Lima a Pamay-an iti Panangbirok iti Mayadalan iti Biblia
1. No marigatantayo nga agbirok iti mayadalan iti Biblia iti teritoriatayo, ania ti aramidentayo, ken apay?
1 Marigatankayo kadi nga agbirok iti iyadalanyo iti Biblia? Saankayo a sumuko. Bendisionan ni Jehova dagiti agtultuloy a mangaramid iti pagayatanna. (Gal. 6:9) Adda lima a singasing iti baba a makatulong kadakayo.
2. Kasanotayo nga usaren ti direkta a pamay-an a mangirugi iti panangyadal?
2 Direkta a Pamay-an: Ammo ti adu a tattao nga agituktukontayo iti Pagwanawanan ken Agriingkayo!, ngem mabalin a saanda nga ammo nga agituktukontayo iti panangyadal iti Biblia. Apay a saanyo a padasen ti direkta a pamay-an no mangasabakayo iti binalaybalay? Mabalinyo met a saludsoden kadagiti interesado a makasabaanyo no kayatda ti mayadalan iti Biblia. No saanda a kayat, mabalinyo nga itultuloy nga ikkan kadagiti literatura ken parayrayen ti interesda. Adda kabsat a lalaki nga adun a tawen a regular a mangitultulod iti magasin iti maysa nga agassawa. Kalpasan a naitedna kadakuada dagiti kaudian a ruar dagiti magasin, nagsubli tapno saludsodenna: “Kayatyo kadi ti mayadalan iti Biblia?” Nasdaaw ta simmungbatda iti wen. Ita, nabautisaranen dagitoy nga agassawa.
3. Rumbeng kadi nga ipapantayo nga addan ti mangyad-adal kadagiti tumabtabuno kadagiti gimong? Ilawlawagyo.
3 Dagiti Tumabtabuno iti Gimong: Saanyo nga ipapan a mayad-adalanen iti Biblia dagiti interesado a makitkitayo kadagiti gimong. Kinuna ti maysa a kabsat a lalaki: “Nasurok a kagudua kadagiti iyad-adalak ket nairugik gapu iti pannakisaritak kadagiti tumabtabuno kadagiti gimong.” Inasitgan ti maysa a kabsat a babai ti managbabain a babai nga ina dagiti kakongregasionna. Agarup 15 a tawenen a tumabtabuno iti gimong daytoy a babai ken kanayon a mapmapan iti Kingdom Hall ngem sumangpet laeng no mangrugrugin ti gimong ken pumanawen apaman a malpas ti gimong. Immanamong ti babai nga agpayadal ket nabautisaran idi agangay. Insurat ti kabsat a babai: “Agbabbabawiak ta inurayko pay ti 15 a tawen sakbay a sinaludsodko no kayatna ti mayadalan!”
4. Kasanotayo a makabirok iti iyadalan babaen iti panagsaludsod kadagiti dadduma?
4 Agsaludsod Kadagiti Dadduma: Adda kabsat a babai a kumuykuyog kadagiti dadduma a mapan mangyadal iti Biblia. Iti pammalubos ti mangyad-adal, saludsodenna iti estudiante kalpasan ti panagadal no adda am-ammona a mayat met nga agpayadal iti Biblia. No itukonyo ti libro nga Isursuro ti Biblia iti sarsarungkaranyo, mabalinyo nga isaludsod: “Adda kadi am-ammom a mayat met a mangbasa iti daytoy a libro?” Adda dagiti kasasaad a saanen a kabaelan nga iyadalan dagiti agibumbunannag ken payunir dagiti nakasaritada iti teritoria. Ibagayo kadakuada a nawayakayo a mangyadal iti Biblia.
5. Apay a saludsodentayo kadagiti di manamati nga assawa dagiti kakongregasiontayo no kayatda ti mayadalan iti Biblia?
5 Di Manamati nga Assawa: Adda kadi agibumbunannag iti kongregasionyo nga addaan iti di manamati nga asawa? Adda dagiti di manamati a saan a mayat a makisarita iti maipapan iti Biblia iti Kristiano nga asawada ngem kayatda ti agpayadal iti saanda a kapamilia. Masansan a nasayaat no agsaludsodkayo nga umuna iti manamati nga asawa tapno ammoyo no ania ti kasayaatan nga aramidenyo.
6. Kasano kapateg ti kararag iti panangbirok iti iyadalan?
6 Kararag: Saanyo a tagtagibassiten ti bileg ti kararag. (Sant. 5:16) Inkari ni Jehova a patganna dagiti kiddawtayo no maitunos iti pagayatanna. (1 Juan 5:14) Ti maysa a kabsat a lalaki nga okupado unay, inkararagna a maaddaan koma iti iyadalan iti Biblia. Pagduaduaan ni baketna no maiwayaanna nga asikasuen ti estudiante, nangruna no adu ti problema ti estudiante. Dinakamatna daytoy a pakaseknanna idi inkararagna ken Jehova a makabirok koma ni lakayna iti mayadalan iti Biblia. Agarup dua a lawas kalpasanna, nasungbatan dagiti kararagda ta impasa kenkuana ti maysa a payunir a kakongregasionda ti lalaki a nakasaritana a mayat nga agpayadal iti Biblia. Insurat ti asawa a babai: “Para kadagiti mangpampanunot a saanda a kabaelan ti mangyadal iti Biblia, ti makunak ket: Agbalinkayo nga espesipiko iti kararagyo, ken saankayo nga agsardeng a mangikararag iti dayta. Dakdakkel ti rag-o a nasagrapmi ngem iti impagarupko.” No agreggetkayo, makabirokkayto iti iyadalanyo iti Biblia ket matagiragsakyonto ti rag-o nga itden ti panangtulong iti maysa a tao a magna iti “dalan nga agturong iti biag.”—Mat. 7:13, 14.