Maysa a Saranay a Sisasagana a Masarakan
1. Ania ti makagapu a kumapuy ti espiritualidad ti maysa a tao?
1 Ni Anna, a maysa a kabsat nga addaan iti di manamati nga asawa ken trabaho a mangibus iti adu nga orasna, ket marigatan a tumabuno a regular kadagiti Nakristianuan a gimong, makiraman iti ministerio, ken mangadal iti Sao ti Dios. Nagbalin a di aktibo nupay ay-ayatenna pay laeng ni Jehova. Makaparagsak ta inawatna ti naespirituan a tulong dagiti maseknan a panglakayen.
2. Iti ania a pamay-an nga amin a Kristiano ket maysa a saranay a sisasagana a masarakan?
2 No awatem ti naespirituan a tulong a maituktukon iti kongregasion Kristiano, iparparangarangmo ti panagtalekmo ken ni Jehova a mismo. Kas panangtulad iti naayat a panangaywan ni Jesu-Kristo, dagiti lallakay iti kongregasion mangbirbirokda kadagiti gundaway a mangparegta ken mangipaay iti praktikal a tulong kadagidiay marigrigatan iti naespirituan. (1 Tes. 5:14) Masansan a ti laeng kasapulan ket ti naasi ken makaparegta a sasao a naipamaysa kadagiti makapabileg a teksto iti Biblia. Saan laeng a dagiti panglakayen ti mangbadang kadagidiay temporario a nakapuy iti naespirituan, no di ket pakaseknan dayta dagiti amin a Kristiano. Awan duadua a napadasanen ti tunggal maysa kadatayo ti bileg ti makaay-ayo a “sao a naisao iti umiso a tiempona.”—Prov. 25:11; Isa. 35:3, 4.
3, 4. Ania ti ramanen ti panangtulong kadagiti sabsabali, ken kasano a maaramidtayo dayta?
3 Agtignaytayo: Tapno maipakita ti naayat a pannakaseknan kadagidiay agkasapulan iti tulong nasken nga agtignaytayo, agbalintayo a mannakipagrikna, ken napasnek. Idi naammuan ni Jonatan ti narigat a kasasaad ni David, ‘timmakder ket napan ken David idiay Hores, tapno mapapigsana ti imana.’ (1 Sam. 23:15, 16) Saranayentayo dagiti sabsabali iti naalumamay a pamay-an. Mangyeg kadagiti kasayaatan a resulta dagiti sasao a naisawang buyogen ti napaypayso a pannakaseknan. Maysa pay, silalawag nga inyilustrar ni Jesus a kasapulan ti naanep, addaan panggep a panagregget tapno magun-odtayo ti kabsattayo iti naespirituan. (Luc. 15:4) No addaantayo iti napasnek a tarigagay a tumulong iti sabali a tao matignaytayo nga agtultuloy a tumulong uray no saantayo a makita a dagus ti nasayaat a resultana.
4 Anian a makapabileg no awisentayo dagiti sabsabali, kas kadagidiay kaduatayo iti panagadal iti libro, a kumuyog kadatayo iti ministerio! Bayat a tultulongantayo ti padatayo nga agserserbi ken ni Jehova a makiraman iti ministerio, mabalintayo a gundawayan daytoy a mangparegta kenkuana a mangaramid iti ad-adu pay a panagserbi iti Dios. Ti kasta a makaparagsak a panagkakaduatayo nga agserbi ken ni Jehova ket nangnangruna a makapabileg kadagidiay agpapaimbag iti naespirituan.
5. Iti dadduma a kasasaad, ania a tulong ti mabalin nga itukon dagiti panglakayen?
5 Naayat a Probision: Dagidiay saan a nakiraman iti trabaho a panangasaba wenno nakitimpuyog iti kongregasion iti sumagmamano a tiempo ket mabalin nga agkasapulan iti kanayonan a tulong tapno bumileg ti pammatida. Nalabit kasapulanda ti personal a panagadal iti Biblia babaen kadagiti publikasion a kas iti Agdayawkayo iti Maymaysa a Pudno a Dios, Umadanika ken Jehova, wenno Ania a Talaga ti Isursuro ti Biblia? Yantangay bautisadodan, kaaduanna a saanen a kasapulan nga agtultuloy ti panagadal iti napaut a tiempo. Ti Komite ti Serbisio ti Kongregasion nasken nga alerto a mangsiput no siasino ti mabalin a magunggonaan iti daytoy a probision.—Kitaenyo ti “Saludsod” iti Nobiembre 1998 ken Nobiembre 2000 a ruar Ti Ministeriotayo iti Pagarian.
6. Kasano a bimmileg manen iti naespirituan ti maysa a kabsat a babai?
6 Ni Anna, a nadakamat itay, siyayaman nga inawatna ti intukon dagiti panglakayen, nga adda maysa a kabsat a babai a nataengan iti naespirituan a mangyadal kenkuana iti Biblia. Uppat a panagadal laeng ti kasapulanna tapno matulongan nga umadani manen ken ni Jehova. Intultuloyna ti tumabuno kadagiti gimong ti kongregasion ken pinabarona ti tarigagayna a mangidaydayaw ken ni Jehova a Dios iti publiko. Ti kabsat a babai a nataengan iti naespirituan tinulonganna pay ni Anna iti ministerio babaen ti panangikuyogna kenkuana kadagiti dadduma pay nga iyad-adalanna iti Biblia agingga nga isu ket natureden a mangasaba iti binalaybalay. Kasapulanna laeng ti naayat a tulong tapno maitultuloyna manen dagiti naespirituan nga aktibidadna!
7. Ania dagiti gunggona nga itden ti panangpabileg kadagiti sabsabali iti naespirituan?
7 Ti panangpabileg kadagidiay agkasapulan ket mangyeg iti bendision kadagiti amin. Daydiay matulongan tagiragsakenna ti rag-o ti iyaadani ken ni Jehova ken ti pannakiraman kadagiti aktibidad ti organisasionna. Maragsakan dagiti panglakayen a makakita iti kasta a panagrang-ay iti naespirituan. (Luc. 15:5, 6) Suminged dagiti kameng ti kongregasion ken agkaykaysada bayat nga ipakpakita ti amin ti naayat a pannakaseknanda iti maysa ken maysa. (Col. 3:12-14) Anian a nagsayaat dagita a rason tapno tuladentayo ni Jehova, a maysa a saranay a sisasagana a masarakan!—Efe. 5:1.