Panagretiro—Ruangan a Mangiturong iti Dakdakkel a Trabaho?
1 Il-iliwen ti adu a nagaget a tattao ti panagretiroda tapno mabang-arandan iti makabannog ken narigat a sekular a trabahoda. Ngem masansan a ti panagretiro ket agresulta iti pannakapukaw ti interes, panagsikor, ken nasapa a panaglakay wenno panagbaket. Mabalin a madukotan a kanayon ti tao nga awan magapgapuananna. Impadamag ti maysa a pagiwarnak idiay Brazil nga adda dagiti nagretiro nga empleado ti gobierno a nagkuna a ‘saanda a mapnek, maringgoranda, saan a natalged ti riknada, mariknada nga awan serbida, naliday, ken awan mamaay ti biagda.’
2 Maigidiat iti dayta, adu a Kristiano ti mangibilang iti daytoy a baro a benneg ti biagda kas ruangan a mangiturong iti dakdakkel a naespirituan a trabaho. Kastoy ti kinuna ti maysa a kabsat a nangrugi nga agpayunir dua a lawas kalpasan ti itatapogna iti edad nga 65: “Iti laeng napalabas a sangapulo a tawen a panagpayunirko a nasagrapko ti aglaplapusanan a bendision.” Insurat ti maysa a pagassawaan: “Dagiti pudpudno a nabalitokan a tawenmi ket nangrugi idi nagpayunirkami.” Wen, para kadagiti adu, ti panagretiro ikkanna ida iti nagsayaat a gundaway a mangpalawa iti ministerioda ken agapit iti aglaplapusanan a bendision nga aggapu ken Jehova.
3 Panagtalinaed nga Okupado ken Nabunga: Adu a nagretiro itan ti nakasursuro nga agtrabaho a siaanep manipud iti kinaubingda gapu ta awan pay idi dagiti pagnam-ayan a gagangay ita. Nupay ti pigsada ket saanen a kas idi kabambannuaganda, adu pay latta ti magapuananda. Iti teritoria a masakupan ti maysa a sanga nga opisina, 22 porsiento kadagiti payunir—agarup 20,000 a kakabsat—ti agtawen iti di nababbaba ngem 60. Dakkel ti maitultulong dagitoy a lallakay ken babbaket iti trabaho a panangasaba. Ti kapadasan ken dagiti nadiosan a galadda ket agpaay a pagimbagan dagiti kongregasion a nakaitimpuyoganda.—Sant. 3:17, 18.
4 Ti panagtalinaed nga okupado iti Nakristianuan a ministerio ket makapakaradkad ken pasayaatenna ti biag. Kinuna ti maysa a 84 ti tawenna a kabsat a babai a nangrugi a nagpayunir idi nagretiro: “Gapu ta adu dagiti interesado nga iyad-adalak iti Biblia, nagtalinaed a naalibtak ti panunotko. Awan luganko, isu a masansan a magnaak. Dayta ti mamagtalinaed kaniak a nasalun-at.” Kinuna dagiti lakay ken baketen nga agassawa a payunir: “Ti panagserbimi pagtalinaedennakami a nasalun-at iti mental ken pisikal. Kanayonkami nga agkadua. Masansankami nga aginnangaw ken naragsakkami.”
5 Panagserbi iti Lugar nga Adda Panagkasapulan: Dagiti dadduma a nagretiro a Kristiano nga adda mabalinda iti biag immakarda tapno agserbida iti lugar nga agkasapulan iti ad-adu a manangaskasaba iti Pagarian. Adda met dagidiay nangpalawa iti ministerioda babaen ti panagserbida iti lugar nga agus-usar iti sabali a pagsasao. Kas ken apostol Pablo, dagitoy a nareregta nga agibumbunannag ‘ar-aramidenda ti amin a bambanag maigapu iti naimbag a damag, tapno agbalinda a manangiranud iti dayta iti sabsabali.’—1 Cor. 9:23.
6 Idi dadakkelen dagiti dua nga annakda a lallaki, maysa a pagassawaan ti nangrugi a nagpayunir. Kalpasan ti sumagmamano a tawen a panagpayunirda, inkagumaanda ti nagadal iti Tsino. Dandanidan agtawen iti 80, ket iti di pay nabayag, naragsakanda a nakakita iti panagbalin a kongregasion ti nakaitimpuyoganda a grupo nga agsasao iti Tsino. Pudno a bendision dagiti kastoy nga agassawa!
7 Awan Panagretiro iti Ministerio: Nupay dumteng ti panawen nga agretiro ti kaaduan a tattao iti sekular a trabahoda, awan ti Kristiano nga agretiro iti panagserbina iti Dios. Masapul nga agtalinaedtayo amin a matalek “agingga iti panungpalan.” (Mat. 24:13, 14) Siempre, gapu ta lumallakay ken bumabbaketdan, saanen a kas iti sigud ti kaadu ti maaramidan dagiti dadduma iti panagserbida ken Jehova. Ngem anian a makaparegta a makita a naimpusuan nga ar-aramidenda ti amin a kabaelanda! Ipanamnama kadakuada ti Sao ti Dios a di lipaten ni Jehova ti aramidda ken ti ayat nga ipakpakitada maipaay iti naganna.—Luc. 21:1-4; Heb. 6:10.
8 No dandanikayon agretiro, apay a diyo ikararag ken panunoten no kasanoyo a mausar a naan-anay ti panagbalbaliw ti kasasaadyo? Iti tulong ti Dios, ti panagretiro mabalin a luktanna kadakayo ti ruangan a mangiturong iti dakdakkel a trabaho a pakaidayawan ni Jehova ken mangyeg iti adu a bendision.—Sal. 148:12, 13.