kenkuana a rumang-ay iti naespirituan.—1 Tim. 4:15.

¹⁰ No ti estudiante ket limbesen iti oras, alerto koma nga agsenial ti manangaywan iti eskuelaan wenno ti katulonganna, babaen ti batingting wenno panagtuktok, tapno maammuan ti estudiante a naibusen ti orasna. Rumbeng nga ipangag ti estudiante dayta a senial babaen ti panangingudonan iti ibagbagana sa bumaban iti plataporma.—Kitaenyo ti libro nga Eskuelaan ti Panagministro, p. 282, par. 4.

¹¹ Maiparegta nga agpasalista iti Teokratiko nga Eskuelaan ti Panagministro ti amin a makaragpat iti kualipikasion. (Kitaenyo ti libro nga Eskuelaan ti Panagministro, p. 282, par. 6.) Ti edukasion a maipapaay iti daytoy nga eskuelaan ket nakatulong iti ili ni Jehova a mangikasaba ken mangisuro iti naimbag a damag maipapan iti Pagarian buyogen ti kompiansa, dignidad, ken ayat. Awan duadua a maragsakan ni Jehova no idaydayaw dagiti amin a magunggonaan iti teokratiko nga edukasion!—Sal. 148:12, 13; Isa. 50:4.