Panangasaba Kadagiti Kabagian—Kasano?
1. Apay a nasken a naannadtayo no kasabaantayo dagiti kabagiantayo?
1 Anian a napalaus ti ragsaktayo no sumrektayo iti baro a lubong a kaduatayo dagiti patpatgentayo, a sangsangkamaysa nga agdaydayaw ken ni Jehova! Mabalin a pumayso dayta a naragsak a namnama no kasabaantayo dagiti kabagiantayo. Ngem tapno makaallukoy ti panangasabatayo, nasken a naannadtayo. Kastoy ti napaliiw ti maysa a manangaywan iti sirkito: “Nagsayaat ti nagapuanan dagidiay sagpaminsan a mangisarsarita kadagiti banag a mangtukay iti interes dagiti kabagianda.” Kasanotayo a maaramid daytoy?
2. Kasano a ti napasnek a pannakaseknantayo kadagiti kabagiantayo tulongannatayo a mangtukay iti interesda?
2 Tukayem ti Interesda: Panunotem a naimbag no kasanom a tukayen ti interes dagiti kabagiam. (Prov. 15:28) Ania dagiti pakaseknanda? Ania dagiti parikutda iti agdama? Nalabit mabalinmo ti mangiranud iti maysa nga artikulo wenno makaallukoy a teksto maipapan iti topiko a paginteresanda unay. No adayo ti pagnanaedan dagiti kabagiam, nalabit maaramidmo daytoy babaen ti surat wenno iyaawag iti telepono. Dimo gaburan ida iti impormasion, no di ket imulam dagiti bin-i ti kinapudno, ket agpannurayka ken ni Jehova a mangpatubo kadagidiay a bin-i.—1 Cor. 3:6.
3. Kasano a ti pannakaseknan kadatayo dagiti kabagiantayo ket mangted kadatayo iti gundaway a mangasaba kadakuada?
3 Kalpasan a pinaimbag ni Jesus ti maysa a lalaki a linuganan ti adu a demonio, imbilinna: “Agawidka kadagiti kabagiam, ket ipadamagmo kadakuada ti amin a bambanag nga inaramid kenka ni Jehova ken ti panangngaasina kenka.” (Mar. 5:19) Panunotem ti mabalin nga epekto daytoy kadagiti kabagian ti lalaki! Nupay mabalin nga awan ti kapadasam a makapainteres unay, nalabit a kayat a maammuan dagiti kabagiam no ania dagiti ar-aramidem wenno ar-aramiden dagiti annakmo. Mabalin a maaddaanka pay iti gundaway a mangiranud iti maipapan ken ni Jehova ken ti organisasionna no dakamatem kadakuada ti palawagmo iti Teokratiko nga Eskuelaan ti Panagministro, ti kombension a tinabunuam, ti isasarungkarmo iti Bethel, wenno ti naisangsangayan a kapadasam.
4. Ania ti masapul a liklikantayo no kasabaantayo dagiti kabagiantayo?
4 Agbalinka a Mannakaawat: No kasabaam dagiti kabagiam, dimo gabsuonan ida iti impormasion. Malagip ti maysa a kabsat a lalaki idi inrugina ti agadal iti Biblia: “Nakaad-adu ti inlawlawagko ken Nanang maipapan iti dandani amin a naadalko iti Biblia, ket masansan a nangituggod daytoy iti adu nga argumento, nangruna ken ni tatangko.” Uray no interesado ti kabagiam iti mensahe ti Biblia, sumungbatka iti wagas a mangtukay iti interesna a mangammo iti ad-adu pay. (Prov. 25:7) Kanayon a nadayaw, nasingpet, ken naanus koma ti pannakipatangmo, kas iti pannakisaritam kadagiti sabsabali iti ministerio.—Col. 4:6.
5. Ania ti aramidentayo no negatibo ti reaksion dagiti kabagiantayo no kasabaantayo ida?
5 Naminsan, impagarup dagiti kabagian ni Jesus a napukawnan ti nakemna. (Mar. 3:21) Ngem idi agangay, nagbalin a manamati ti dadduma. (Ara. 1:14) Dika maupay no negatibo ti reaksion dagiti kabagiam iti damo a panangiranudmo kadakuada iti kinapudno. Mabalin nga agbaliw dagiti kasasaad ken kababalin. Itultuloymo ti mangbirok iti sabali a gundaway a mangiranud kadakuada iti punto a mabalin a mangtukay iti interesda. Maragsakankanto no matulongam ida a sumrek iti dalan nga agturong iti biag nga agnanayon.—Mat. 7:13, 14.