Dagiti Ngay Kabagianyo?
1 Addaan ti kaaduan kadatayo kadagiti kabagian nga awan iti kinapudno. Anian a panangiliwtayo iti pannakipagnada kadatayo iti dalan nga agturong iti biag! Pudno unay daytoy aglalo no kabbalaytay ida. Uray no adun a tawen nga ikagkagumaantayo a tulongan ida, ditay koma panunoten nga awanen ti namnama.
2 Idi nangaskasaba ni Jesus, “dagiti kakabsatna, iti kinapudnona, dida inal-alagad ti pammati kenkuana.” (Juan 7:5) Naminsan, impapan dagiti kabagianna nga isu ket agmauyong. (Mar. 3:21) Ngem saan a nauma ni Jesus kadakuada. Idi agangay, inawat dagiti kakabsatna ti kinapudno. (Ara. 1:14) Ti kabsatna iti ina a ni Santiago nagbalin a sadiri iti kongregasion Kristiano. (Gal. 1:18, 19; 2:9) Isu a dikay sumardeng a mangidanon iti naimbag a damag ti Pagarian kadagiti kabagianyo.
3 Makapabang-arkay Koma, Saan a Manglapunos: Idi kinasabaan ni Jesus dagiti sabsabali, nabang-aran dagiti dimngeg kenkuana, saanda a napilpilit. (Mat. 11:28, 29) Dina linapunos ida kadagiti sursuro a dida maawatan. Tapno mabang-aran dagiti kabagianyo iti danum ti kinapudno, saggabassit la ti itedyo, saanyo ida a layusen! Kinuna ti maysa nga agdaldaliasat a manangaywan: “Nasayaat unay ti maibanag dagidiay mangtukay iti interes dagiti kabagianda babaen ti in-inut a panangasaba.”—1 Cor. 3:1, 2.
4 Adu dagiti Kristiano a nangasaba a sieepektibo kadagiti di manamati nga assawada babaen ti panangibati iti literatura a silulukat kadagiti topiko a mabalin a paginteresanda. Adda maysa a kabsat a babai a kasta ti inaramidna ket inyadalanna met dagiti annakna a mangmangngeg ni lakayna, nga inlawlawagna dagiti banag a makagunggona kenkuana. No dadduma saludsodenna ken lakayna: “Nasursurok daytoy ken dayta iti panagadalko ita nga aldaw. Ania ti makunam iti dayta?” Inawat ni lakayna ti kinapudno idi kamaudiananna.
5 Nadayawkay Koma, Saan a Di Makaan-anus: Kinuna ti maysa nga agibumbunannag nga “uray dagiti kabagian adda kalinteganda kadagiti bukodda a panirigan ken kapanunotan.” Isu nga ipakitatay koma ti panagraem no iyebkasda ti kapanunotanda wenno no espesipiko nga idawatda kadatayo a ditay kasarsarita ida maipapan iti kinapudno. (Ecl. 3:7; 1 Ped. 3:15) No naanus ken nalaingtay a dumngeg, makasapultayo kadagiti maitutop a gundaway a mangasaba a di madmadlaw. Makagunggona ti kasta a kinaanus, kas makita iti kapadasan ti maysa a Kristiano nga asawa a lalaki a siaanus a nangibtur iti di nasayaat a pannakilangen ti di manamati a baketna iti las-ud ti 20 a tawen. Idi nagbalbaliwen ni baketna, kinunana: “Anian a yamanko ken Jehova ta tinulongannak a mangpataud iti bunga ti espiritu a mabayag a panagitured, agsipud ta makitak itan ti resultana: Nangrugin ni baketko a magna iti dana ti biag!”
6 Dagiti ngay kabagianyo? Nalabit a babaen ti nasayaat a Nakristianuan a kababalinyo ken panangikarkararagyo kadakuada, ‘maiturongyo ida ken Jehova.’—1 Ped. 3:1, 2, footnote, iti Ingles.