Saludsod

◼ Ania dagiti publikasion a rumbeng nga ikabil iti libraria ti Teokratiko nga Eskuelaan ti Panagministro?

Ti libraria ti Teokratiko nga Eskuelaan ti Panagministro iti Kingdom Hall tumulong iti panagsukimat kadagiti publikasion a nalabit di magun-odan iti sabali. Gapuna, rumbeng nga addaan iti nadumaduma a patarus iti Biblia, agdama a publikasion ti Sosiedad, kopia Ti Ministeriotayo iti Pagarian, tomo Ti Pagwanawanan ken Agriingkayo!, ken dagiti Watch Tower Publications Index. Kasta met, mainayon koma ti nasayaat a moderno a diksionario. No adda, makatulong dagiti encyclopedia, atlas, wenno dagiti libro a pagreperensiaan iti gramatika ken historia.

Saan a mayanatup nga ikabil dagiti libro maipapan iti fiction, komentario iti Biblia a mangitampok kadagiti panangbabalaw iti Kasuratan, wenno libro iti pilosopia wenno espiritismo. Ti libraria ti Teokratiko nga Eskuelaan ti Panagministro addaan laeng koma kadagiti material a tumulong kadagidiay mangus-usar iti dayta tapno agtultuloyda a rumang-ay iti naespirituan.—1 Tim. 4:15.

Ti manangaywan iti eskuelaan ti mangasikaso iti libraria, nupay mabalin a madutokan ti sabali pay a kabsat a lalaki a tumulong kenkuana a mangaywan iti dayta. Siguraduenna koma a mainayon dagiti kabbaro a publikasion apaman a magun-odanen. Rumbeng a maimarka a nabatad iti uneg ti akkub ti kada libro ti nagan ti kongregasion a makinkukua. Tinawen, masukimat koma dagiti libro tapno makita no adda masapul a matarimaan wenno masukatan.

Babaen ti panangsurot kadagitoy a singasing, matulongan ti libraria ti Teokratiko nga Eskuelaan ti Panagministro dagiti amin a mangsukimat kadagiti nalmeng a gameng iti Sao ti Dios, a mangipaay iti pannakaammo, sirib, ken pannakaawat.—Prov. 2:4-6.