Tuladenyo ti Kinaimbag ni Jehova
1 Kalpasan ti panangbuyatayo iti nangayed nga ilelennek ti init wenno panangnanamtayo iti naimas a taraon, ditay kadi matignay nga agyaman ken ni Jehova, ti Gubuayan ti amin a naimbag a banag? Ti kinaimbagna gutugotennatayo a mangtulad kenkuana. (Sal. 119:66, 68; Efe. 5:1) Kasanotayo a maiparangarang ti kinaimbag?
2 Kadagiti Di Manamati: Ti maysa a pamay-an tapno matuladtayo ti kinaimbag ni Jehova ket babaen ti napasnek a pannakaseknan kadagiti ditay kapammatian. (Gal. 6:10) Ti panangipakita iti kinaimbag kadagiti praktikal a pamay-an ket mabalin a nasayaat ti epektona iti panangmatmatda kadagiti Saksi ni Jehova ken iti mensahetayo.
3 Kas pagarigan, bayat nga agur-uray iti klinika, nakatugaw ti agtutubo a payunir a kabsat a lalaki iti abay ti maysa a baket a kasla nakarkaro ti sakitna ngem iti kaaduan kadagiti dadduma pay a pasiente nga adda sadiay. Idi isun ti sumaruno a kitaen ti doktor, pinaunana ti baket. Di nagbayag, nagsarakda manen, iti daytoy a gundaway idiay tiendaan. Maragsakan ti baket a nakakita kenkuana. Nupay inyaleng-alengna idi ti naimbag a damag, kinunana nga ammona itan a pudno nga ay-ayaten dagiti Saksi ni Jehova dagiti padada a tattao. Inrugina ti makipagadal iti Biblia.
4 Kadagiti Kakabsattayo: Matuladtayo pay ti kinaimbag ni Jehova no madadaantayo a tumulong kadagiti kapammatiantayo. Kadagiti tiempo ti didigra, ditay paudi kadagiti umuna a mapan mangsaranay kadagiti kakabsattayo. Maipakitatayo ti kasta met laeng nga espiritu no tulongantayo dagidiay agkasapulan iti pagluganan a mapan makigimong, sarungkaran dagiti adda an-annayenna, ken ipakita ti pammateg kadagiti kakongregasiontayo a ditay unay am-ammo.—2 Cor. 6:11-13; Heb. 13:16.
5 Ipakpakita met ni Jehova ti kinaimbag babaen ti panagbalinna a “sisasagana a mamakawan.” (Sal. 86:5) Kas panangtulad kenkuana, maipakitatayo ti ayattayo iti kinaimbag babaen ti panangpakawan kadagiti sabsabali. (Efe. 4:32) Makatulong daytoy a mamagbalin a ‘naimbag ken makaay-ayo’ ti pannakilangentayo kadagiti kapammatiantayo.—Sal. 133:1-3.
6 Sapay koma ta ti aglaplapusanan a kinaimbag ni Jehova tignayennatayo a mangidayaw kenkuana ken punnuennatayo iti rag-o. Ken sapay koma ta gutugotennatay dayta a mangikagumaan a mangtulad iti kinaimbagna iti amin nga aramidentayo.—Sal. 145:7; Jer. 31:12.