Saluadam ti Konsiensiam
1. Ania ti tema ti aldaw ti espesial nga asamblea iti tawen 2013, ken ania ti panggep ti programa?
1 Inaldaw a maipaspasangotayo kadagiti situasion a mabalin a mangituggod kadatayo a mangsalungasing iti konsiensiatayo. Dayta ti gapuna a ti tema ti aldaw ti espesial nga asamblea iti tawen 2013 ket “Saluadam ti Konsiensiam.” (1 Tim. 1:19) Nairanta ti programa a tumulong iti tunggal maysa kadatayo a mangusig a naimbag no kasanotayo nga usaren daytoy a nagsayaat a sagut ti Namarsua kadatayo.
2. Ania a napapateg a saludsod ti masungbatan bayat ti programa?
2 Siputanyo Dagitoy a Punto: Masungbatan iti programa ti pito a napapateg a saludsod maipapan iti konsiensia:
• Ania dagiti mamagpeggad iti konsiensia?
• Kasanotay a masanay ti konsiensiatayo?
• Kasano nga agbalintayo a nadalus iti dara dagiti amin a tao?
• Ania ti ipalgakna maipapan kadatayo ti panagpanunot ken panagtignaytayo a maitunos kadagiti prinsipio ti Biblia?
• Kasanotay a maliklikan ti pannakasugat ti konsiensia dagiti dadduma no maipapan kadagiti banag nga agpannuray iti konsiensia?
• Dakayo nga agtutubo, kasanokay a makapagtalinaed a natibker no pilitendakayo a makikompromiso?
• Ania dagiti bendision a sagrapen dagidiay agpaiwanwan iti konsiensia nga iturturong ti espiritu?
3. Kasanotayo a magunggonaan iti programa?
3 Babaen iti tulong ni Jehova, malabanantayo dagiti panangikagumaan ni Satanas a mangdadael iti konsiensiatayo. Babaen ti Sao ti Dios ken ti organisasionna, kastoy ti ibagbaga kadatayo ti naayat a nailangitan nga Amatayo: “Daytoy ti dalan. Magnakayo iti dayta.” (Isa. 30:21) Daytoy a programa ket maysa a pamay-an ni Jehova a mangipaay iti kasta a panangiwanwan. Gapuna, ikagumaanyo a tabunuan ti intero a programa. Dumngegkayo a naimbag ken usigenyo no kasanoyo nga iyaplikar a mismo dagiti masursuroyo. Pagsasaritaanyo a sangapamiliaan ti maipapan iti programa. No iyaplikartayo dagiti masursurotayo, mapabilegtayo nga agtultuloy a ‘mangsalimetmet iti naimbag a konsiensia’ ken makatulong daytoy tapno saantayo a maisiasi kadagiti apagkanito a ragragsak nga ididiaya ti lubong ni Satanas.—1 Ped. 3:16.