Ti Panawen ti Memorial—Gundaway Para iti Ad-adu nga Aktibidad!
1. Apay a tingitingentayo no kabaelantayo a paaduen ti aktibidadtayo kabayatan ti Marso, Abril, ken Mayo?
1 Kabaelanyo kadi nga iyad-adu ti pannakiramanyo iti ministerio kabayatan ti mapaspasungad a panawen ti Memorial? Iti adu a lugar, nasayaat ti panawen kadagiti bulan ti Marso, Abril, ken Mayo. Bakasionto dagiti dadduma nga agibumbunannag, iti man trabaho wenno iti eskuelaan, isu a mabalinda ti makiraman iti ministerio. Mangrugi inton Abril 2, addanto ti espesial a kampaniatayo a mangawis kadagiti interesado a tumabuno iti Memorial inton Abril 17. Kalpasan dayta, ikagumaantayto a patanoren ti interes dagidiay tumabuno ken awisentayo ida a dumngeg iti espesial a palawag a maiparang kabayatan ti lawas ti Abril 25. Wen, adu ti panggapuantayo a mangtingiting no kabaelantayo a paaduen ti aktibidadtayo kabayatan ti Marso, Abril, ken Mayo.
2. Ania ti maysa a nagsayaat a pamay-an a mapalawatayo ti ministeriotayo?
2 Panag-auxiliary Pioneer: Ti maysa a nagsayaat a pamay-an tapno ad-adu ti pannakiramantayo iti ministerio ket babaen ti panag-auxiliary pioneer. Yantangay okupadotayo amin, kasapulan nga agplanotayo a nasaksakbay ken mangaramidtayo kadagiti panagbalbaliw iti eskediultayo. (Prov. 21:5) Nalabit mabalinyo nga itantan pay laeng dagiti dadduma a saan a napateg nga aktibidadyo. (Fil. 1:9-11) Mabalinyo met nga ibaga ti tarigagayyo nga agpayunir kadagiti dadduma a kakongregasionyo tapno maammuanyo no makapag-auxiliary pioneer-da met.
3. Kasano a mayurnos dagiti pamilia a paaduen ti aktibidadda?
3 Iti sumaruno a Panagdaydayaw ti Pamiliayo, nasayaat no pagsasaritaanyo dagiti kalatyo kas pamilia. (Prov. 15:22) No agtitinnulongkayo, nalabit makapag-auxiliary pioneer ti sumagmamano a kameng ti pamiliayo iti maysa wenno ad-adu pay a bulan. Ngem kasano no saanyo a kabaelan nga aramiden daytoy? Mabalin nga iyurnos latta ti pamiliayo a paaduen ti aktibidadyo babaen ti pannakiramanyo iti ministerio iti sumagmamano a rabii wenno ipapautyo ti mangasaba kadagiti ngudo ti lawas.
4. Ania dagiti bendision nga iyeg ti panangpalawatayo iti ministeriotayo kabayatan ti panawen ti Memorial?
4 Ammo ni Jehova dagiti amin nga ar-aramidentayo nga agserbi kenkuana ken ap-apresiarenna dagiti sakripisiotayo. (Heb. 6:10) Makariknatayo iti rag-o gapu iti panagserbitayo ken Jehova ken kadagiti sabsabali. (1 Cron. 29:9; Ara. 20:35) Kabaelanyo kadi a paaduen ti aktibidadyo kabayatan ti panawen ti Memorial, iti kasta matagiragsakyonto ti dakdakkel a rag-o ken bendision?