Sansanayennatayo ni Jehova Para iti Daytoy a Trabaho
1. No mangted ni Jehova iti annongen kadagiti tattao, ania pay ti aramidenna?
1 No mangted ni Jehova iti annongen kadagiti tattao, tulonganna met ida a mangaramid iti dayta. Kas pagarigan, idi imbaga ni Jehova a mangaramid ni Noe iti daong—banag a saan pay nga inar-aramid idi ni Noe—imbaga met ni Jehova no kasano ti panangaramidna iti dayta. (Gen. 6:14-16) Idi naikkan ni Moises, a naemma a pastor, iti annongen a makisarita kadagiti lallakay iti Israel ken ni Paraon, impanamnama kenkuana ni Jehova: “Siak addaakto iti ngiwatmo ket isurokanto no ania ti rebbeng a sawem.” (Ex. 4:12) No maipapan iti annongentayo a mangikasaba iti naimbag a damag, saannatayo met a baybay-an ni Jehova. Sansanayennatayo iti daytoy a trabaho babaen ti Teokratiko nga Eskuelaan ti Panagministro ken ti Gimong ti Serbisio. Kasanotayo a magunggonaan iti daytoy a panangsanay?
2. Kasanotayo a magunggonaan iti Teokratiko nga Eskuelaan ti Panagministro?
2 Ti Teokratiko nga Eskuelaan ti Panagministro: Adalenyo dagiti nakaeskediul a maadal sakbay a tumabunokayo iti tunggal gimong. Kalpasanna, bayat a makitayo ti panangilawlawag dagiti estudiante kadagiti pasetda, ad-adda a makasursurokayo no kasano ti mangisuro. (Prov. 27:17) Itugotyo ti libroyo nga Eskuelaan ti Panagministro iti gimong ken mabalinyo nga isurat iti dayta dagiti napapateg a punto a nasursuroyo. No adda punto a dakamaten ti manangaywan iti eskuelaan manipud iti libro kalpasan ti paset ti tunggal estudiante, ugedanyo dagiti napapateg a punto a kayatyo nga iyaplikar, ken usarenyo a paginotaran ti pingirna. Ngem ti kasayaatan a pamay-an tapno magunggonaantayo iti daytoy nga eskuelaan ket babaen ti pannakipartisipartayo. Nagpasalistakayo kadin? No maikkankayo iti paset, agsaganakayo a naimbag ken iyaplikaryo ti maibalakad kadakayo. Iyaplikaryo iti ministerio dagiti nasursuroyo.
3. Ania ti makatulong tapno magunggonaantayo iti Gimong ti Serbisio?
3 Ti Gimong ti Serbisio: Ad-adda a matandaanantayo dagiti singasing a maidatag iti daytoy a gimong no basaentayo a nasaksakbay ti material ken no mangisaganatayo iti komento. Ad-adu ti makapagkomento no pagtalinaedentayo nga ababa dagiti komentotayo. Dumngegkayo a naimbag kadagiti demostrasion ken ipakatyo ti aniaman a singasing nga iti panagkunayo ket makatulong kadakayo nga agbalin nga epektibo iti ministerio. Idulinyo dagiti napapateg nga artikulo manipud iti Ti Ministeriotayo iti Pagarian a mausaryonto kas reperensia.
4. Apay nga aprobetsarentayo ti nateokratikuan a panangsanay?
4 Kas kadagiti annongen a naited kada Noe ken Moises, saan met a nalaka ti annongentayo a mangikasaba iti naimbag a damag iti intero a mapagnaedan a daga. (Mat. 24:14) Agballigitayo no agpannuraytayo ken Jehova, ti Naindaklan nga Instruktortayo, ken aprobetsarentayo ti panangsanay nga ipapaayna.—Isa. 30:20.