Balbalintuagentayo Dagiti Natibker ti Pannakasarikedkedna a Bambanag
1 Sinigsiglon a binulsek ni Satanas ti isip ken puso ti adu a tattao babaen ti panangallilaw ken dagiti palso a pannursuro. Pinagbalinna a nasaknap dagiti doktrina a kas iti Trinidad, imortalidad ti kararua, ken ti umap-apuy nga impierno. Inimpluensiaanna dagiti tattao tapno pagduaduaanda ti kaadda ti Namarsua ken ti kina-autentiko ti Biblia. Ti panangidumduma iti puli ken nasionalismo ket sabali pay a bangen a mangigawgawid kadagiti tattao a mangawat iti kinapudno. (2 Cor. 4:4) Kasanotayo a maibalintuag dagiti kasta a natibker ti pannakasarikedkedna a pammati?—2 Cor. 10:4, 5.
2 Nairaman ti Emosion: Dagiti nabayagen a narelihiosuan a patpatien masansan a ramanenna ti emosion ti maysa a tao. Adda dagiti tattao a mangsalsalimetmet iti di umiso a pammati sipud kinaubingda. Tapno matulongantayo ida, nasken a makisaritatayo iti wagas a mangiparangarang iti panagraem kadagiti kapanunotanda.—1 Ped. 3:15.
3 Maipakitatayo ti panagraemtayo kadagiti kasta a tattao babaen ti panangipalubostayo kadakuada a mangilawlawag no ania ti patpatienda ken no apay. (Sant. 1:19) Nalabit mamatida nga adda sumina a kararua gapu ta adda natay a patpatgenda ket il-iliwenda a makita manen. Wenno saan, mabalin a ramrambakanda dagiti piesta opisial gapu ta kaay-ayoda dagiti gundaway a makapaglalangenda a sangapamiliaan. No denggentayo dagiti kapanunotanda, matarusantayo ti kaririknada, iti kasta makasabaantayo ida iti epektibo a pamay-an.—Prov. 16:23.
4 Tuladenyo ni Jesus: Nangipaay ni Jesus iti nagsayaat nga ulidan iti wagas a panangsungbatna kadagiti saludsod ti lalaki a nalaing iti Linteg. Saan a nangted ni Jesus kadagiti direkta a sungbat, a mabalin a linaksid koma ti lalaki gapu ta napateg unay kenkuana dagiti patpatienna. Imbes ketdi, inusar ni Jesus ti Kasuratan, sinaludsodna no ania ti makuna ti lalaki, ken tinulonganna a makagteng iti umiso a konklusion babaen ti panangusarna iti ilustrasion.—Luc. 10:25-37.
5 Ti Sao ti Dios matulonganna dagiti tattao a mangiwaksi kadagiti palso a narelihiosuan a patpatienda. (Heb. 4:12) No siaanus a danonentayo ti puso dagiti tattao, matulongantayo ida a mangtallikud kadagiti di umiso a sursuro ket awatenda ti kinapudno a mangwayawaya kadakuada.—Juan 8:32.