Ipakitatayo ti Apresasiontayo Maangay ti Memorial Inton Abril 17
1. Ania nga ebkas ti salmista ti nangnangruna a maitutop bayat ti panawen ti Memorial?
1 Gapu kadagiti adu nga aramid ni Jehova a mangipakpakita iti asi ken panangisalakanna, natignay ti salmista a nangisaludsod: “Ania ti isupapakko ken Jehova gapu kadagiti amin a gunggonana kaniak?” (Sal. 116:12) Ad-adu ti panggapuan dagiti agserserbi iti Dios ita a mangipakita iti panagyamanda. Sinigsiglo a tawen kalpasan ti pannakaisurat dagitoy a sasao, inted ni Jehova ti kapatgan a sagutna iti sangatauan—ti subbot. Bayat nga agsaganatayo a manglaglagip iti ipapatay ni Kristo inton Abril 17, adda nasayaat a rasontayo a mangipakita iti panagyamantayo.—Col. 3:15.
2. Ania ti sumagmamano a rason no apay nga apresiarentayo ti subbot?
2 Dagiti Bendision nga Inyeg ti Subbot: Babaen ti subbot, magun-odtayon “ti pannakapakawan dagiti basoltayo.” (Col. 1:13, 14) Daytoy ti tumulong kadatayo nga agdaydayaw ken Jehova buyogen ti nadalus a konsiensia. (Heb. 9:13, 14) Nawayatayo a mangyebkas iti kaririknatayo ken Jehova babaen ti kararag. (Heb. 4:14-16) Dagidiay mangipakita iti pammati iti subbot ket addaan iti nadayag a namnama nga agbiag nga agnanayon!—Juan 3:16.
3. Kasanotayo a maipakita ti apresasiontayo ken Jehova gapu iti intedna a subbot?
3 Ipakitatayo ti Apresasiontayo: Ti maysa a pamay-an a maipakitatayo ti nauneg nga apresasiontayo ket babaen ti panangusig ken panangutob kadagiti teksto ti Biblia a nakaeskediul a basaentayo iti panawen ti Memorial. Ti artikulo ti Pagwanawanan iti Pebrero 1, 2011 a napauluan iti “Nakasaganaka Kadin Para iti Kapatgan nga Aldaw iti Tawen?” ket nairanta a tumulong kadatayo a mangaramid iti daytoy. Mabalintayo met nga ibaga ken Jehova babaen ti naimpusuan a kararag no kasano ti panangipategtayo iti subbot. (1 Tes. 5:17, 18) Maipakitatayo a managyamantayo no tumabunotayo iti Memorial kas panangtungpal iti bilin ni Jesus. (1 Cor. 11:24, 25) Maysa pay, matuladtayo ti ayat ni Jehova iti amin a tattao ken aramidentayo ti amin a kabaelantayo a mangawis kadagiti adu a tattao a tumabuno.—Isa. 55:1-3.
4. Ania koma ti determinasiontayo?
4 Dagiti manangapresiar nga ad-adipen ni Jehova saanda nga ibilang ti Memorial kas sabali a gimong laeng. Daytoy ti kapapatgan a gimong iti tawen! Bayat nga umas-asideg ti Memorial, sapay koma ta ti determinasiontayo ket kas iti salmista a nangisurat: “Bendituem ni Jehova, O kararuak, ket dika lipaten dagiti amin nga aramidna.”—Sal. 103:2.