Baro nga Urnos Para Kadagiti Libraria ti Kingdom Hall
Iti adun a tawen, nagunggonaan dagiti kongregasion iti intero a lubong iti pannakausar ti libraria ti Kingdom Hall-da, a dati a maaw-awagan iti libraria ti Teokratiko nga Eskuelaan ti Panagministro. Iti napalabas, naibilang a napateg a maaddaan ti kada kongregasion iti bukodna a libraria. Nupay kasta, gapu ta adun ti Kingdom Hall nga us-usaren ti nasursurok ngem maysa a kongregasion, a dadduma kadagita ket ganggannaet ti lenguahena a kongregasion, kasla nasaysayaat a maaddaan iti maysa laeng a nasayaat ti pannakamantenerna a libraria ti Kingdom Hall para iti tunggal lenguahe iti kada Kingdom Hall. Kadagiti Kingdom Hall nga addaan iti nasursurok ngem maysa nga auditorium, adda koma libraria ti tunggal auditorium para iti kada lenguahe nga aggigimong sadiay.
Manamnama a makatulong daytoy nga urnos tapno saan unay a dakkel ti mausar nga espasio ken magastos. Maysa pay, no mapagtitipon dagiti libraria ti dua wenno ad-adu pay a kongregasion, mabalin a mangpataud dayta kadagiti nasaysayaat a libraria. No mapagtitipon dagitoy a libraria, mabalin nga idulin dagiti ekstra a libro ken mausarto inton addada maibangon a baro a Kingdom Hall. No adda kompiuter iti Kingdom Hall nga addaan iti Watchtower Library iti CD-ROM, mabalin a makagunggona unay daytoy kadagiti dadduma.
Iti kada libraria ti Kingdom Hall, maysa a kabsat a lalaki ti madutokan nga agaywan, a nasaysayaat no maysa kadagiti manangaywan ti Teokratiko nga Eskuelaan ti Panagministro. Itultuloyna koma ti manginayon kadagiti maitutop a publikasion iti libraria, a saysayaatenna a markaan ti makin-uneg nga akkub ti tunggal publikasion tapno maipakita a kukua dayta ti libraria ti Kingdom Hall. Maminsan iti makatawen a kitaenna no kompleto met laeng dagiti publikasion iti libraria ken siguraduenna a nasayaat ti kasasaad dagitoy. Saan a rumbeng nga ipanaw iti Kingdom Hall dagiti publikasion kadagita a libraria.
Agtultuloy ti panangipateg dagiti amin a naitimpuyog iti kongregasion iti libraria ti Kingdom Hall. Ipakitatayo koma ti personal a panangipategtayo iti daytoy a probision babaen ti panangaywan iti dayta ken usarentayo a pangsukimat iti ‘mismo a pannakaammo ti Dios.’—Prov. 2:5.