Maipausaryo Kadi ti Pagtaenganyo?
1 Idi umuna a siglo, adu a Kristiano ti mangipapausar kadagiti pagtaenganda a paggigimongan ti kongregasion. (1 Cor. 16:19; Col. 4:15; Flm. 1, 2) Kadagiti dadduma a kongregasion iti kaaldawantayo, kurang dagiti lugar a pakaangayan ti Panagadal iti Libro ti Kongregasion ken dagiti taripnong sakbay ti panangasaba. Isu a mabalin a 30 wenno ad-adu pay a katao ti mangbukel iti dadduma a grupo ti panagadal iti libro, nga ad-adu nga amang ngem iti maitutop koma a bilang a 15.
2 Nagsayaat a Pribilehio: Pinampanunotyo kadin nga ipausar ti pagtaenganyo para iti Panagadal iti Libro ti Kongregasion? Ti paset ti pagtaengan a kalkalaingan ti kalawana, nadalus, nalawag, ken napariir ti kasayaatan a pakaangayan ti panagadal. Nagsayaat a pribilehio ti panagadal iti libro iti pagtaenganyo, yantangay ti panagadal iti libro ket maysa a gimong ti kongregasion ken paset ti urnos ni Jehova a mangisuro kadagiti adipenna. Adu ti nagkuna a nagunggonaanda iti naespirituan idi impausarda ti pagtaenganda para iti panagadal.
3 Pangngaasiyo ta ibagayo kadagiti panglakayen no mabalin nga ipausaryo ti pagtaenganyo para iti panagadal. Mabalin nga agsapsapulda kadagiti kanayonan a lokasion. No saan a mabalin ti agadal iti libro iti pagtaenganyo, mabalin kadi a maangay sadiay dagiti taripnong sakbay ti panangasaba? Apresiaren dagiti panglakayen no ibagayo a silulukat ti pagtaenganyo para iti panagadal iti libro uray no saan pay a kasapulan ita. Mabalin a matagiragsakyo dayta a pribilehio iti masanguanan.
4 Panangipakita iti Nasayaat a Kababalin: No agtataripnong iti pribado a pagtaengan, masapul a saan a pakibiangan dagiti makiadal dagiti sanikua ti bumalay. Masapul a siguraduen dagiti nagannak a natalna dagiti annakda ken dida mapmapan kadagiti pribado a paset ti pagtaengan, wenno iti paraangan wenno iti hardin. Masapul a maipakitaan met iti konsiderasion dagiti kaarruba babaen ti panagannad a ditay mariribuk ida.—2 Cor. 6:3, 4; 1 Ped. 2:12.
5 Paregtaennatayo ti Hebreo 13:16 a ditay liplipatan “ti panagaramid iti naimbag ken ti panangiranud iti bambanag iti sabsabali, ta babaen iti kakasta a sakripisio maay-ayo a naan-anay ti Dios.” Ti panangipausar iti pagtaenganyo para iti gimong ti kongregasion ket nagsayaat a pamay-an tapno mairanudyo ti naimbag a bambanag kadagiti sabsabali ken ‘mapadayawanyo ni Jehova iti napapateg a bambanagyo.’—Prov. 3:9.