“Lumawakayo”
1. Ania ti pagrebbengan ti tunggal maysa kadatayo?
1 Kas agkakabsat a Kristiano, pagrebbengan ti tunggal maysa kadatayo ti tumulong a mangparayray iti nabara a panaglalangen iti uneg ti kongregasion. (1 Ped. 1:22; 2:17) Mapataud ti kasta a kinabara no ‘lumawatayo’ iti nadungngo a pammategtayo iti tunggal maysa. (2 Cor. 6:12, 13) Apay a nasken nga am-ammuentayo a naimbag dagiti kakabsattayo?
2. Apay a nasken a makigayyemtayo kadagiti kapammatiantayo?
2 Tumibker ti Panaggagayyem: No ad-adda a maam-ammotayo dagiti kapammatiantayo, ad-adda a maapresiartayo ti pammati, panagibtur, ken dadduma pay a nasayaat a kualidadda. Awan aniamanna kadatayo dagiti pagkuranganda, ken tumibker ti panaggagayyemtayo. No agaammotayo a naimbag, nalaklaka a mapabileg ken maliwliwatayo ti tunggal maysa. (1 Tes. 5:11) Agbalintayo a “makapabileg a tulong” iti tunggal maysa a mangsaranget kadagiti dakes nga impluensia ti lubong ni Satanas. (Col. 4:11) Tangay agbibiagtayo kadagitoy narikut a maudi nga aldaw, anian a yamantayo ta addaantayo kadagiti nasayaat a gagayyem iti ili ni Jehova!—Prov. 18:24.
3. Kasanotayo nga agbalin a makapabileg a tulong kadagiti dadduma?
3 Mapabileg ken maliwliwadatayo dagiti nasinged a gagayyem no maipasangotayo kadagiti narigat a kasasaad. (Prov. 17:17) Kastoy ti kuna ti maysa a Kristiano a nakarikna idi iti kinaawan serbi: “Adda dagiti gagayyemko a positibo ti makunada maipapan kaniak ket nakatulong daytoy a mangparmek iti negatibo a panagpampanunotko.” Bendision a naggapu ken ni Jehova dagiti kasta a gagayyem.—Prov. 27:9.
4. Kasanotayo nga ad-adda a maam-ammo dagiti sabsabali iti kongregasion?
4 Mangipakitakayo iti Interes Kadagiti Sabsabali: Kasanotayo a mapalawa ti nadungngo a pammategtayo kadagiti kapammatiantayo? Malaksid iti panangkablaaw kadakuada kadagiti Nakristianuan a gimong, ikagumaanyo ti makisarita kadakuada a sipapasnek. Mangipakitakayo iti personal nga interes, ngem diyo pakibiangan ti biagda. (Fil. 2:4; 1 Ped. 4:15) Maipakitatayo met ti interes babaen ti panangawis kadakuada iti pannangan. (Luc. 14:12-14) Wenno saan, mabalinyo ti makitulag kadakuada nga agkuyogkayo a mangasaba. (Luc. 10:1) No pagreggetantayo nga am-ammuen a naimbag dagiti kakabsattayo, maparayraytayo ti panagkaykaysa iti uneg ti kongregasion.—Col. 3:14.
5. Ania ti maysa a pamay-an tapno umadu dagiti gagayyemtayo?
5 Dagiti laeng kadi kaedad wenno kadutdotantayo ti pakigayyemantayo? Saan koma nga isuda laeng dagiti gagayyemtayo iti kongregasion. Nasinged nga aggayem da David ken Jonatan kasta met da Ruth ken Noemi uray no saanda nga agkakatawenan ken nagduma dagiti kasasaadda. (Ruth 4:15; 1 Sam. 18:1) Mabalinyo kadi a gayyemen dagiti dadduma pay? Mangyeg kadagiti di ninamnama a bendision ti panangaramid iti kasta.
6. Ania dagiti pagsayaatan ti panangpalawa iti nadungngo a pammategtayo kadagiti kakabsattayo?
6 No palawaentayo ti nadungngo a pammategtayo kadagiti sabsabali, makapagpipinnabilegtayo ken maparayraytayo ti talna iti uneg ti kongregasion. Maysa pay, bendisionannatayo ni Jehova gapu iti ayat nga ipakpakitatayo kadagiti kakabsattayo. (Sal. 41:1, 2; Heb. 6:10) Apay a diyo am-ammuen a naimbag dagiti amin a kakabsat aginggat’ mabalin?