“Itultuloyyo nga Aramiden Daytoy”—Maangay ti Memorial Inton Abril 5
1. Apay a napateg nga angayentayo ti Memorial?
1 “Itultuloyyo nga aramiden daytoy kas panglaglagip kaniak.” (Luc. 22:19) Babaen kadagitoy a sasao, imbilin ni Jesus kadagiti pasurotna a laglagipenda ti sakripisio nga ipapatayna. Gapu iti amin a naaramidan ti subbot, ti tinawen a panangangay iti Memorial ti kapatgan nga aldaw para kadagiti Kristiano. Bayat nga umad-adani ti Abril 5 a panangangaytayo iti Memorial iti daytoy a tawen, kasanotayo a maipakita ti panagyamantayo ken Jehova?—Col. 3:15.
2. Kasanotayo a maipakita ti apresasiontayo iti Memorial babaen ti panagadal ken panagmennamenna?
2 Agsagana: Gagangay a saganaantayo dagiti banag nga ibilangtayo a napateg. Maisaganatayo ti pusotayo para iti Memorial babaen ti panangusigtayo a sangapamiliaan kadagiti pasamak bayat dagiti maudi nga aldaw ni Jesus ditoy daga ken mennamennaentayo dagita. (Esd. 7:10) Ti sumagmamano a teksto ket naikabil iti kalendario ken iti Panangsukimat iti Kasuratan iti Inaldaw. Ngem, ti kompleto a listaan dagiti teksto ken dagiti kapitulo iti libro a Katan-okan a Tao a mangilawlawag kadagita ket naikabil iti panid 23-24 ti Pebrero 1, 2011 a ruar Ti Pagwanawanan.
3. Kasanotayo a maipakita ti apresasiontayo iti Memorial babaen ti ad-adu a pannakiramantayo iti ministerio?
3 Mangasaba: Maipakitatayo met ti apresasiontayo babaen ti naan-anay a pannakiramantayo iti ministerio. (Luc. 6:45) Mangrugi inton Sabado, Marso 17, ti sangalubongan a kampaniatayo a mangawis kadagiti tattao a tumabuno iti Memorial. Mabalinyo kadi a baliwan ti eskediulyo tapno ad-adu ti panawenyo iti ministerio, a nalabit ag-auxiliary pioneer-kayo? Apay a diyo pagsasaritaan daytoy iti sumaruno a sangapamiliaan a panagdaydayawyo?
4. Ania dagiti magunggonatayo iti itatabunotayo iti Memorial?
4 Talaga a mabembenepisiarantayo iti itatabunotayo iti Memorial iti kada tawen! Rumayray ti rag-o ken ayattayo iti Dios no utobentayo ti kinamanagparabur ni Jehova babaen ti panangipaayna iti bugbugtong nga Anakna kas subbot. (Juan 3:16; 1 Juan 4:9, 10) Daytoy ti mangtignay kadatayo a saan a mangipangpangruna iti bagbagitayo. (2 Cor. 5:14, 15) Parayrayenna pay ti tarigagaytayo a mangidaydayaw ken Jehova iti publiko. (Sal. 102:19-21) Wen, kas managyaman nga agserserbi ken Jehova segseggaantayo ti gundaway a ‘mangiwaragawag iti ipapatay ti Apo’ inton Abril 5 a panangangaytayo iti Memorial.—1 Cor. 11:26.