Pagbalinenyo a Naragsak Daytoy a Panawen ti Memorial
1. Ania ti maysa a pamay-an tapno rumayray ti rag-oyo iti panawen ti Memorial?
1 Kayatyo kadi a rumayray ti rag-oyo bayat ti Marso, Abril, ken Mayo? Ti maysa a pamay-an tapno maaramidyo dayta ket ti panangpalawa iti ministerioyo ken, no kabaelanyo, ag-auxiliary pioneer-kayo. Kasano a mangnayon daytoy iti rag-oyo?
2. Kasano a ti panangpalawa iti ministerio parayrayenna ti rag-otayo?
2 Parayrayenyo ti Rag-oyo: Pinarsuanatayo ni Jehova a makarikna iti rag-o ken pannakapnek nga itden ti panagdaydayawtayo kenkuana ken iti panangpennektayo iti naikasigudan a panagkasapulantayo iti naespirituan. (Mat. 5:3) Pinarsuanatayo pay a makarikna iti ragsak iti panangted. (Ara. 20:35) Babaen ti ministeriotayo, maar-aramidantayo dagita—ti panagdaydayaw iti Dios ken tumulong kadagiti tattao. No ngarud ad-adu ti pannakiramantayo iti ministerio, dakdakkel met ti rag-otayo. Maysa pay, no kanayon a mangasabatayo, ad-adda met a rumang-ay ti abilidadtayo. Bayat a rumangrang-ay ti abilidadtayo, ad-adda a tumured ken maaddaantayo iti kompiansa. Maaddaantayo iti ad-adu a gundaway a mangasaba ken mangirugi iti panangyadal iti Biblia. Dagitoy ti mamagbalin iti ministeriotayo nga ad-adda a makaparagsak.
3. Apay a ti Marso ken Abril ket nagsayaat a bulan para iti panag-auxiliary pioneer?
3 Ti Marso ken Abril ket nagsayaat a panawen para iti panag-auxiliary pioneer gapu ta mabalintayo ti agpili no 30 wenno 50 nga oras ti ragpatentayo. Maysa pay, mangrugi iti Sabado, Marso 22, ken agtultuloy agingga iti Memorial inton Lunes, Abril 14, makiramantayto iti makaparagsak a kampania a mangawis kadagiti tattao a tumabuno iti Memorial. Magagaran unay dagiti kongregasion gapu ta adu ti agtrabaho iti “abagan-abaga” tapno mawanas ti teritoria iti naituding a panawen.—Sof. 3:9.
4. No kayattayo ti ag-auxiliary pioneer, ania ti rumbeng nga aramidentayo?
4 Agsaganakayo Itan: No saanyo pay a naaramid daytoy, ikagumaanyo a repasuen ti eskediulyo ket kitaenyo no ania dagiti mabalinyo a balbaliwan tapno mapalawayo ti ministerioyo kabayatan ti maysa wenno ad-adu pay a bulan. Ikararagyo daytoy. (Sant. 1:5) Ibagayo daytoy iti pamiliayo ken iti dadduma iti kongregasion. (Prov. 15:22) Makitayonto nga iti laksid ti nakapuy a salun-at wenno okupado nga eskediulyo, maaddaankayto iti rag-o nga itden ti panag-auxiliary pioneer.
5. Ania ti resultana no palawaentayo ti ministeriotayo iti daytoy panawen ti Memorial?
5 Kayat ni Jehova a naragsak dagiti adipenna. (Sal. 32:11) No ikagumaantayo a palawaen ti ministeriotayo iti daytoy a panawen ti Memorial, saan laeng a rumayray ti rag-otayo no di ket maparagsaktayo met ti nailangitan nga Amatayo.—Prov. 23:24; 27:11.