“Ibaklayyo ti Sangolko”
1 Iti lubong a napno kadagiti pakaringgoran ken pakadanagan, naaddaantayo iti napaypayso a bang-ar babaen ti panangipangagtayo iti nabara nga awis ni Jesus nga ibaklaytayo ti sangolna ket makasaraktayo iti gin-awa. (Mat. 11:29, 30) Ti panangibaklay iti sangol ti panagbalin nga adalan kaipapananna ti pannakipaset iti narigat ngem makapabang-ar a trabaho. Ramanen dayta ti panangikasaba iti naimbag a damag maipapan iti Pagarian ken panangtulong kadagiti sabsabali a maaddaan iti gin-awa iti sidong ti nalanay a sangol ni Jesus.—Mat. 24:14; 28:19, 20.
2 Gin-awa nga Itden ti Ministerio: Saan a kiniddaw ni Jesus kadagiti pasurotna a nayonanda dagiti bukodda nga awit kadagiti ipapaawitna kadakuada. Inawisna ida a mangisukat iti nadagsen nga awitda iti nalag-an nga awitna. Saantayon a maringgoran kadagiti pakadanagan ken kinaawan namnama iti daytoy a sistema ti bambanag ken saantayon nga agbannog maipaay kadagiti pagduaduaan a kinabaknang. (Luc. 21:34; 1 Tim. 6:17) Nupay okupado ken masapul nga agtrabahotayo tapno magun-odtayo dagiti kasapulantayo iti inaldaw, ipamaysatayo ti biagtayo iti panagdaydayaw iti Dios. (Mat. 6:33) Kanayon a makapabang-ar saan ket a makapadagsen, ti ministeriotayo no taginayonentayo ti umiso a panangmatmat iti no ania ti kapatgan.—Fil. 1:10.
3 Gagangay a maragsakantayo a mangisarsarita iti aniaman a banag a napateg iti pusotayo. (Luc. 6:45) Dagiti amin a Kristiano ipatpategda ni Jehova ken dagiti inkarina a bendision nga itden ti Pagarian. Gapuna, anian a makapabang-ar nga isarsarita ti maipapan iti “naimbag a damag ti naimbag a bambanag” ket lipatentayo pay laeng dagiti inaldaw a pakaringgorantayo bayat a makiramramantayo iti ministerio! (Roma 10:15) Siempre, no ad-adda nga aramidentayo ti maysa a banag, ad-adda met a lumaingtayo ken dakdakkel a ragsak ti masagraptayo. Gapuna, ad-adda a mabang-arantayo no ad-adu nga oras ti busbosentayo iti ministerio, no la ket ta kabaelantayo. Ken anian a makapabang-ar no ipangag dagiti tattao ti ikaskasabatayo! (Ara. 15:3) Uray no adda dagidiay saan nga interesado wenno adda dagidiay bumusor kadatayo, ti ministerio ket makapagin-awa latta iti naespirituan no laglagipentayo a kaay-ayo ni Jehova dagiti panagreggettayo ken ti aniaman a positibo a resulta ket maigapu iti pamendisionna.—Ara. 5:41; 1 Cor. 3:9.
4 No patgantayo ti awis ni Jesus, maaddaantayo iti pribilehio a makipagserbi kenkuana kas Saksi ni Jehova. (Isa. 43:10; Apoc. 1:5) Awanen ti ad-adda a makapagin-awa ngem iti dayta!