Magunggonaan iti Panagadal iti Umadanika ken Jehova
1 Iti Kombension Distrito a “Dagiti Naregta a Manangiwaragawag iti Pagarian,” naragsakantayo nga immawat iti libro nga Umadanika ken Jehova. Adu ti dagus a nangbasa iti libro. Adu pay ti awan duadua a natignay a mangaramid iti dayta gapu iti teksto para iti tawen 2003: “Umadanikayo iti Dios, ket isu umadaninto kadakayo.”—Sant. 4:8.
2 Inton Marso, irugitayo nga adalen ti Umadanika ken Jehova iti Panagadal iti Libro ti Kongregasion. Kasanotayo a magunggonaan a naan-anay iti panagadaltayo? Nasken ti panagsagana. Dua a lawas a maadal ti tunggal kapitulo, nga addaan iti sumagmamano a parapo a nakaeskediul a maadal iti tunggal lawas. Daytoy ti mangted kadakayo iti nawadwad nga oras para kadagiti naimpusuan a komentoyo a naibatay iti panangadal ken panangmennamennayo iti material. Maysa pay, basbassit a parapo ti mausig bayat dagiti lawas a marepaso ti maudi a paset ti kapitulo, tapno nawadwad ti oras a mausar para iti naisangsangayan a paset ti libro.
3 Mangrugi iti kapitulo 2, ti kahon a napauluan iti “Salsaludsod a Pagmennamennaan” ket agparang iti sakbay ti pagnguduan ti tunggal kapitulo. Kalpasan a mausig ti maudi a parapo iti kapitulo, ti manangaywan iti panagadal iti libro ipasalaysayna iti grupo ti maipapan iti kahon. Paregtaenna dagiti kameng ti grupo a mangyebkas kadagiti kapanunotanda, nga ibagada dagiti nasayaat a punto a naadalda iti panangmennamennada iti Kasuratan. (Prov. 20:5) Malaksid kadagiti saludsod iti kahon, mabalin a sagpaminsan a mangidatag kadagiti saludsod a kas kadagitoy: “Ania ti maadalyo iti daytoy nga impormasion maipapan ken ni Jehova? Ania ti epekto daytoy iti biagyo? Kasanoyo nga usaren daytoy tapno matulonganyo dagiti sabsabali?” Kalatna a paregtaen ti grupo a mangipaay kadagiti naimpusuan a komento, saan ket a tapno subokenna no ania ti ammo ti grupo maipapan kadagiti saan unay a napateg a detalye.
4 Naidumduma ti Umadanika ken Jehova. Nupay pakaidayawan ni Jehova dagiti amin a publikasion “ti matalek ken masirib nga adipen,” daytoy a libro ket interamente a nairanta a mangusig kadagiti galad ni Jehova. (Mat. 24:45-47) Anian a makaparagsak nga oportunidad ti agur-uray kadatayo! Sibabaknang a magunggonaantayo iti nauneg a panangadal iti personalidad ni Jehova. Sapay koma ta ti panagadal tulongannatayo nga ad-adda a suminged iti nailangitan nga Amatayo, ken agbalintayo koma nga ad-adda nga epektibo iti panangtulong kadagiti dadduma a mangaramid met iti kasta.