No Ania ti Ibagayo Maipapan Kadagiti Magasin

Ti Pagwanawanan Okt. 15

“Patien ti dadduma nga imposible a maam-ammotayo ti Dios, yantangay adda idiay langit. Kasta kadi met ti panagriknayo? [Palubosanyo a sumungbat sa basaenyo ti Juan 17:3.] Ilawlawag daytoy a magasin no kasanotayo a makagun-od iti pannakaammo maipapan iti Dios.”

Agriingkayo! Okt.

“Adu kadatayo ti natayanen iti ing-ingungoten. Iti panagkunayo, adda ngata maaramidantayo tapno matulongantayo ida uray nataydan? [Palubosanyo a sumungbat.] Ipaay daytoy nga artikulo ti sungbat ti Biblia iti dayta a saludsod. Usigenna pay daytoy a makaliwliwa a kari.” Basaenyo ti Juan 5:28, 29. Kalpasanna, itampokyo ti artikulo a mangrugi iti panid 10.

Ti Pagwanawanan Nob. 1

“Adu ita ti agsisimparat a kapanunotan maipapan iti panangpadakkel iti anak. Iti panagkunayo, posible ngata a makagun-od dagiti nagannak iti mapagtalkan a balakad? [Palubosanyo a sumungbat sa basaenyo ti Salmo 32:8.] Mangidatag daytoy a magasin iti praktikal a balakad manipud iti Biblia maipapan iti panangpadakkel iti anak.”

Agriingkayo! Nob.

“Pinampanunotyo kadin a no talaga met laeng nga adda naayat, nalinteg, ken mannakabalin a Dios, apay ngarud a nakaad-adu ti agsagsagaba? [Palubosanyo a sumungbat.] Imutektekanyo no ania ti kuna daytoy a teksto maipapan iti pakaigapuan ti panagsagaba. [Basaenyo ti 1 Juan 5:19.] Daytoy a magasin ilawlawagna manipud iti Biblia no ania ti ar-aramiden ti Dios tapno maikkat ti panagsagaba.”