Tulong Kadagiti Pamilia

1. Kasano a nabenepisiaran dagiti pamilia nga Israelita iti linawas a panangngilinda iti Sabbath?

¹ Idi, ti panangngilin iti Sabbath ket maysa a naayat a probision manipud ken Jehova a pakagunggonaan dagiti pamilia. Panawen dayta tapno isardeng dagiti Israelita ti inaldaw a trabahoda ket utobenda ti kinaimbag ni Jehova ken ti relasionda kenkuana. Dayta ti gundaway dagiti nagannak a mangyukuok iti Linteg iti puso dagiti annakda. (Deut. 6:6, 7) Ti Sabbath ipaayanna dagiti adipen ni Jehova iti panawen iti tunggal lawas a mangipamaysa iti espiritualidadda.

2. Ania ti masursurotayo iti Sabbath maipapan ken Jehova?

² Siempre, saanen nga ipapaalagad ni Jehova kadagiti pamilia ti panangngilin iti Sabbath. Nupay kasta, adda maadaltayo iti dayta a linteg maipapan iti Dios. Isu ket kanayon a maseknan unay iti naespirituan a pagimbagan dagiti adipenna. (Isa. 48:17, 18) Ita, ti maysa a pamay-an nga ipakpakita ni Jehova ti naayat a pannakaseknanna ket babaen ti Panagdaydayaw ti Pamilia iti rabii.

3. Ania ti panggep ti Panagdaydayaw ti Pamilia iti rabii?

³ Ania ti Panggep ti Panagdaydayaw ti Pamilia iti Rabii? Idi Enero 2009, ti Panagadal iti Libro ti Kongregasion ket karamanen a maadal iti rabii a pannakaangay ti Teokratiko nga Eskuelaan ti Panagministro ken ti Gimong ti Serbisio. Ti maysa a rason no apay a naaramid daytoy a panagbalbaliw ket tapno maipaayan dagiti pamilia iti gundaway a mangpabileg iti espiritualidadda babaen ti panangyeskediulda iti maysa a rabii iti tunggal lawas para iti panagdaydayaw ti pamilia. Naiparegta iti tunggal pamilia nga angayenda ti sangapamiliaan a panagadalda iti rabii a dati a maus-usar para iti Panagadal iti Libro ti Kongregasion, no praktikal, ken saanda koma nga agdardaras nga agadal iti Biblia. Kasta met, ibagayda koma dagiti adalenda iti kasapulan ti pamiliada.

4. Masapul kadi a limitaran iti maysa nga oras ti panagadal ti pamilia? Ilawlawagyo.

⁴ Tapno matabunuantayo idi ti Panagadal iti Libro ti Kongregasion, kasapulantayo ti panawen nga agrubbuat, agbiahe, ken dadduma pay. Dayta ti gapuna nga adu kadatayo ti mangbusbusbos iti adu nga oras a tumabuno iti daytoy a gimong a maangay iti maysa nga oras laeng. Gapu iti panagbalbaliw iti eskediul ti gimongtayo, usarentayon daytoy a rabii nga agdaydayaw ken Jehova kas pamilia. No kasta, saan a kasapulan a limitarantayo iti maysa nga oras laeng ti rabii a panagdaydayaw ti pamiliatayo. Imbes ketdi, panunotentayo dagiti kasapulan ken limitasion ti pamiliatayo ket ikeddengtayo no mano nga oras ti busbosentayo.

5. Ti kadi oras para iti panagadal ket masapul a busbosen laeng kas grupo? Ilawlawagyo.

⁵ Masapul Kadi a Busbosen ti Intero nga Oras iti Grupo a Panagadal? Makapagpipinnaregta dagiti agassawa ken dagiti pamilia nga addaan iti annak no pagsasaritaanda a sangsangkamaysa dagiti Nainkasuratan a topiko. (Roma 1:12) Ad-adda a suminged ti pamilia no kasta. Gapuna, ti panangadal iti Kasuratan ti nakaisentruan ti Panagdaydayaw ti Pamilia iti rabii. Nupay kasta, ti tunggal miembro ti pamilia ket mabalin met a mangbusbos iti panawen para iti personal a panagadal. Kas pagarigan, kalpasan ti grupo a panagadal, nalabit agkakadua pay laeng ti pamilia bayat nga itultuloy ti tunggal maysa kadakuada ti agadal a personal. Nalabit ileppasda nga adalen dagiti maadal iti gimong wenno agbasada kadagiti magasin. Dagiti dadduma a pamilia inkeddengda ti saan nga agbuya iti TV iti dayta a rabii.

6. Kasano a maikondukta ti panagadal?

⁶ Kasano nga Ikondukta ti Panagadal? Saan a kasapulan a kanayon a saludsod ken sungbat ti pamay-an a panagadal. Tapno nabiag ken makapainteres ti Panagdaydayaw ti Pamilia iti rabii, adu a pamilia ti addaan iti programa nga umasping iti pannakaikondukta dagiti gimongtayo iti tengnga ti lawas. Bingaybingayenda ti panagadal iti sumagmamano a paset ken iparangda dagita iti nagduduma a pamay-an. Kas pagarigan, mabalin a sangsangkamaysada nga agbasa iti Biblia, agisagana iti sumagmamano a paset ti gimong, ken agensayoda para iti ministerio. Adda sumagmamano a singasing iti panid 6.

7. Ania ti aramiden dagiti nagannak tapno makaparagsak ti panagadalda?

⁷ Ania ti Aramiden Dagiti Nagannak Tapno Makaparagsak ti Panagadalda? Ad-adda a makasursuro ti pamiliayo no naayat ken makaparelaks ti aglawlaw. No dadduma, nalabit agadalkayo iti ruar no nasayaat ti paniempo. Agmeriendakayo no kasapulan. Adda met dagiti pamilia nga agmerienda kalpasan ti panagadalda. Nupay liklikan dagiti nagannak nga ungtan wenno disiplinaen dagiti annakda kabayatan ti panagdaydayaw ti pamiliada, mabalinda ti mangilatang iti sumagmamano a tiempo a mangtaming iti naammuanda a problema wenno saan a nasayaat a kababalin ti anakda. Ngem no sensitibo ti isyu, nasaysayaat a kasaritayo ti anakyo iti sabali a gundaway tapno saan a mabainan iti sango dagiti kakabsatna. Saan koma a makaboring wenno serioso unay ti sangapamiliaan a panagdaydayawyo no di ket iyanninawna koma ti naragsak a Dios a pagdaydayawantayo.—1 Tim. 1:11.

8, 9. Ania dagiti kasapulan nga isagana dagiti ulo ti pamilia?

⁸ Kasano nga Agsagana ti Ulo ti Pamilia? Dakdakkel ti magunggona ti pamilia no kanayon nga agsagana ti ulo ti pamilia para iti sangapamiliaan a panagdaydayawda babaen ti panangikeddengna no ania ti adalenda ken no kasano ti kasayaatan a panangusigda iti dayta. (Prov. 21:5) Nasayaat no agsaludsod ti asawa a lalaki ken ni baketna maipapan iti daytoy. (Prov. 15:22) Dakayo nga ulo ti pamilia, apay a saankayo nga agsaludsod sagpaminsan kadagiti annakyo no ania ti maisingasingda? No aramidenyo dayta, adu ti maammuanyo maipapan kadagiti paginteresan ken pakaseknanda.

⁹ Iti kaaduan a lawas, saan a kasapulan nga adu a panawen ti busbosen ti ulo ti pamilia nga agsagana. Nalabit maragsakan ti pamilia no adda regular nga adalenda iti tunggal lawas, ken saan a kasapulan a kanayon a mangpanunot ti ulo ti pamilia iti baro a programa ti panagadalda. Mabalin a makagunggona no isu ket agsagana kalpasan ti tunggal panagadalda bayat a presko pay laeng iti panunotna dagiti naespirituan a kasapulan ti pamiliana. Dagiti dadduma nga ulo ti pamilia isursuratda iti bassit a nota no ania dagiti adalenda sa ipaskilda dayta iti lugar a nalaka a makita ti pamiliada, kas iti ridaw ti refrigerator. Kas resultana, magagaran ken segseggaan daytoy ti pamiliada ken maaddaanda iti gundaway nga agsagana no kasapulan.

10. Ania ti mabalin nga aramiden dagidiay agmaymaysa a Saksi bayat ti Panagdaydayaw ti Pamilia iti rabii?

¹⁰ No Ngay Agmaymaysaak? No agmaymaysaka, ti Panagdaydayaw ti Pamilia ket mabalinmo nga usaren para iti personal a panagadal. Ti nasayaat a programa a surotem ramanenna ti panagbasa iti Biblia, panagsagana kadagiti gimong, ken panagbasa iti Pagwanawanan ken Agriingkayo! Dagiti dadduma nga agibumbunannag ket adda kanayonan a proyektoda para iti personal a panagadal. No dadduma, mabalinda ti mangawis iti sabali nga agibumbunannag wenno pamilia para iti makapabileg a Nainkasuratan a saritaan.

11, 12. Ania ti sumagmamano a gunggona ti regular a Panagdaydayaw ti Pamilia iti rabii?

¹¹ Ania Dagiti Pagsayaatan ti Regular a Panagdaydayaw ti Pamilia iti Rabii? Dagidiay naimpusuan a makiramraman iti pudno a panagdaydayaw ket ad-adda a suminged ken Jehova. Malaksid iti dayta, dagiti pamilia nga agdaydayaw a sangsangkamaysa ket natibtibker ti relasionda. Insurat ti maysa a pagassawaan maipapan kadagiti bendision a tinagiragsakda: “Kas agassawa a payunir nga awanan annak, kanayon a segseggaanmi ti rabii a panagdaydayaw ti pamiliami. Mariknami a sumingsingedkami nga ad-adda iti tunggal maysa ken iti Nailangitan nga Amatayo. Ita, no makariingkami iti aldaw nga eskediulmi ti agadal, ibagbagami iti tunggal maysa: ‘Agadalta manen inton rabii!’”

¹² Ti urnos a panagdaydayaw ti pamilia iti rabii ket makatulong met kadagiti okupado a pamilia. Kastoy ti insurat ti maysa nga agsolsolo nga ina a regular pioneer ken addaan iti dua nga annak a lallaki: “Saanmi unay idi a maar-aramid ti sangapamiliaan a panagadal. Saan a regular ken agbaliwbaliw dayta gapu ta nabambannogak. Diak nga ammo no kasanok nga iringpas dagiti bambanag. Isu a nagsuratak kadakayo tapno iyebkasko ti napalaus a panagyamanko iti Panagdaydayaw ti Pamilia iti rabii. Regular ken naballigi itan ti sangapamiliaan a panagadalmi ken mabembenepisiarankami.”

13. Ania ti aramidentayo tapno dakkel ti magunggona ti pamiliatayo iti daytoy nga urnos?

¹³ Kas iti Sabbath, ti Panagdaydayaw ti Pamilia iti rabii ket maysa a sagut manipud iti Nailangitan nga Amatayo a makatulong kadagiti pamilia. (Sant. 1:17) Ti naespirituan a gunggona dagiti pamilia nga Israelita ket agpannuray iti wagas a panangusarda iti Sabbath. Umasping iti dayta, ti gunggona a sagrapen ti pamiliatayo ket agpannuray iti panangusartayo iti rabii para iti sangapamiliaan a panagdaydayawtayo. (2 Cor. 9:6; Gal. 6:7, 8; Col. 3:23, 24) No usarenyo a naimbag daytoy nga urnos, mayebkas ti pamiliayo daytoy a kinuna ti salmista: “Ngem no maipapan kaniak, ti iyaadani iti Dios naimbag kaniak. Iti Soberano nga Apo Jehova insaadko ti kamangko.”—Sal. 73:28.

[Blurb iti panid 5]

Saan koma a makaboring wenno serioso unay ti sangapamiliaan a panagdaydayawyo no di ket iyanninawna koma ti naragsak a Dios a pagdaydayawantayo

[Kahon iti panid 6]

IDULINYO

Sumagmamano a Singasing Para iti Panagdaydayaw ti Pamilia iti Rabii

Biblia:

• Basaenyo a sangsangkamaysa ti maysa a benneg ti linawas a panagbasa iti Biblia. No posible, adda maysa a mangbasa iti salaysay sa basaen met dagiti dadduma dagiti sasao ti nagduduma a karakter.

• Idramayo ti maysa a benneg ti panagbasa iti Biblia.

• Dutokanyo ti tunggal miembro ti pamilia a mangbasa a nasaksakbay kadagiti naituding a kapitulo iti Biblia sa mangisuratda iti maysa wenno dua a saludsodda maipapan iti dayta. Kalpasanna, sukimatenyo a sangsangkamaysa ti sungbat dagita a saludsod.

• Linawas a mangisaganakayo iti flash card a nakaisuratan ti maysa a teksto iti Biblia sa ikagumaanyo nga ikabesa ken ilawlawag dayta. Urnongenyo dagita a card sa repasuenyo a linawas tapno makitayo no kasano kaadu a teksto ti malagipyo.

• Denggenyo ti nairekord a pannakaibasa ti Biblia sa surotenyo dayta iti Bibliayo.

Gimong:

• Agsaganakayo a sangapamiliaan para iti maysa a benneg dagiti gimong.

• Ensayuenyo dagiti kanta ti Pagarian a makanta iti sumaganad a lawas.

• No adda miembro ti pamiliayo nga agpaset iti Teokratiko nga Eskuelaan ti Panagministro wenno agdemostra iti Gimong ti Serbisio, pagsasaritaanyo no kasanoda nga iparang dayta, wenno ensayuenyo iti imatang ti pamiliayo.

Dagiti Kasapulan ti Pamilia:

• Adalenyo ti libro nga Iyimtuod ti Agtutubo wenno ti Agsursuroka iti Naindaklan a Mannursuro.

• Ensayuenyo no ania ti aramidenyo kadagiti situasion a mabalin a tumaud iti eskuelaan.

• Agensayokayo, a dagiti nagannak ti agakem kas annak ket dagiti annak ti agakem kas nagannak. Agsukimat dagiti annak maipapan iti maysa a topiko sa ilawlawagda dayta kadagiti dadakkelda.

Ministerio:

• Ensayuenyo dagiti ibagayo inton mangasabakayo iti ngudo ti lawas.

• Pagsasaritaanyo dagiti realistiko a kalat a mabalin nga ipasdek ti pamiliayo tapno ad-adu ti panawenda a makiraman iti ministerio kabayatan ti panawen ti Memorial wenno inton agserra ti klase.

• Ikkanyo iti panawen ti tunggal kameng ti pamiliayo nga agsukimat iti sumagmamano a minuto no kasanoda a sungbatan dagiti sabali a saludsod a mabalin a tumaud iti ministerio sa ensayuenyo dayta.

Kanayonan a Singasing:

• Basaenyo a sangsangkamaysa ti maysa nga artikulo manipud kadagiti kabaruan a magasin.

• Ibagayo iti tunggal kameng ti pamilia a basaenda a nasaksakbay ti artikulo a paginteresanda manipud kadagiti kabaruan a magasin sa isalaysayda dayta.

• Sagpaminsan a mangawiskayo iti maysa nga agibumbunannag wenno agassawa a makiraman iti panagdaydayaw ti pamiliayo iti rabii ken nalabit kaumanyo ida.

• Buyaen ken pagsasaritaanyo ti maysa kadagiti video-tayo.

• Adalenyo a sangapamiliaan ti “Agimtuod Dagiti Agtutubo” wenno ti “Adalen ti Pamilia” manipud iti Agriingkayo!

• Adalenyo ti “Isuroyo Dagiti Annakyo” wenno ti “Para Kadakayo nga Agtutubo” manipud iti Pagwanawanan.

• Basaen ken pagsasaritaanyo ti maysa a paset ti kaudian a Tinawen a Libro wenno ti libro a nairuar iti kaudian a kombension distrito.

• Repasuenyo dagiti tampok ti kombension wenno asamblea a kalkalpas a tinabunuanyo.

• Paliiwenyo dagiti pinarsua ni Jehova sa pagsasaritaanyo no ania dagiti masursurotayo iti dayta maipapan kenkuana.

• Mangaramidkayo iti proyekto, kas iti modelo, mapa, wenno tsart.