Agplanokayo Itan a Mangpalawa iti Ministerioyo
1. Ania ti naisangsangayan nga oportunidadtayo iti panawen ti Memorial, ken kasanotayo a makapagsagana iti daytoy?
1 Tunggal panawen ti Memorial, addaantayo kadagiti kabbaro nga oportunidad a ‘mangidaydayaw ken Jehova iti kasta unay.’ (Sal. 109:30) Kas maysa a pamay-an a panangipakita iti apresasionyo iti Dios a nangipaay iti subbot, palawaenyonto kadi ti ministerioyo kabayatan ti Marso? Rugianyo itan ti agplano.—Prov. 21:5.
2. Ania ti inaramidmo ken dagiti dadduma idi naammuam a nakissayan ti oras a mabalinmo a ragpaten nga ag-auxiliary pioneer iti Abril idi napan a tawen?
2 Panag-auxiliary Pioneer: Idi napan a tawen, kasta unay ti ragsak dagiti kakabsat idi naammuanda a nakissayan ti oras a mabalinda a ragpaten nga ag-auxiliary pioneer iti Abril. Insurat ti maysa a kabsat a lalaki: “Maysaak nga estudiante iti haiskul, isu a diak kabaelan ti ag-regular pioneer ngem kayatko ti ag-auxiliary pioneer inton Abril. Tallopulo nga oras ti isuratko a ragpatek ngem ikagumaak nga abuten ti 50 nga oras.” Insurat ti maysa a kabsat a babai nga agtartrabaho iti amin a tiempo: “Nakalaklaka nga abuten ti 30 nga oras!” Idi naipakaammo daytoy a probision, kinuna ti maysa a dati a payunir nga agtawenen iti nasurok a 80: “Daytoy ti nabayagen nga ur-urayek! Ammo ni Jehova a ti panagpayunir ti kasayaatan a paset ti biagko!” Dagiti dadduma a saan a nakapag-auxiliary pioneer nangipasdekda iti kalat a mangpalawa iti ministerioda.
3. Apay a nasayaat ti ag-auxiliary pioneer inton Marso, Abril, ken Mayo?
3 Nagsayaat a bulan ti Marso para iti panag-auxiliary pioneer gapu ta mabalintayo manen ti agpili no 30 wenno 50 nga oras ti kayattayo a ragpaten. Malaksid iti dayta, mangrugi iti Sabado, Marso 17, makiramantayto iti espesial a kampania a panangawis kadagiti tattao a tumabuno iti Memorial inton Abril 5. Mabalin nga adunto pay ketdi ti ag-auxiliary pioneer iti Abril ken Mayo uray 50 nga oras ti abutenda gapu ta naragsakanda unay iti napalawa a pannakiramanda iti ministerio iti Marso.
4. Kasanotayo a mapalawa ti pannakiramantayo iti ministerio, ken ania ti resultana?
4 Inton sumaruno a panagdaydayaw ti pamiliayo, mabalin a pagsasaritaanyo no kasano a ti tunggal kameng ti pamilia ket mapalawana ti ministeriona kabayatan ti panawen ti Memorial. (Prov. 15:22) Kiddawenyo ken Jehova a bendisionanna ti panagreggetyo. (1 Juan 3:22) Bayat a palawaenyo ti pannakiramanyo iti ministerio, saanyo laeng a maparayray ti panagdaydayawyo ken Jehova no di ket maparayrayyo met ti rag-oyo.—2 Cor. 9:6.