Panagpipinnaregta

1. Ania dagiti naisangsangayan a gundaway nga ipaay ti ibibisita dagiti agdaldaliasat a manangaywan?

¹ Kastoy ti insurat ni apostol Pablo iti kongregasion idiay Roma: “Il-iliwek a makitakayo, tapno maiburayankayo iti naespirituan a sagut tapno mapatibkerkayo; wenno, imbes ketdi, tapno adda koma panagsisinnukat iti pammaregta iti nagtetengngaanyo, iti tunggal maysa babaen ti pammati ti sabali, agpadpada iti pammatiyo ken kaniak.” (Roma 1:11, 12) Ti isasarungkar dagiti agdaldaliasat a manangaywan ita ipaayannatayo met kadagiti umasping a gundaway nga agpipinnaregta.

2. Apay a maipakaammo a nasaksakbay ti ibibisita ti manangaywan iti sirkito?

² Ti Kongregasion: Gagangay a maipakaammo iti kongregasion ti ibibisita ti manangaywan iti sirkito agarup tallo a bulan sakbay dayta. Daytoy ti mangted kadatayo iti gundaway a mangurnos iti eskediultayo tapno naan-anay a magunggonaantayo. (Efe. 5:15, 16) No adda sekular a trabahoyo, mabalin a kayatyo ti agpakada nga agbakasionkayo tapno makiramankayo iti panangasaba bayat dayta a lawas. Adda dagidiay agpaspasalista kas auxiliary pioneer iti bulan nga ibibisita ti manangaywan iti sirkito. No mapankayo agbakasion iti sabali a lugar, mabalinyo kadi a baliwan ti eskediulyo tapno addakayto iti dayta a lawas?

3. Ania ti mabalintay nga aramiden bayat ti ibibisita ti manangaywan iti sirkito tapno maparegtatayo?

³ Ti kangrunaan a panggep ti ibibisita ti manangaywan iti sirkito ket ti panangipaay iti personal a pammaregta ken panangsanay iti ministerio iti tay-ak. Nalabit kayatyo ti makipagtrabaho kenkuana wenno iti asawana no naasawaanen. Pagragsakan ti manangaywan iti sirkito ti makipagtrabaho kadagiti nagduduma nga agibumbunannag, a pakairamanan dagidiay bassit ti kapadasanda wenno dagidiay saan unay a nasigo a mangasaba. Makasursuro ti amin iti pamay-an ti panangasabana ken iti panangyaplikar iti aniaman a naayat a singasingna. (1 Cor. 4:16, 17) Ad-adu pay ti gundawaytayo a makipinnaregta kenkuana no awisentayo a makipangan kadatayo. (Heb. 13:2) Dumngegtayo a naimbag kadagiti palawagna yantangay maibagay dagita kadagiti kasapulan ti kongregasion.

4. Kasanotay a maparegta ti manangaywan iti sirkitotayo?

⁴ Ti Manangaywan iti Sirkito: Awan ti nakaidumaan ni apostol Pablo kadagiti kakabsat a nagserbianna. Isu ket nakapasar kadagiti karit ken pakaringgoran ken kasapulanna met ti pammaregta. (2 Cor. 11:26-28) Maysa idin a balud ni Pablo. Ngem idi naammuan dagiti kakabsat iti kongregasion idiay Roma a mapan sumarungkar sadiay, adda dagidiay napan simmabat kenkuana idiay Plasa ni Appio, nga agarup 74 kilometro ti kaadayona! “Idi makitana ida, ni Pablo nagyaman iti Dios ket bimmileg.” (Ara. 28:15) Mapabilegyo met ti manangaywan iti sirkitoyo. Ipakitayo kenkuana ti “mapamindua a dayaw” babaen ti naganaygay a panangsuportayo iti ibibisitana. (1 Tim. 5:17) Iyebkas ken ipakitayo ti napasnek nga apresasionyo kadagiti amin a naitulongna kadakayo. Isu ken ti asawana ket maragsakan no makitada ti pammati, ayat, ken panagibturyo.—2 Tes. 1:3, 4.

5. Apay a kasapulantayo amin ita ti pammaregta?

⁵ Iti daytoy “napeggad a tiempo a narigat a pakilangenan,” siasino kadatayo ti saan nga agkasapulan iti pammaregta? (2 Tim. 3:1) Ikeddengyo itan ti makiraman a naan-anay iti espesial a lawas ti panagserbi a kadua ti manangaywan iti sirkito. Amintayo—agdaldaliasat a manangaywan man wenno agibumbunannag—mabalintayo ti makiraman iti daytoy naragsak a panagpipinnaregta. Iti daytoy a pamay-an, ‘maitultuloytayo met a liwliwaen ken pabilgen ti maysa ken maysa.’—1 Tes. 5:11.