Agtutubo a Kakabsat a Lallaki, Rumagragpatkayo Kadi iti Pribilehio?
1. Kaano a yaplikar ti agtutubo a kabsat a lalaki ti balakad iti 1 Timoteo 3:1?
1 ‘No ti asinoman a lalaki ket rumagragpat iti akem, tartarigagayanna ti nasayaat nga aramid.’ (1 Tim. 3:1) Dagitoy a naipaltiing a sasao paregtaenna dagiti kakabsat a lallaki a rumagpat kadagiti pribilehio iti kongregasion. Urayem kadi nga agbalinka nga adulto sakbay nga aramidem dayta? Kinapudnona, nasaysayaat no rugiamon ti rumagpat iti pribilehio bayat nga agtutuboka pay. Iti kasta, masanayka ken maipakitam a kualipikadoka a madutokan kas ministerial nga adipen inton tumataengankan. (1 Tim. 3:10) No maysaka a bautisado nga agtutubo, ania ti aramidem tapno makaragpatka iti pribilehio?
2. Kasano a mapatanor ken maipakita ti espiritu ti panagsakripisio?
2 Panagsakripisio: Laglagipem a rumagragpatka iti nasayaat nga aramid, saan a titulo. Gapuna, patanorem ti tarigagay a tumulong kadagiti kakabsat. Ti maysa a pamay-an ket ti panangutobmo iti nagsayaat nga ulidan ni Jesus. (Mat. 20:28; Juan 4:6, 7; 13:4, 5) Ikararagmo ken Jehova a tulongannaka a mangipakita iti interes kadagiti sabsabali. (1 Cor. 10:24) Kabaelam kadi ti mangipaay iti praktikal a tulong kadagiti nataengan wenno baldado iti kongregasion? Agbolboluntarioka kadi nga agparaspas iti ruot, agnasnas iti suelo, wenno mangaramid iti dadduma pay a trabaho a pangmantener iti Kingdom Hall? Sidadaanka kadi a mangiparang iti paset iti Teokratiko nga Eskuelaan ti Panagministro no awan ti makimpaset? Makitamto a mangyeg iti rag-o ti panangtulong kadagiti sabsabali.—Ara. 20:35.
3. Kasano kapateg ti espiritualidad, ken kasano a mapatanor dayta?
3 Espiritualidad: Kadagiti agserserbi iti kongregasion, napatpateg nga amang ti espiritualidad ngem kadagiti naisangsangayan a talento wenno abilidad. Ti naespirituan a tao ikagkagumaanna a tuladen ti panangmatmat ni Jehova ken ni Jesus kadagiti bambanag. (1 Cor. 2:15, 16) Iparparangarangna “ti bunga ti espiritu.” (Gal. 5:22, 23) Isu ket naregta nga ebanghelisador a mangyun-una kadagiti interes ti Pagarian. (Mat. 6:33) Mapatanormo dagiti naespirituan a kualidad no addaanka iti nasayaat a rutina iti personal a panagadal. Karaman iti daytoy ti inaldaw a panagbasa iti Biblia, panangbasa iti tunggal ruar Ti Pagwanawanan ken Agriingkayo!, ken panagsagana ken itatabuno kadagiti gimong iti kongregasion. (Sal. 1:1, 2; Heb. 10:24, 25) Iti panangparegtana iti agtutubo a ni Timoteo a rumang-ay iti naespirituan, insurat ni Pablo: “Itultuloymo nga asikasuen . . . ti isursurom.” (1 Tim. 4:15, 16) Gapuna, isaganam a naimbag dagiti pasetmo iti Teokratiko nga Eskuelaan ti Panagministro. Agsagana ken regular a makiramanka iti ministerio. Mangipasdekka kadagiti kalat kas iti panagpayunir, panagserbi iti Bethel, wenno panageskuela iti Bible School for Single Brothers ken ikagumaam a ragpaten dagita. Ti espiritualidad tulongannaka nga ‘umadayo kadagiti tarigagay a naikasigudan iti kinaagtutubo.’—2 Tim. 2:22.
4. Kasano kapateg ti panagbalin a mapagpannurayan ken matalek?
4 Mapagpannurayan ken Matalek: Gapu ta dagiti kakabsat a lallaki a natudingan nga agiwaras iti taraon kadagiti agkasapulan a Kristiano idi umuna a siglo ket “napaneknekan,” kayatna a sawen, pagaammo kas mapagpannurayan ken matalek, masigurado dagiti apostol nga itungpalda ti annongenda. Dayta ti gapuna a naipamaysa dagiti apostol nga aramiden dagiti dadduma pay a napateg a banag. (Ara. 6:1-4) Ngarud, no maikkanka iti annongen iti kongregasion, aramidem ti amin a kabaelam a mangitungpal iti dayta. Tuladem ni Noe a simamatalek a nangsurot kadagiti instruksion iti panangaramid iti daong. (Gen. 6:22) Apresiaren ni Jehova ti kinamatalekmo ken pakakitaan dayta nga agmatmataenganka iti naespirituan.—1 Cor. 4:2; kitaen ti kahon a “Dagiti Pagsayaatan ti Pannakasanay.”
5. Apay a rumbeng a rumagpat iti pribilehio dagiti agtutubo a kakabsat a lallaki?
5 Kas naipadto, pappapartaken ni Jehova ti panangurnong kadagiti napudno ti panagpuspusona a tattao. (Isa. 60:22) Agpromedio iti kakapat ti maysa a milion ti mababautisaran iti tinawen. Gapu ta nakaad-adu ti kabbaro a dumasdasig iti kinapudno, kasapulan dagiti kualipikado a naespirituan a lallaki a mangasikaso kadagiti responsabilidad iti kongregasion. Ad-adu nga amang ita ti trabahotayo iti panagserbi ken ni Jehova. (1 Cor. 15:58) Agtutubo a kakabsat a lallaki, rumagragpatkayo kadi iti pribilehio? No wen, talaga a tartarigagayanyo ti nakasaysayaat a trabaho!
[Blurb iti panid 2]
Gapu ta nakaad-adu ti kabbaro a dumasdasig iti kinapudno, kasapulan dagiti kualipikado a naespirituan a lallaki a mangasikaso kadagiti responsabilidad iti kongregasion
[Kahon iti panid 3]
Dagiti Pagsayaatan ti Pannakasanay
Magunggonaan dagiti kualipikado nga agtutubo a kakabsat a lallaki no sanayen ida dagiti panglakayen ken ikkanda ida kadagiti annongen. Nakatugaw ti manangaywan iti sirkito iti plataporma a mangparparegta iti maysa nga agibumbunannag. Nadlawna nga adda nakatakder nga agtutubo a lalaki iti asideg, isu a dinamagna no adda ibagana. Imbaga ti agtutubo nga isu ket natudingan a mang-vacuum iti plataporma tunggal malpas ti gimong. Nakasaganan nga agawid dagiti dadakkelna, ngem dina kayat ti agawid no saanna a malpas ti trabahona. Nakaisem nga immakar ti manangaywan iti sirkito. Kinunana: “Alerto dagiti panglakayen iti dayta a kongregasion a mangsanay kadagiti kualipikado nga agtutubo a kakabsat a lallaki babaen ti panangtedda kadagiti annongen iti kongregasion. Kas resultana, no bumisitaak iti dayta a kongregasion kanayon a mangirekomendada kadagiti agtutubo a lallaki nga agserbi kas ministerial nga adipen.”