Ti Mensahe ti Dios Kadatayo Babaen ken Jeremias
1. Ania a publikasion ti nairuar iti 2010 a kombension distrito, ken kasanotayo nga usaren daytoy?
1 Anian a ragsaktayo idi nairuar dayta a baro a libro iti “Agtalinaedkayo a Nasinged ken Jehova!” a Kombension Distrito idi 2010! Daytoy a publikasion itampokna dagiti leksion a masursurotayo iti libro a Jeremias ken Un-unnoy a mausartayo iti inaldaw a panagbiagtayo. (Roma 15:4) Nairanta daytoy a mausar iti Pangadal ti Kongregasion iti Biblia. Adalentayto daytoy mangrugi iti lawas ti Nobiembre 5, 2012.
2. Apay a makagunggona kadatayo ti panangusig kadagiti libro ti Biblia a Jeremias ken Un-unnoy?
2 Makagunggona Ita: Ni Jeremias a nangisurat iti daytoy a naipaltiing a libro ti Biblia ket nagipadto kabayatan ti nariribuk a panawen iti Juda. Idi damo, pinanunotna nga isu ket saan a maikari iti daytoy nga annongen. (Jer. 1:6) Indadanes pay dagiti gagayyem ken nalabit dagiti kakabagianna iti dimmakkelanna nga ili, ti Anatot. (Jer. 11:21, 22) Saan ngarud a pakasdaawan nga adda dagiti gundaway a naupay ni Jeremias. (Jer. 20:14) Bayat nga itungtungpaltayo ti annongentayo a ‘mangaramid iti ad-adalan kadagiti tattao iti amin a nasion,’ masansan a maipasangotayo kadagiti karit ken rikrikna a kas iti napadasan ni Jeremias. (Mat. 28:19) Ti panangusigtayo iti sursuratna ket makatulong kadatayo nga agbalin a natured ken naregta a makipaset iti ministerio.
3. Kasanotayo nga usaren dagiti nagduduma a linaon ti libro a Jeremias?
3 Dagiti Linaonna: Dagiti kangrunaan a teksto a masapul a maibasa kabayatan ti panagadal ket nakaitaliko. Iti tunggal pagpatinggaan ti maadal iti kada lawas, adda maysa wenno dua a saludsod a napuskol ti pannakaisuratna a mangitampok iti kangrunaan a punto iti naadal. Masapul a maisaludsod daytoy iti tallaong kas pangrepaso. Adu dagiti nausar a napipintas a ladawan a sigurado a kayat a komentuan ti kongregasion.
4. Kasanotayo a magunggonaan a naan-anay iti panangusigtayo iti libro a Jeremias?
4 Agsaganakayo a nasakbay tapno naan-anay a magunggonaankayo. Mangbirokkayo kadagiti punto a mayaplikaryo iti biag ken ministerioyo. Makiramankayo iti panagkomento. Babaen ti tulong ni Jehova, naitungpal ni Jeremias ti annongenna buyogen iti rag-o ken pannakapnek. (Jer. 15:16) Sapay koma ta ti panangusigtayo iti daytoy a baro a publikasion ket makatulong iti panangitungpaltayo iti ministeriotayo iti kasta met laeng a pamay-an.