Ti Panangraut Dagiti Nakakabalio a Bunggoy a Mangapektar Kenka
1, 2. Kasano a nairaman dagiti adipen ti Dios ita iti pannakatungpal ti naimpadtuan a sirmata a nailanad iti Apocalipsis 9:13-19?
1 “Ti maikanem nga anghel pinuyotna ti trumpetana.” Kalpasan dayta, gumgumluong ti “buybuyot dagiti nakakabalio” a “dua a linaklaksa a laksa” ti bilangda. Saan a gagangay nga armada daytoy. “Ti ul-ulo dagiti kabalio [ket] kas iti ul-ulo dagiti leon.” Rimmuar ti apuy, asuk, ken asupre kadagiti ngiwatda, ken dagiti “ipusda ket umasping kadagiti serpiente.” Makadadael ti epekto daytoy a simboliko nga iraraut dagiti nakakabalio a bunggoy. (Apoc. 9:13-19) Ammom kadi no kasanoka a nairaman iti pannakatungpal daytoy naisangsangayan a naimpadtuan a sirmata?
2 Dagiti napulotan a natda ken dagiti kakaduada, ti sabsabali a karnero, sangsangkamaysa nga ipakpakaammoda ti panangukom ti Dios. Nagbanag daytoy iti naan-anay a pannakaibutaktak ti natay a kasasaad iti naespirituan ti Kakristianuan. Usigentayo ti dua nga aspeto ti naimpadtuan a sirmata a mangipakita no apay nga epektibo unay ti ministerio dagiti adipen ti Dios.
3. Kasanoka a masansanay tapno sieepektibo a maipakaammom ti mensahe ti Dios?
3 Nasanay ken Nakabalan a Mangipakaammo iti Mensahe ti Dios: Babaen ti Teokratiko nga Eskuelaan ti Panagministro ken ti dadduma pay a gimong ti kongregasion, dagiti ministro ti Dios nasanayda a mangisao iti mensahe ti Dios nga addaan autoridad. Kas panangtulad ken ni Jesus ken dagiti adalanna, birbirokenda dagiti maikari, a mangaskasabada iti sadinoman a mabalin a pakasarakan kadagiti tattao. (Mat. 10:11; Mar. 1:16; Luc. 4:15; Ara. 20:18-20) Pudno nga epektibo daytoy naibatay iti Biblia a pamay-an ti panangisuro!
4. Ania dagiti mabalin nga usaren ti adu nga agibumbunannag tapno maitungpalda ti trabahoda?
4 Binilion a Biblia, libro, broshur, ken magasin ti naiwarasen dagiti Kristiano a ministro iti panangitungpalda iti inted ti Dios nga annongenda a panangasaba. Dagitoy a publikasion ket maipapaay iti agarup 400 a pagsasao, a naglaon iti nadumaduma a topiko ken agus-usar kadagiti pamay-an a makaallukoy kadagiti nadumaduma a kita ti tattao. Sieepektibo kadi nga us-usarem dagitoy a publikasion?
5, 6. Ania ti mangipasimudaag a ni Jehova supsuportaranna dagiti adipenna?
5 Nailangitan a Panangiwanwan ken Suporta: Ti naimpadtuan a sirmata ibatadna met a ti trabaho nga irepresentar ti simboliko nga iraraut dagiti nakakabalio a bunggoy ket supsuportaran ti Dios. (Apoc. 9:13-15) Maar-aramid ti sangalubongan a trabaho a panangasaba, saan a babaen ti sirib wenno pannakabalin ti tao, no di ket babaen ti espiritu ti Dios. (Zac. 4:6) Us-usaren ni Jehova dagiti anghel a mangiwanwan iti daytoy a trabaho. (Apoc. 14:6) Gapuna, buyogen ti panangikagumaan dagiti Saksina ditoy daga, mangipapaay ni Jehova iti nailangitan a suporta tapno maallukoy dagiti naemma nga umadani kenkuana.—Juan 6:45, 65.
6 Awan ti makaigawid kadagiti adipen ni Jehova gapu ta nasanay, naan-anay a nakabalanda a mangipakaammo iti mensahe ti Dios, ken agtartrabahoda iti sidong ti panangiwanwan dagiti anghel. Itultuloytayo nga aramiden ti pasettayo iti pannakatungpal daytoy makapagagar a naimpadtuan a sirmata.