Mangrugi a Maadal ti Umadanika ken Jehova iti Lawas ti Enero 6
1. Mangrugi iti lawas ti Enero 6, kasanotayo nga ad-adda a suminged ken ni Jehova?
1 Kayat ni Jehova nga umadanitayo kenkuana. (Sant. 4:8) Tapno maaramidtayo dayta, mangrugi inton Enero 6, adalentayto ti Umadanika ken Jehova iti Panagadal ti Kongregasion iti Biblia. Iti pakauna ti libro, kastoy ti nadakamat a panggepna: “Ad-adda a sumingedtayo iti Dios no utobentayo ti wagas a panangiparangarang ni Jehova iti tunggal maysa kadagiti galadna, no maammuantayo no kasano a naan-anay nga inyanninaw ni Jesu-Kristo dagita a galad, ken no matarusantayo no kasanotay met a mapatanor dagitoy.” Daytoy a libro ket inadalen dagiti kongregasion idi 2004 ken 2005. Ngem manipud idi, agarup dua a milion nga agibumbunannag ti nainayon, ket adu kadakuada ti ita pay laeng a makaadal kadagiti makaay-ayo a kualidad ni Jehova iti detalyado a pamay-an. Para kadagidiay nakaadalen iti daytoy a libro, rumayray ti apresasionda kadagiti kualidad ni Jehova babaen ti panangadalda manen iti daytoy.—Sal. 119:14.
2. Kasano ti panangadal iti Umadanika ken Jehova?
2 No Kasano ti Panangadal: Mangipaay ti konduktor iti ababa nga introduksion, nalabit maysa wenno dua laeng a sentensia. Saan a naglaon ti material kadagiti teksto a namarkaan iti “basaen” isu a ti konduktor ti mangpili kadagiti teksto a rumbeng a maibasa. Mabalin ti mangyimtuod iti maysa wenno dua a saludsod kas repaso iti ngudo ti tunggal panagadal. No naglaon ti material iti kahon a “Salsaludsod a Pagmennamennaan,” daytoy ti mausar a pangrepaso. No ipalubos ti oras, mabalin nga ipabasa ti konduktor ti sumagmamano a teksto iti kahon sa mangibangon kadagiti saludsod a komentuan ti tallaong.
3. Bayat ti panangadaltayo iti daytoy a libro, ania ti rumbeng nga aramidentayo ken apay?
3 Naan-anay a Magunggonaan: Agsaganakayo a nasaksakbay uray no naadalyo idin daytoy a libro. Agkomentokayo ta pakaidayawan dayta ni Jehova, matulongannakayo a mangtandaan iti impormasion, ken magunggonaan dagiti timmabuno. (Sal. 35:18; Heb. 10:24, 25) Bayat a mennamennaenyo ti awan kaaspingna a kualidad ni Jehova, ad-adda a sumingedkayo kenkuana. (Sal. 77:11-13) Kanayonanna, ad-adda a determinadokayo nga agtulnog kadagiti bilinna ken ad-adda a matignaykayo a mangisarsarita iti maipapan kenkuana.—Sal. 150:1-6.