Pudno a Panagkaykaysa Dagiti Kristiano—Kasano?
1 Ania ti mamagkaykaysa iti nasurok nga innem a milion a tattao iti 234 a pagilian ken agarup 380 a pagsasao? Ti laeng panagdayaw ken ni Jehova a Dios. (Mik. 2:12; 4:1-3) Ammo dagiti Saksi ni Jehova nga agraraira ita ti pudno a Nakristianuan a panagkaykaysa gapu ta tagtagiragsakenda a mismo dayta. Kas “maymaysa nga arban” iti sidong ti “maymaysa a pastor,” determinadotayo a mangsaranget iti mamagsisina nga espiritu ti lubong.—Juan 10:16; Efe. 2:2.
2 Ti manayon a panggep ti Dios ket amin nga anghel ken tattao agkaykaysada iti pudno a panagdayaw. (Apoc. 5:13) Gapu ta ammona ti kinapateg daytoy, sipapasnek nga inkararag ni Jesus ti panagkaykaysa dagiti pasurotna. (Juan 17:20, 21) Kasanotayo a maitandudo ti panagkaykaysa iti uneg ti kongregasion Kristiano?
3 No Kasano a Maragpat ti Panagkaykaysa: Saan a matagiragsak dagiti Kristiano ti panagkaykaysa no awan ti Sao ken espiritu ti Dios. No iyaplikartayo dagiti mabasatayo iti Biblia, ti espiritu ti Dios ket siwayawaya nga agayus iti biagtayo. Tumulong daytoy kadatayo a ‘mangsalimetmet iti panagmaymaysa ti espiritu iti mamagkaykaysa a singgalut ti talna.’ (Efe. 4:3) Tignayennatayo nga agiinnanus maigapu iti ayat. (Col. 3:13, 14; 1 Ped. 4:8) Itantandudoyo kadi ti panagkaykaysa babaen ti inaldaw a panangmennamenna iti Sao ti Dios?
4 Pagkaykaysaennatayo met ti annongentayo a mangasaba ken mangaramid kadagiti adalan. No makipagtrabahotayo kadagiti dadduma iti Nakristianuan a ministerio, nga ‘umag-agawatayo nga agdadanggay a maipaay iti pammati iti naimbag a damag,’ agbalintayo a “katrabahuan iti kinapudno.” (Fil. 1:27; 3 Juan 8) No aramidentay dayta, lumagda ti mamagkaykaysa a singgalut ti ayat iti uneg ti kongregasion. Apay a diyo awisen ti maysa a nabayagen a diyo nakadua iti panangasaba tapno kumuyog kadakayo iti tay-ak ti ministerio iti daytoy a lawas?
5 Anian a pribilehiotayo ta kamengnatayo ti agdama a maymaysa a pudno a sangalubongan a panagkakabsat! (1 Ped. 5:9) Iti ngalay ti Nobiembre agingga iti nasapa a paset ti Enero, rinibu a tattao iti Pilipinas ti mangtagtagiragsak iti panagkaykaysa kadagiti “Idayawyo ti Dios” a Kombension Distrito. Sapay koma ta makiraman ti tunggal maysa kadatayo iti daytoy napateg a panagkaykaysa babaen ti inaldaw a panagbasa iti Biblia, panangrisut kadagiti di panagkikinnaawatan iti naayat a pamay-an, ken panangikasaba iti naimbag a damag “buyogen ti panagkaykaysa.”—Roma 15:6.