Idaydayawyo ni Jehova Babaen ti Di Pormal a Panangasaba
1 Dagiti nasungdo nga adipen ni Jehova mangbirokda kadagiti gundaway a mangidayaw kenkuana iti tunggal aldaw. (Sal. 96:2, 3; Heb. 13:15) Ti maysa a pamay-an a maaramidtayo daytoy ket babaen ti di pormal a panangasaba. Adu a managdaydayaw ni Jehova ita ti agyaman ta adda nangipakaammo kadakuada iti mensahe ti Pagarian babaen ti di pormal a panangasaba.
2 Masansan a maaddaan dagiti dadduma iti gundaway a makangngeg iti mensahe ti Pagarian babaen ti di pormal a panangasaba iti maysa a tao. Kas pagarigan, gapu iti pannakisarita ni Jesus iti maysa a Samaritana iti abay ti bubon ni Jacob, adu pay ti naginteres iti naimbag a damag. (Juan 4:6-30, 39-42) Idi naibalud da Pablo ken Silas idiay Filipos, kinasabaanda ti agbambantay iti pagbaludan, ket ti intero a sangakabbalayanna inawatda ti kinapudno.—Ara. 16:25-34.
3 Dagiti Gundaway: Kadagiti ania a gundaway a mabalinyo ti mangasaba iti di pormal a pamay-an? Gundawayan dagiti dadduma ti mangasaba bayat nga aggatgatangda, agbibiaheda iti pangpubliko a lugan, wenno agur-urayda iti doktor. Adda met dagidiay mangasaba kabayatan ti panaginanada iti trabaho wenno retira iti eskuelaan. Mabalin nga agsaludsod dagiti dadduma maipapan kadagiti patpatientayo no makitada ti maysa kadagiti publikasiontayo a naibatay iti Biblia.—1 Ped. 3:15.
4 Panangirugi: Iti maysa a gimong, nangngeg ti maysa a managbabain nga ubing a babai nga agtawen iti pito a masapul a mangasaba ti tunggal maysa. Isu nga idi kimmuyog ken nanangna a nakitienda, nangikabil iti dua a broshur iti bagna. Bayat nga adda ni nanangna iti pagbayadan, nangitukon daytoy nga ubing iti broshur iti maysa a babai, a siaayat a nangala iti dayta. Idi napagsaludsodan no kasano a naituredna nga inasitgan daydi babai, kinuna daytoy a managbabain nga ubing: “Kinunak laeng, Maysa, Dua, Tallo! Sa inasitgak!”
5 Tapno makakasabatayo iti di pormal a pamay-an, kasapulantay amin ti espiritu a kas iti imparangarang dayta nga ubing. Ania ti makatulong kadatayo? Agkararagkayo a dumawat iti tured nga agsao. (1 Tes. 2:2) Mangisaganakayo iti saludsod wenno komento maipapan iti makapainteres a topiko a mausaryo a mangirugi iti saritaan. Sa agtalekkayo a bendisionan ni Jehova ti panagreggetyo.—Luc. 12:11, 12.
6 Pakaidayawan ni Jehova ken mangyeg rag-o kadatayo ti di pormal a panangasaba kadagidiay makasaritatayo iti tunggal aldaw. Mabalin a matulongan ti maysa a magna iti dalan nga agturong iti biag nga agnanayon.