Tagiragsaken ti Naimbag Gapu iti Napinget a Panagtrabaho
1. Ania ti mabalin a mangpabaaw iti regtatayo iti ministerio?
1 Naparsua ti tao a mangtagiragsak iti “naimbag gapu iti napinget a panagtrabahona.” (Ecl. 2:24) Nupay kasta, no saantayo a makita dagiti nasayaat a resulta ti ministeriotayo, mapukaw ti rag-o ken bumaaw ti regtatayo. Ania ti makatulong kadatayo a mangtaginayon iti positibo a panangmatmat?
2. Apay a masapul a realistiko ti inanamaentayo iti reaksion dagiti tattao iti ministeriotayo?
2 Agbalin a Realistiko: Laglagipenyo a nupay manmano ti nangipangag ken Jesus, awan duadua a nagballigi ti ministeriona. (Juan 17:4) Iti ilustrasion ni Jesus maipapan iti managmula, impakpakaunana nga adu ti saan nga umawat iti arig bin-i a mensahe ti Pagarian. (Mat. 13:3-8, 18-22) Ngem adu latta ti maaramidantayo no napingettayo.
3. Kasanotayo a ‘makapataud iti bunga’ uray no manmano ti dumngeg iti panangasabatayo?
3 No Kasanotayo a Makapataud iti Adu a Bunga: Sigun iti ilustrasion ni Jesus, dagidiay umawat iti mensahe ket “agbunga.” (Mat. 13:23) No agdawa ti trigo ken matangkenan, saan nga agbunga iti sabali manen a dawa no di ket baro a bukbukel. Isu a ti bunga dagiti naballigi a Kristiano ket dina kayat a sawen a baro nga adalan no di ket ti maulit-ulit a pannakaimula ti adu a bin-i ti Pagarian babaen iti trabaho a panangasaba. Adu ti nasayaat a resulta dayta a mangipaay kadatayo iti pannakapnek, dumngeg man wenno saan dagiti tattao. Tumultulongtayo iti pannakasantipikar ti nagan ni Jehova. (Isa. 43:10-12; Mat. 6:9) Tagtagiragsakentayo ti pribilehio nga agbalin a katrabahuan ti Dios. (1 Cor. 3:9) Ken makaay-ayo ken Jehova dagita a “bunga dagiti bibig.”—Heb. 13:15, 16.
4. Ania dagiti mabalin a resulta ti ministeriotayo a saantay nga ammo?
4 Kanayonanna, mabalin nga agbunga ti napinget a panagtrabahotayo nupay saantayo nga ammo. Nalabit a ti dadduma kadagiti nakangngeg iti panangasaba ni Jesus ket sa laeng nagbalin nga adalan idi natay ni Jesus. Umasping iti dayta, mabalin a saan nga agtubo a dagus dagiti bin-i ti Pagarian a naimulatayo iti puso ti maysa a tao. Nupay kasta, mabalin nga awatennanto met laeng ti kinapudno ngem saantayon nga ammo. Talaga nga adu ti nasayaat a maaramidan ti ministeriotayo. Gapuna, itultuloytayo koma ti “mangpataud iti adu a bunga” ken paneknekantayo iti bagbagitayo nga adalannatayo ni Jesus.—Juan 15:8.