Iwaragawagyo ti Mensahe ti Pagarian
1 “Masapul nga ideklarak ti naimbag a damag ti pagarian ti Dios, agsipud ta naibaonak maigapu iti daytoy.” (Luc. 4:43) Babaen dagita a sasao, impakaammo ni Jesus ti tema ti ministeriona—ti Pagarian ti Dios. Naisentro met iti Pagarian ti mensahe nga iwarwaragawagtayo ita, kas naipakpakauna iti Mateo 24:14: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan.” Ania dagiti kinapudno maipapan iti Pagarian ti Dios a masapul a mangngegan dagiti tattao?
2 Agturturayen ti Pagarian ti Dios idiay langit ken asidegen a suktanna ti amin a turay ti tao. Naitapuaken ti Diablo manipud langit, ket nakagtengen iti maudi nga al-aldaw ti agdama a dakes a sistema dagiti bambanag. (Apoc. 12:10, 12) Naan-anay a madadaelto ti dakes a daan a sistema ni Satanas, ngem saan a maan-ano ti Pagarian ti Dios. Agtalinaed iti agnanayon.—Dan. 2:44; Heb. 12:28.
3 Ti Pagarian pennekennanto dagiti umiso a tarigagay ti amin a natulnog a tao. Ikkatennanto ti panagsagaba a gapuanan ti gubat, krimen, panangirurumen, ken kinapanglaw. (Sal. 46:8, 9; 72:12-14) Aglaplapusananto ti taraon agpaay iti isuamin. (Sal. 72:16; Isa. 25:6) Awanton dagiti sakit ken pisikal a depekto. (Isa. 33:24; 35:5, 6) Bayat nga agturong dagiti tattao iti kinaperpekto, mapagbalin a paraiso ti daga, ken agnaedto a sangsangkatunos dagiti tattao.—Isa. 11:6-9.
4 Ipakitatayo a tarigagayantayo ti agpaituray iti Pagarian ti Dios babaen ti wagas ti panagbiagtayo ita. Ti mensahe ti Pagarian nasken nga impluensiaanna ti intero a panagbiagtayo, agraman dagiti kalat ken prioridadtayo. Kas pagarigan, nupay obligasiontayo nga abastuan ti sangakabbalayantayo, ditay kayat a dagiti material a pakaringgoran ti mangleppes kadagiti interes ti Pagarian. (Mat. 13:22; 1 Tim. 5:8) Imbes ketdi, masapul nga ipangagtayo ti pammagbaga ni Jesus: “Itultuloyyo, ngarud, a sapulen nga umuna ti pagarian ken ti kinalintegna, ket amin dagitoy a sabali pay a bambanag [dagiti material a pakasapulan ti biag] mainayonto kadakayo.”—Mat. 6:33.
5 Naganat nga ipangag dagiti tattao ti mensahe ti Pagarian bayat nga adda pay tiempo. Tulongantayo koma ida a mangaramid iti dayta babaen ti ‘panangusar iti panangguyugoy maipapan iti pagarian ti Dios.’—Ara. 19:8.