Ituktukonyo Aya iti Panagadal ti Biblia?
1 Adu dagiti nagballigi a nangirugi iti panagadal ti Biblia babaen iti panangusarda ti diretso nga idudupag a mangitukon kadagiti tattao iti oportunidad nga agadal ti Biblia. Maysa a lalaki a nagkedked iti literatura ti adu a daras iti sidadaan a nangawat idi a naitukon kenkuana iti panagadal ti Biblia. Simmungbat: “Nabayagen a kayatko iti agadal ti Biblia.” Naipasdek ngarud ti panagadal iti Biblia, ket napardas ti panagrang-ay iti intero a pamiliana.
2 Masapul a sipupuottayo amin a mangirugi iti panagadal. Tapno tunggal maysa ket agprogreso iti panagbalinna a disipulo ni Kristo, masapul a masuruanda. (Mat. 28:19, 20) Tapno maisuroda, kasapulan nga addaanda iti panagadal ti Biblia a maidaulo kadakuada. Dagiti panagadal ti masansan a mairugi babaen laeng iti maitukon a pannakaidemostra no kasano a ti bumalay ket makaadal iti ad-adu maipapan ti Biblia ken iti karkari ti Dios. Maysa a kabsat a lalaki ti nakaipasdek iti lima a panagadal babaen ti tract nga Biag nga Agnanayon iti Maysa a Baro a Lubong. Idinto ta saanna a kabaelan a maidaulo a kanayon iti kasta a kaadu ti panagadal iti Biblia, rinugianna ti nangipadawat kadagiti panagadal iti sabsabali nga agibumbunannag.
3 No masarakanyo a nalaka ti agipasdek iti panagadal, mabalintayo nga ikuyog dagiti dadduma nga agibumbunannag ket tulongantayo ida a makagun-od met iti panagadal. Wenno mabalintayo a padawatan dagiti dadduma iti kongregasion kadagiti panagadal a nairugitayo. No kayatyo ti mangikondukta iti panagadal ti Biblia, apay a dikay padasen nga itukon iti maysa a panagadal kadagidiay a nasabetyo iti panagbalaybalay a ministerio? Iti maysa a kaso ti maysa nga agibumbunannag ket nagsarungkar iti maysa nga agtutubo a balasitang a saan unay a nangipakita ti interes. Nupay kasta, intukon ti agibumbunannag kenkuana iti panagadal ti Biblia, ket inawatna dayta. Maysa itan a bautisado, ket ti kabsatna a babai ken iti asawa daytoy a kabsatna ket tumabtabunoda metten iti gimong.—Gal. 6:6.
4 Saan a tunggal mairugi a panagadal ket agtultuloy. Saan nga amin dagidiay makiadal ket maikamangda iti kinapudno. Ngem adda dadduma nga agkamang. No ad-adu ti maipasdek a panagadal, ad-adu met iti matulongan a sabsabali nga agbalin a managdayaw ken Jehova.