Usarenyo a Naimbag ti Oras a Nailatang Para iti Ministerio
1 Pudno a nakaad-adu ti masapul nga iringpas iti ministeriotayo, ket bassiten ti nabatbati a tiempo. (Juan 4:35; 1 Cor. 7:29) Babaen ti nasayaat a panangorganisar ken nasakbay a panangiplano kadagiti aramidentayo, mausartayo a naimbag ti tiempo nga inlatangtayo para iti ministerio.
2 Agsaganakayo: No tumabunokayo iti taripnong sakbay ti panangasaba, siguraduenyo nga adda dagiti kasapulanyo a literatura ken addan ti nakasagana a presentasionyo. Kalpasan a maserraan ti taripnong babaen ti kararag, mapankayo a dagus iti teritoriayo. No aramidenyo daytoy ken dagiti kakaduayo, adu ti maaramidanyo iti oras a nailatang para iti panangasaba.
3 No nadutokankayo a mangikondukta iti taripnong sakbay ti panangasaba, irugiyo dayta iti eksakto nga oras. Ababa laeng koma dayta ken saan a lumbes iti 10 agingga iti 15 a minuto. Sakbay nga ingudoyo ti taripnong, siguraduenyo nga ammon ti tunggal maysa no sadino ti teritoria ken no siasino ti kaduada.
4 Iti Ministerio: Kalpasan ti taripnong sakbay ti panangasaba, dikay agtaktak no di ket mapankayon a dagus iti teritoria aginggat’ mabalin. No planoyo ti pumanaw a nasapa iti teritoria, nalabit mangyurnoskayo iti bukodyo a pagluganan tapno saan a masapul a pumanaw a nasapa dagiti kakaduayo. No mangaskasabakayo a kadua ti grupo, agbalinkayo a nakonsiderar kadagiti sabsabali a mabalin a mangur-uray kadakayo a mangileppas iti saritaan. Mabalin a ramanen dayta ti nataktika a panagpakada iti maysa a tao a mannakisuppiat wenno panangyurnos iti isasarungkar iti siasinoman a mangipakita iti interes.—Mat. 10:11.
5 Iti panagsarungkaryo, maliklikanyo ti agkarabiahe babaen ti isasarungkaryo kadagidiay adda iti maymaysa a lugar sakbay nga umakarkayo iti sabali. Mabalin nga awaganyo dagidiay sarungkaranyo tapno masiguradoyo nga addada iti pagtaenganda. (Prov. 21:5) No namnamaenyo a napaut ti panagsarungkaryo, dagiti kakaduayo ket mabalin a mangasaba iti asideg wenno agsarungkarda met.
6 Agbibiagtayo iti tiempo ti nasaknap a naespirituan a panagani. (Mat. 9:37, 38) Mabiiten nga agpatingga ti trabaho. Gapuna, usarentay koma a naimbag ti oras nga inlatangtayo para iti ministerio.