Nasken nga Agkararag Dagiti Kristiano a Ministro
1. Ania ti kasapulan tapno maitungpaltayo ti ministeriotayo?
1 Saantayo a maitungpal ti ministeriotayo a bukbukodtayo. Ipaayannatayo ni Jehova iti bileg a mangaramid iti dayta a trabaho. (Fil. 4:13) Us-usarenna dagiti anghelna a tumulong kadatayo a mangbirok kadagiti marakarnero a tattao. (Apoc. 14:6, 7) Ni Jehova ti mangpadakkel kadagiti bin-i ti kinapudno nga immula ken sinibugantayo. (1 Cor. 3:6, 9) Kas Kristiano a ministro, anian a nagpateg nga agpannuraytayo iti nailangitan nga Amatayo babaen ti kararag!
2. Ania dagiti mabalintayo nga ikararag?
2 Agpaay Kadatayo: Masapul nga agkararagtayo tunggal mapantayo mangasaba. (Efe. 6:18) Ania ti sumagmamano a bambanag nga ikararagtayo? Mabalintayo nga ikararag a maaddaantayo iti positibo a kababalin iti teritoriatayo ken dumawattayo iti tured. (Ara. 4:29) Mabalin a kiddawentayo ken Jehova nga iturongnatayo kadagiti napudno ti panagpuspusona a mabalintayo nga iyadalan iti Biblia. No agsaludsod ti bumalay, mabalin a siuulimek nga agkararagtayo iti apagbiit nga agpatulong ken Jehova tapno makaipaaytayo iti umiso a sungbat. (Neh. 2:4) Mabalintayo met a kiddawen ti sirib tapno agtultuloy a maipangpangrunatayo ti ministeriotayo. (Sant. 1:5) Kanayonanna, maay-ayo ni Jehova no iyebkastayo met ti panagyamantayo iti pribilehiotayo kas ministrona.—Col. 3:15.
3. Kasano a ti panangikararag kadagiti sabsabali ket makatulong iti trabaho a panangasaba?
3 Agpaay iti Sabsabali: Masapul met nga ‘ikararagantayo ti maysa ken maysa,’ nga inaganantayo pay ketdi ti kapammatiantayo no maitutop. (Sant. 5:16; Ara. 12:5) Limitado kadin ti maar-aramidanyo iti trabaho a panangasaba gapu ta nakapuyen ti salun-atyo? No kasta, ikararaganyo dagiti nasalun-at a kapammatianyo. Pulos a diyo tagilag-anen ti maaramidan ti kararagyo agpaay kadakuada! Maitutop met nga ikararagantayo dagiti agtuturay tapno palubosanda ti trabaho a panangasaba iti kasta, ‘maitultuloy dagiti kakabsattayo ti agbiag a natalinaay ken naulimek.’—1 Tim. 2:1, 2.
4. Apay a nasken a reggetantayo ti agkararag?
4 Dakkel a trabaho ti panangikasaba iti naimbag a damag iti intero a mapagnaedan a daga. No ‘reggetantayo ti agkararag,’ maitungpaltayo daytoy a trabaho iti tulong ni Jehova.—Roma 12:12.