No Kasano nga Agserbi Dagiti Agdaldaliasat a Manangaywan kas Matalek a Mayordomo

“Kas mairukod iti sagut nga inawat ti tunggal maysa, usarenyo dayta iti panagserbi iti maysa ken maysa kas dagiti nasayaat a mayordomo ti di kaikarian a kinamanangaasi ti Dios a naiyebkas iti nadumaduma a pamay-an.”​—1 PEDRO 4:10.

1, 2. (a) Kasanoyo nga iyulog ti sao a “mayordomo”? (b) Asinodat’ naibilang kas mayordomo nga us-usaren ti Dios?

USAREN ni Jehova amin a matalek a Kristiano kas mayordomo. Ti mayordomo masansan a maysa nga adipen a mangasikaso iti sangakabbalayan. Mabalin pay a tamingenna ti negosio ni apona. (Lucas 16:1-3; Galacia 4:1, 2) Inawagan ni Jesus ti gunglo dagiti nasungdo a napulotan ditoy daga a “ti matalek a mayordomo.” Inyawatna iti daytoy a mayordomo ti “isuamin a sanikuana,” agraman ti trabaho a pannakaikasaba ti Pagarian.​—Lucas 12:42-44; Mateo 24:14, 45.

² Kinuna ni apostol Pedro nga amin a Kristiano mayordomoda ti di kaikarian a kinamanangngaasi ti Dios a nayebkas iti nagduduma a wagas. Tunggal Kristiano adda maitutop a lugarna a dita maannongna ti matalek a kinamayordomona. (1 Pedro 4:10) Dagiti nadutokan a Kristiano a panglakayen mayordomoda, ket maibilang kadakuada dagiti agdaldaliasat a manangaywan. (Tito 1:7) Kasanot’ rumbeng a panangmatmat kadagitoy nga agdaldaliasat a panglakayen? Ania dagiti galad ken kalat a masapul nga ikutanda? Ket kasanoda a maaramidan ti ad-adu a pagimbagan?

Panagyaman Kadagiti Serbisioda

3. Apay a dagiti agdaldaliasat a manangaywan makunada a “nasayaat a mayordomo”?

³ Idi sinuratanda ti agdaldaliasat a manangaywan ken ti asawana, kinuna ti maysa a Kristiano a pagassawaan: “Tarigagayanmi nga iyebkas ti panagyamanmi kadagiti amin a panawen ken ayat nga impaayyo kadakami. Kas pamilia, nagunggonaankami unay kadagiti amin a pammaregta ken balakadyo. Ammomi a masapul nga itultuloymi ti rumang-ay iti naespirituan, ngem buyogen ti tulong ni Jehova ken kadagiti kakabsat a kas kadakayo, mapalaka dagiti rigat ken parikut.” Kadarato dagiti kastoy nga ebkas, ngamin dagiti agdaldaliasat a manangaywan ipakatda ti personal nga interes kadagiti kapammatianda, no kasano a ti naimbag a mayordomo asikasuenna a nalaing dagiti kasapulan ti sangakabbalayan. Dadduma dagidiay karkarna a pumapalawag. Adu dagidiay nasaguday iti trabaho a panangasaba, ket dagiti met dadduma agdinamag ti kinabara ken asida. Gaput’ panangpatanor ken panangusarda iti kakasta a sagut bayat nga agserbida kadagiti sabali, dagiti agdaldaliasat a manangaywan maitutop a maawaganda “nasayaat a mayordomo.”

4. Ania a saludsod ti amirisentay itan?

⁴ “Ti sapsapulen kadagiti mayordomo ket tao a matalek,” insurat ni apostol Pablo. (1 Corinto 4:2) Ti panagserbi kadagiti pada a Kristiano iti nagduduma a kongregasion iti linawas ket nagpaiduma ken naragsak a pribilehio. Nupay kasta, nadagsen met dayta a responsabilidad. Kasano, ngarud, a simamatalek ken sibaballigi nga annongen dagiti agdaldaliasat a manangaywan ti kinamayordomoda?

Sibaballigi nga Annongenda ti Kinamayordomoda

5, 6. Apay a ti sikakararag a panagtalged ken Jehova importante unay iti biag ti agdaldaliasat a manangaywan?

⁵ Nesesita ti sikakararag a panagtalged ken Jehova tapno agballigi a mayordomo dagiti agdaldaliasat a manangaywan. Gapu iti eskediul ken adu a responsabilidadda, no dadduma kasla mautoyanda. (Idiligyo iti 2 Corinto 5:4.) Gapuna masapul nga agtignayda a maitunos iti kanta ni salmista a David: “Iyallatiwmo ta awitmo ken Jehova, ket saranayennakanto. Dinanto ipalubos a magaraw ti nalinteg.” (Salmo 55:22) Makaliwliwa pay, dagiti sao ni David: “Bendito ni Jehova, nga inaldaw nga imetenna ti awittayo.”​—Salmo 68: 19, NW.

⁶ Nangalaan ni Pablo ti pigsa tapno matamingna dagiti naespirituan a responsabilidadna? “Ta kadagiti amin a bambanag addaanak iti bileg gapu iti daydiay mangted kaniak iti pannakabalin,” insuratna. (Filipos 4:13) Wen, ni Jehova a Dios isut’ Gubuayan ti pigsa ni Pablo. Umarngi met, imbalakad ni Pedro: “No ti asinoman agserbi, agserbi koma a kas agpampannuray iti bileg nga ipaay ti Dios; tapno kadagiti isuamin a bambanag maipadayag koma ti Dios baeten ken Jesu-Kristo.” (1 Pedro 4:11) Maysa a kabsat a nagserbi kas agdaldaliasat a manangaywan iti adu a tawen impaganetgetna ti kinanasken ti panagtalged iti Dios, a kunana: “Naynay nga agpannuraykayo ken Jehova iti panangtaming kadagiti problema, ken agpatulongkayo iti organisasionna.”

7. Kasano a masapul ti kinabalanse iti trabaho ti agdaldaliasat a manangaywan?

⁷ Masapul ti naballigi nga agdaldaliasat a manangaywan ti kinabalanse. Kas kadagiti dadduma a Kristiano, ikagumaanna a “siguraduen dagiti napatpateg a bambanag.” (Filipos 1:10)a No dagiti lokal a panglakayen adda parikutda maipapan iti maysa a banag, nainsiriban no makiumanda iti bumisbisita a manangaywan ti sirkito. (Proverbio 11:14; 15:22) Di pagduaduaan, dagiti balanse a pammaliiwna ken dagiti Nainkasuratan a balakadna makatulongdanto unay bayat nga itultuloyto dagiti panglakayen a tamingen dayta a banag inton panawannan ti kongregasion. Umarngi kadagita a kapanunotan, imbaga ni Pablo ken Timoteo: “Dagiti bambanag a nangngegmo kaniak buyogen ti pammatalged dagiti adu a saksi, dagitoy a bambanag italekmo kadagiti matalek a lallaki, isuda a makaanayto metten a kualipikado a mangisuro kadagiti sabsabali.”​—2 Timoteo 2:2.

8. Apay a nesesita ti panagadal ti Biblia, panagsirarak, ken panagmennamenna?

⁸ Ti panagadal iti Kasuratan, panagsirarak, ken panagmennamenna kasapulan tapno maipaay dagiti umno a balakad. (Proverbio 15:28) Kinuna ti maysa a manangaywan ti distrito: “No makimitingkami kadagiti panglakayen, saankami a bumdeng a mangadmitir a dikam ammo ti sungbat ti maysa a saludsod.” Ti panangikagumaan nga alaen “ti panunot ni Kristo” iti maysa a problema isut’ tumulong tapno maited dagiti balakad a naibatay iti Biblia a mangtulong kadagiti dadduma a makitunos iti pagayatan ti Dios. (1 Corinto 2:16) No dadduma kasapulan ti agdaldaliasat a manangaywan ti agsurat iti Watch Tower Society tapno paiwanwan. Agpapan pay kasta, ti pammati ken Jehova ken ayat iti kinapudno napatpateg nga amang ngem iti impresion wenno panagyablat iti sao. Imbes nga immay a buyogen “ti kinamanaglablabes iti panagsasao wenno iti sirib,” inrugi ni Pablo ti ministeriona idiay Corinto “a sikakapuy ken sibubuteng ken buyogen iti kasta unay a panagpigerger.” Daytoy kadi ti namagbalin kenkuana a nakapuy? Maisupadi ketdi, timmulong dayta kadagiti taga-Corinto a mamati, “saan nga iti sirib dagiti tattao, no di ket iti pannakabalin ti Dios.”​—1 Corinto 2:1-5.

Dadduma Pay a Nesesita a Galad

9. Apay a kasapulan dagiti agdaldaliasat a panglakayen ti empatia?

⁹ Ti empatia tumulong kadagiti agdaldaliasat a manangaywan a mangragpat kadagiti naimbag a resulta. Indagadag ni Pedro kadagiti amin a Kristiano ti “pannakipagmaymaysa iti rikna,” wenno agbalin a “mannakipagrikna.” (1 Pedro 3:8, footnote iti Ingles) Maysa a manangaywan ti sirkito nautobna a masapul ‘nga interesadoka kadagiti amin [a kameng] ti kongregasion ken pudpudno nga atentiboka.’ Iti kasta met la a rikna, insurat ni Pablo: “Makipagrag-okayo kadagiti tattao nga agrag-o; makipagsangitkayo kadagiti tattao nga agsangit.” (Roma 12:15) Ti kasta a kababalin tignayenna dagiti agdaldaliasat a manangaywan nga igaedda a tarusan dagiti problema ken sirkumstansia dagiti kapammatianda. Iti kasta makaitedda kadagiti makapabileg a Nainkasuratan a balakad a pudpudno a naimbag ti maibungana no la ket mayaplikar. Maysa a manangaywan ti sirkito nga agdindinamag ti pannakipagriknana naawatna daytoy a surat manipud kongregasion iti asideg ti Turin, Italia: “No kayatmo ti agbalin a makapainteres, agintereska; no kayatmo ti agbalin a makaay-ayo, mangay-ayoka; no kayatmo ti maayat, agayatka; no kayatmo ti matulongan, sidadaanka a tumulong. Daytoy ti naadalmi kenka!”

10. Aniat’ nasao dagiti manangaywan ti sirkito ken distrito maipapan iti kinapakumbaba, ket aniat’ ulidan nga inted ni Jesus maipapan itoy?

¹⁰ Ti panagbalin a napakumbaba ken nalaka nga asitgan tumulong kadagiti agdaldaliasat a manangaywan tapno ad-adut’ magapuananda. Napaliiw ti maysa a manangaywan ti sirkito: “Napateg unay ti panangtaginayon iti napakumbaba a kababalin.” Pakdaaranna dagiti kabbaro nga agdaldaliasat a manangaywan: “Diyo ipalubos ti bagiyo a maimpluensiaan kadagiti kakabsat a nabaknang gapu iti mabalin a maipaayda kadakayo, ket saan laeng koma a dagita ti gayyemenyo, no di ket agporsegikayo a kanayon a makilangen kadagiti sabsabali nga awan idumdumayo.” (2 Cronicas 19:6, 7) Ket ti pudno a napakumbaba nga agdaldaliasat a manangaywan saan a napalalo ti panangmatmatna iti kinapategna kas pannakabagi ti Sosiedad. Maikanatad nga inkomento ti maysa a manangaywan ti distrito: “Agpakumbabakayo ket situtulokkay nga umimdeng kadagiti kakabsat. Nalakakay koma a maasitgan a naynay.” Kas katan-okan a tao a nagbiag pay laeng, pinagdudukot koma ni Jesu-Kristo ti rikrikna dagiti tattao, ngem napakumbaba unay ken nalaka nga asitgan nga uray ubbing dida alusiisen iti saklangna. (Mateo 18:5; Marcos 10:13-16) Kayat dagiti agdaldaliasat a manangaywan a dagiti ubbing, tin-edyer, ubanan​—kinapudnona asinoman ken isuamin a kameng ti kongregasion​—a di koma bumdeng nga umasideg kadakuada.

11. No kasapulan dayta, aniat’ mabalin nga epekto ti panagpadispensar?

¹¹ Siempre, “maitibkoltay amin iti adu a daras,” ket awan agdaldaliasat a manangaywan a di agerrado. (Santiago 3:2) No agkamalida, ti napasnek a panagpadispensar mangted kadagiti dadduma a panglakayen iti ulidan ti kinapakumbaba. Sigun iti Proverbio 22:4 (NW), “ti pagbanagan ti kinapakumbaba ken ti [managraem a] buteng ken Jehova isu ti kinabaknang ken dayag ken biag.” Ket saan aya a masapul nga amin nga adipen ti Dios ‘sipapakumbaba a makipagnada iti Diosda’? (Mikias 6:8, NW, 1960 Edition) Idi naisaludsod no aniat’ maibalakadna iti kabbaro nga agdaldaliasat a panglakayen, inkomento ti maysa a manangaywan ti sirkito: “Napalalo a raemem ken padayawam amin a kakabsat, ket ibilangmo ida a nalalaing ngem sika. Adut’ masursurom kadagiti kakabsat. Agpakumbabaka. Agbalinka a natural. Saanka a naangin.”​—Filipos 2:3.

12. Apay a napateg unay ti kinaregta iti Nakristianuan a ministerio?

¹² Ti kinaregta iti Nakristianuan a ministerio mangnayon ti puersa iti sasao ti agdaldaliasat a manangaywan. Kinapudnona, no isuda ken baketna ti mangipakitat’ naregta nga ehemplo iti trabaho a panagebanghelio, dagiti panglakayen, dagiti assawada, ken ti intero a kongregasion maparegtada a mangipakita iti kinaregta iti ministerioda. “Agregtaka iti serbisio,” indagadag ti maysa a manangaywan ti sirkito. Innayonna: “Natakuatak a, kaaduanna, no naregregta ti kongregasion iti ministerio, basbassit ti problemada.” Kinuna pay ti sabali a manangaywan ti sirkito: “Mamatiak a no dagiti panglakayen kaduaenda dagiti kakabsat idiay tay-ak ket tulonganda ida a mangtagiragsak iti ministerio, agresultanto daytoy iti natalna nga isip ken ti kadaklan a pannakapnek iti panagserbi ken Jehova.” Ni apostol Pablo ‘nagurnong iti kinatured tapno sawenna ti naimbag a damag ti Dios kadagiti taga-Tesalonica a buyogen ti kasta unay a pannakidangdangadang.’ Isu met la a silalagipda iti panagbisbisita ken panangaskasabana ket mail-iliwda kenkuana!​—1 Tesalonica 2:1, 2; 3:6.

13. Aniat’ laglagipen ti agdaldaliasat a manangaywan no kaduaenna dagiti padana a Kristiano idiay tay-ak ti serbisio?

¹³ No kaduaenna dagiti padana a Kristiano iti tay-ak ti ministerio, sipapanunot koma ti agdaldaliasat a manangaywan kadagiti sirkumstansia ken limitasionda. Uray pay makatulong dagiti singasingna, ammona nga adda dagidiay agnernerbios no mangasabada a kadua ti eksperiensiado a panglakayen. Kadagiti dadduma a kaso, no kasta, napatpateg ti pammaregta ngem ti balakad. No kuyogenna dagiti agibumbunannag wenno payunir iti panagadal iti Biblia, nalabit kaykayatda no isu ti mangikondukta. Ad-adda a masursuroda ti sumagmamano a pangparang-ayanda iti wagas ti panangisuroda.

14. Apay a makuna a dagiti naregta nga agdaldaliasat a manangaywan maparayrayda ti kinaregta kadagiti sabali?

¹⁴ Dagiti naregta nga agdaldaliasat a manangaywan parayrayenda ti kinaregta dagiti sabali. Maysa a manangaywan ti sirkito idiay Uganda linasatna ti napuskol a kabakiran iti maysa nga oras tapno kaduaenna ti maysa a kabsat a ti iyad-adalanna iti Biblia nabannayat ti panagrang-ayna. Idi magmagnada nagtudo ti nakapigpigsa ket narusepda idi nakadanonda. Idi a daytoy a pamilia ti innem a katao naammuanda a ti sangailida ket agdaldaliasat a manangaywan, nasdaawda unay. Ammoda a dagiti ministro ti simbaanda dida pulos ipakita ti kasta a panaginteres iti arban. Idi sumuno a Domingo, damoda unay ti nakigimong ket inyebkasda ti tarigagayda nga agbalin a Saksi ni Jehova.

15. Ania a nagsayaat a kapadasan ti tinagiragsak ti naregta a manangaywan ti sirkito idiay Mexico?

¹⁵ Idiay Oaxaca a probinsia ti Mexico, adda manangaywan ti sirkito nga inkarigatanna ti banag a di ninamnama nga aramidenna. Inyurnosna ti sumangbay idiay pagbaludan iti uppat a rabii tapno mabisitana ti grupo dagiti pito a balud a nagbalin nga agibumbunannag iti Pagarian. Iti unos ti sumagmamano nga aldaw kinuyogna dagitoy a balud bayat a nangasabada iti kada selda ken nangyadalda iti Biblia. Gaput’ panaginteresda, dadduma ti inyadalanda inggat’ ngalay ti rabii. “Idi nagngudon ti bisita, dagiti balud ken siak aglaplapusanan ti rag-omi kas resulta ti panagpipinnaregtami,” insurat daytoy naregta a manangaywan ti sirkito.

16. Apay a makagunggona unay no ipaay dagiti agdaldaliasat a manangaywan ken dagiti assawada ti pammaregta?

¹⁶ Ikagumaan dagiti agdaldaliasat a manangaywan ti mangparegta. Idi binisita ni Pablo dagiti kongregasion ti Macedonia, ‘pinaregtana ida iti nawadwad a sao.’ (Aramid 20:1, 2) Dagiti sasao a pammaregta makatulongda unay a mangiturong nga agpadpada kadagiti agtutubo ken natataengan kadagiti naespirituan a kalat. Iti maysa a dakkel a sanga nga opisina ti Watch Tower Society, impalgak ti maysa nga impormal a surbey a dagiti manangaywan ti sirkito pinaregtada ti gistay 20 porsiento kadagiti boluntario tapno sumrekda iti amin-tiempo a serbisio. Gaput’ nasayaat nga ehemplona kas amin-tiempo a mangiwaragawag iti Pagarian, ti asawa ti agdaldaliasat a manangaywan dakkel met a gubuayan ti pammaregta.

17. Aniat’ makuna ti maysa a lakayen a manangaywan ti sirkito maipapan iti pribilehiona a tumulong kadagiti sabali?

¹⁷ Dagiti natataengan ken malmaldaangan ad-adda a kasapulanda ti pammaregta. Nagsurat ti maysa a lumakayen a manangaywan ti sirkito: “Ti paset ti trabahok a gubuayan ti aglaplapusanan a rag-o isut’ pribilehio a mangbadang kadagiti inaktibo ken dagidiay lumuplupoyen a kameng ti arban ti Dios. Adda naisangsangayan a kayulogan kaniak ti sasao ti Roma 1:11, 12, mientras maparegta ken mapakiredak unay bayat nga ‘iburayko ti sumagmamano a naespirituan a sagut kadakuada tapno mapatibkerda.’”

Gunggona ti Narag-o a Trabahoda

18. Ania dagiti Nainkasuratan a kalat dagiti agdaldaliasat a manangaywan?

¹⁸ Dagiti agdaldaliasat a manangaywan napasnek ti panaginteresda a tumulong kadagiti kapammatianda. Kayatda a pabilgen dagiti kongregasion ken paregtaen ida iti naespirituan. (Aramid 15:41) Adda agdaldaliasat a manangaywan nga igaedna “nga itden ti pammaregta, mangipaay ti bang-ar, ken patanorenna ti tarigagay a mangitungpal iti ministerio ken agtultuloy nga agbiag a maitunos iti kinapudno.” (3 Juan 3) Ti sabali ikagumaanna a palagdaen ti pammati dagiti kapammatianna. (Colosas 2:6, 7) Laglagipenyo a ti agdaldaliasat a manangaywan maysa a “pudpudno a kasinnangol,” saan ket a mangituray iti pammati dagiti sabali. (Filipos 4:3; 2 Corinto 1:24) Ti bisitana maysa nga okasion ti pammaregta ken kanayonan nga aktibidad, agraman gundaway ti bagi dagiti panglakayen a mangrepaso kadagiti nagrang-ayan ken mangamiris kadagiti masakbayan a kalat. Babaen ti sasao ken ehemplona, dagiti agibumbunannag ti kongregasion, dagiti payunir, ministerial nga ad-adipen, ken papanglakayen manamnamadat’ pannakapabilegda ken maparayrayda para iti trabaho iti masanguanan. (Idiligyo ti 1 Tesalonica 5:11.) Gapuna, suportaranyo a naimpusuan ti ibibisita ti manangaywan ti sirkito, ken gundawayanyo a naan-anay ti serbisio nga ipaay ti manangaywan ti distrito.

19, 20. Kasano a nagunggonaan dagiti agdaldaliasat a manangaywan ken dagiti assawada gaput’ matalek a serbisioda?

¹⁹ Dagiti agdaldaliasat a manangaywan ken dagiti assawada magunggonaanda a sibabaknang gapu iti matalek a serbisioda, ket agkompiansada a bendisionanto ni Jehova ida gaput’ naimbag nga ar-aramidda. (Proverbio 19:17; Efeso 6:8) Da Georg ken Magdalena ket agassawa nga aduan edad a nagserserbi iti adu a tawen iti trabaho a panagdaliasat. Idi kombension sadi Luxembourg, adda immasideg ken Magdalena a daytoy kinasabaanna nasurok a 20 a tawenen ti napalabas. Ti panaginteres daytoy a babai a Judio iti kinapudno rimmayray gaput’ literatura ti Biblia nga imbati idi ni Magdalena kenkuana, ket idi agangay nagpabautisar. Ni Georg inasitgan met ti sabali a kabsat a babai a malaglagipna ti ibibisitana idiay balayda agarup 40 a tawenen ti napalabas. Ti narayray a panangidatagna iti naimbag a damag idi agangay isut’ nangiturong kenkuana ken iti lakayna a mangawat iti kinapudno. Siempre, aglaplapusanan ti rag-o da George ken ni Magdalena.

²⁰ Ti nabunga a ministerio ni Pablo idiay Efeso nangyeg ti rag-o kenkuana ken mabalin a nangtignay kenkuana a mangadaw iti sasao ni Jesus: “Ad-adu ti kinaragsak iti panangted ngem iti panangawat.” (Aramid 20:35) Tangay ti trabaho a panagdaliasat saklawenna ti naynay a panangted, dagidiay makiramraman dita masagrapda ti ragsak, nangruna no maammuanda dagiti nasayaat a resulta ti bannogda. Adda manangaywan ti sirkito a timmulong iti maup-upay a panglakayen a kastoy ti suratna: “Maysaka a dakkel a ‘katulongan iti pannakapabileg’ ti naespirituan a biagko​—nupay dimo ammo. . . . Dimonto pulos naan-anay a maammuan no kasanot’ kawadwad ti naitulongmo iti moderno-aldaw nga Asaf, a ‘ti saksakana gistay naigalis.’”​—Colosas 4:11; Salmo 73:2.

21. Apay a kunaenyo a ti 1 Corinto 15:58 agaplikar kadagiti aktibidad dagiti agdaldaliasat a manangaywan?

²¹ Adda lakayen a Kristiano a nagserserbi iti sirkito iti adu a tawen a kaykayatna nga utoben ti 1 Corinto 15:58, a dita indagadag ni Pablo: “Agbalinkayo a natibker, di magaraw, a kankanayon nga aduankayo ti aramiden iti trabaho ti Apo, nga ammoyo a ti panagbannogyo saan nga ubbaw mainaig iti Apo.” Dagiti agdaldaliasat a manangaywan talaga nga aduanda ti asikasuen iti trabaho ti Apo. Ket anian a yamantayo ta agserserbida a sirarag-o kas matalek a mayordomo ti di kaikarian a kinamanangngaasi ni Jehova!

[Footnote]

Kasanoyo a Sungbatan?

◻ Apay a dagiti agdaldaliasat a manangaywan mamatmatanda kas “nasayaat a mayordomo”?

◻ Ania dagiti sumagmamano a banag a makatulong kadagiti manangaywan ti sirkito ken distrito tapno ad-adu a pagimbagan ti magapuananda?

◻ Apay a ti kinapakumbaba ken kinaregta importanteda unay kadagidiay agdaldaliasat?

◻ Ania dagiti nasayaat a kalat dagiti agdaldaliasat a manangaywan?

[Ladawan iti panid 16]

Ikagumaan dagiti agdaldaliasat a manangaywan a paregtaen dagiti kapammatianda

[Dagiti ladawan iti panid 17]

Dagiti agtutubo ken aduan edad agpadpada a magunggonaanda iti pannakikaduada kadagiti agdaldaliasat a manangaywan ken dagiti assawada

[Ladawan iti panid 18]

Ti naregta a ministerio ti agdaldaliasat a manangaywan patanorenna ti kinaregta kadagiti sabali