Kasapulan ti Anus iti Ministeriotayo
1. Kasano nga impakita ni Jehova ti kinaanusna iti sangatauan?
1 Nakaan-anus ti Dios iti sangatauan. (Ex. 34:6; Sal. 106:41-45; 2 Ped. 3:9) Ti maysa kadagiti kangrunaan a pakakitaan ti naayat a kinaanusna ket ti trabahotayo a panangikasaba iti Pagarian iti intero a lubong. Agarup 2,000 a tawenen nga an-anusan ti Dios ti sangatauan, ngem kaskasdi nga agtultuloy nga iyas-asidegna kenkuana dagiti napudno ti panagpuspusona a tattao. (Juan 6:44) Kasano nga iparangarang ti ministeriotayo ti kinaanus ni Jehova?
2. Kasanotayo a maipakita ti kinaanus iti teritoriatayo?
2 Panangasaba iti Binalaybalay: Tultuladentayo ti kinaanus ni Jehova babaen ti panangasabatayo “nga awan sarday” kadagiti teritoria nga ayan dagiti tattao a saan nga interesado. (Ara. 5:42) Siaanus nga ib-ibturantayo ti kinaaleng-aleng, pannakauyaw, ken ibubusor iti ministeriotayo. (Mar. 13:12, 13) Maipakitatayo pay ti kinaanus babaen ti agtultuloy a panangikagumaantayo a mangsibug kadagiti bin-i ti kinapudno uray no nagrigat a madanon dagiti interesado kadagiti pagtaenganda.
3. Apay a kasapulan ti anus no agsarungkartayo ken no mangyadaltayo iti Biblia?
3 Dagiti Iyad-adalantayo iti Biblia: Kasapulan ti anus iti panangpadakkel iti mula. Mabalintayo a sukayen daytoy, ngem saantayo a mapapartak ti panagdakkelna. (Sant. 5:7) Umasping iti dayta, in-inut ti panagrang-ay iti naespirituan. (Mar. 4:28) Mabalin a marigatan dagiti iyad-adalantayo a mangiwaksi kadagiti palso a narelihiosuan a sursuro wenno kadagiti saan a nainkasuratan a kustombre. Masapul a saantayo nga apuraen a rumang-ay iti naespirituan dagiti iyad-adalantayo babaen ti panangpilittayo kadakuada a mangaramid kadagiti panagbalbaliw. Kasapulan ti anus tapno adda umdas a tiempo a panagtignay ti espiritu ti Dios iti puso ti estudiante.—1 Cor. 3:6, 7.
4. Kasano a makatulong ti kinaanus tapno epektibo ti panangasabatayo kadagiti di manamati a kakabagian?
4 Di Manamati a Kakabagian: Nupay kayattayo la unay a maammuan dagiti di manamati a kakabagiantayo ti kinapudno, ipakitatayo a naanustayo babaen ti panaguraytayo iti maitutop a tiempo a panangiranudtayo kadakuada ti pammatitayo, nga agannadtayo tapno saantayo a magabsuonan ida iti nakaad-adu nga impormasion. (Ecl. 3:1, 7) Kabayatanna, bay-antayo a ti aramidtayo ti mangipakita kadakuada no aniatayo a kita ti tattao ken kanayon a sisasaganatayo a mangilawlawag kadagiti patpatientayo a siaalumamay ken buyogen ti nauneg a panagraem. (1 Ped. 3:1, 15) Kinapudnona, ad-adda nga epektibo ti ministeriotayo no naanustayo ken maay-ayo pay ti nailangitan nga Amatayo.