Panangpalawa iti Ministeriotayo
1 Binalakadan ni apostol Pablo dagiti Kristiano a magnada iti dana ti Dios ken ‘aramidenda dayta nga ad-adda pay a naan-anay.’ (1 Tes. 4:1) Ania ti kaipapanan daytoy kadatayo? Nasken nga itultuloytayo ti mangsapul kadagiti pamay-an no kasano a mapalawa ti ministeriotayo, a kanayon nga ikagumaantayo a ‘naan-anay nga itungpal’ dayta.—2 Tim. 4:5.
2 Motibo: Matignaytayo a mangpalawa iti ministeriotayo gapu iti tarigagaytayo nga agserbi a naan-anay iti Namarsua kadatayo. Kayattayo ti agmataengan iti naespirituan ken mangsapul kadagiti pamay-an no kasanotay a maparang-ay ti ministeriotayo. Ti nasayaat a rutina a nabuyogan iti umiso a motibo tulongannatayo a mangragpat kadagiti nateokratikuan a kalat.—Sal. 1:1, 2; Fil. 4:6; Heb. 10:24, 25.
3 Iti panangikagumaantayo a mangpalawa iti ministeriotayo, nasken a situtuloktayo nga agserbi ken agsakripisio. Mapatanortayo ti kasta a kababalin no sipapasnek nga utobentayo ti nasayaat nga ulidan nga impasdek ni Jesus. (Mat. 20:28) Iti intero a ministeriona, pagrag-oanna unay ti agserbi kadagiti sabsabali. (Ara. 20:35) Matuladtayo ni Jesus babaen ti panangipakita iti personal nga interes kadagiti tattao ken madadaan a panangaprobetsar kadagiti oportunidad a mangpalawa iti ministeriotayo.—Isa. 6:8.
4 Ti Akem Dagiti Nagannak: Mabalintay nga itukit iti naganus a puso dagiti ubbing ti tarigagay nga agserbi kadagiti sabsabali ken mangpalawa iti ministeriotayo. Palpaliiwen dagiti ubbing ti kinaanep ken kinaregta dagiti kameng ti pamilia a mangpalawa iti ministerioda. Idi ubing pay, natignay ti maysa a kabsat a lalaki nga ad-adda pay nga agserbi gapu iti pannakikaduana ken lolona kadagiti aktibidad iti kongregasion. Ti pannakakitana iti kinaanep ken kinaragsak ni lolona ti nangtignay kenkuana a mangsapul kadagiti gundaway nga agserbi kadagiti kakabsat. Isu ket maysa itan a ministerial nga adipen.
5 Ti Panagkasapulan Kadagiti Kakabsat a Lallaki: “No ti asinoman a lalaki ragragpatenna ti akem a manangaywan, tartarigagayanna ti nasayaat nga aramid.” (1 Tim. 3:1) Dagitoy a sasao gutugotenna dagiti kakabsat a lallaki a mangragpat kadagiti kanayonan a pribilehio iti organisasion ni Jehova. Saan a kasapulan dagiti naisangsangayan a saguday tapno maaramidda daytoy. Ti kabsat a lalaki a mangragragpat kadagita a pribilehio iyun-unana ti Pagarian ken sireregta a makiraman iti ministerio. (Mat. 6:33; 2 Tim. 4:5) Ikagumaanna ti agbalin a nasayaat a pagwadan dagiti sabsabali.
6 Sangalubongan: Pappapardasen ni Jehova ti trabaho a panangurnong kadagiti napudno ti panagpuspusona a tattao. (Isa. 60:22) Nasken ngarud a dagiti amin a mangsursurot iti ulidan nga impasdek ni Jesus ikagumaanda nga itungpal a naan-anay ti ministerioda. Ipakita ti sangalubongan a report a 248,327 ti nabautisaran iti 2006 a tawen serbisio. Kayat a sawen dayta nga agpromedio iti nasurok a 680 ti mababautisaran iti kada aldaw! Sapay koma ta itultuloytayo ti mangsapul kadagiti pamay-an no kasano nga ad-adda pay a maitungpaltayo a naan-anay ti ministeriotayo.