Saludsod
◼ Kaano a maitutop ti mangbuangay iti maysa a grupo nga agus-usar iti ganggannaet a pagsasao?
No medio adu dagiti ganggannaet ti pagsasaoda a tattao nga agnanaed iti teritoria ti maysa a kongregasion, iyurnos koma dagiti panglakayen ti panangasaba tapno matulongan dagiti tattao nga agus-usar iti dayta a pagsasao. (km 7/02 p. 1) Mabalin a naiwaraswaras dagiti tattao a ganggannaet ti pagsasaoda kadagiti teritoria ti dua wenno ad-adu pay nga agkakabangibang a kongregasion. Iti kasta a kasasaad, iwardas ti (wenno dagiti) manangaywan iti sirkito dagiti maseknan a kongregasion tapno makapagtitinnulongda iti trabaho a panangasaba. Sagpaminsan, mabalin ti mangyurnos iti palawag publiko wenno Panagadal iti Pagwanawanan tapno maammuan no kasano kaadu dagiti tumabuno kadagiti gimong a maangay iti ganggannaet a pagsasao.
Mabalin ti mangbuangay iti grupo nga agus-usar iti ganggannaet a pagsasao kadagitoy a kasasaad: (1) Adda dagiti agibumbunannag wenno interesado nga ad-adda a makaawat iti naimbag a damag iti ganggannaet a pagsasao. (2) Adda kualipikado a panglakayen wenno ministerial nga adipen a mangidaulo ken mangikondukta iti uray maysa laeng a gimong kada lawas. (3) Adda bagi dagiti panglakayen a madadaan a mangsuporta iti grupo. No kasta ti kasasaad, dagiti panglakayen pakaammuanda koma ti sanga nga opisina tapno pormal a maorganisar ti grupo ken maipaayanda kadagiti kanayonan nga instruksion.
Iti kaaduan a grupo, umuna a maangay ti linawas a Panagadal iti Libro ti Kongregasion. Inton agangay, mabalin nga anamongan dagiti panglakayen ti pannakaangay ti dadduma pay a gimong, kas ti Miting Publiko ken Panagadal iti Pagwanawanan. Mabalin nga iparang iti sabali a classroom ti Paset Num. 2, 3, ken 4 iti Teokratiko nga Eskuelaan ti Panagministro no adda kualipikado a panglakayen wenno ministerial nga adipen a makapagsao iti ganggannaet a lenguahe nga agserbi a mamalbalakad. Nupay kasta, tumipon ti grupo iti kongregasion no maiparang ti makaisuro a palawag, tampok iti Biblia, ken Gimong ti Serbisio. Mabalin met ti mangyurnos kadagiti taripnong sakbay ti panangasaba para iti dayta a grupo.
Agtitinnulong nga agtrabaho dagiti amin nga adda iti grupo iti panangimaton ti bagi dagiti panglakayen. Natimbeng koma ti panangiwanwan dagiti panglakayen ken sipapasnek nga asikasuenda dagiti kasapulan ti grupo. No bisitaen ti manangaywan iti sirkito ti kongregasion a tumultulong iti grupo, iyurnosna met ti makipagtrabaho iti dayta a grupo tapno mapabilegda iti naespirituan. Iti pammendision ni Jehova, nalabit agbalinto a kongregasion ti grupo nga agus-usar iti ganggannaet a pagsasao.