“Makikappiakayo iti Amin a Tattao”
1. Ania a balakad ti Biblia ti masapul a yaplikartayo no makasaraktayo kadagiti makaunget a bumalay?
1 Kas ad-adipen ni Jehova, mannakikappiatayo ken ikaskasabatayo ti talna. (Isa. 52:7) Ngem no dadduma, makasaraktayo iti tattao a makaunget gapu ta simmarungkartayo kadakuada. Ania ti makatulong kadatayo nga agbalin a mannakikappia kadagiti kasta a situasion?—Roma 12:18.
2. Apay a napateg nga agbalintayo a mannakaawat?
2 Agbalin a Mannakaawat: Adda dagiti makapungtot gapu ta busorenda ti kinapudno. Ngem mabalin a saan a mainaig iti mensahetayo dagiti makagapu a masuron ti dadduma. Nalabit simmarungkartayo iti saan a kombiniente a tiempo. Mabalin met a masuron ti bumalay gapu kadagiti personal a parikut. Uray no ti naimbag a damag ti namagpungtot kenkuana, masapul a laglagipentayo a mabalin a nakullaapan ti panunotna isu a kasta ti reaksionna. (2 Cor. 4:4) No mannakaawattayo, makapagtalinaedtayo a kalmado ken ditay panunoten a datayo a mismo ti kaungetna.—Prov. 19:11.
3. Kasanotayo a maipakita ti panagraem iti bumalay?
3 Ipakita ti Panagraem: Iti teritoriatayo, adu ti addaan kadagiti nairamuten a patpatien. (2 Cor. 10:4) Makaammoda no dumngegda wenno saan. Ditay pulos kayat a tagibassiten dagiti patpatien ti bumalay wenno iparikna nga ad-adu ti ammotayo. No papanawennatayo, siraraem koma nga aramidentayo dayta.
4. Ania ti kaipapanan ti agsao a makaay-ayo?
4 Agsao a Makaay-ayo: Uray no pagsasawandatayo, naalumamay ken makaay-ayo koma latta ti sungbattayo. (Col. 4:6; 1 Ped. 2:23) Imbes a makirikiar, ikagumaantayo ti mangbirok iti pagtunosantayo. Nalabit mabalintay a siaalumamay a damagen iti bumalay no apay nga agkedked. Ngem tapno di ad-adda a maluksaw, nasaysayaat no dadduma a gupdentayon ti saritaan.—Prov. 9:7; 17:14.
5. Ania dagiti pagimbagan ti panagbalin a mannakikappia iti panangasaba?
5 No mannakikappiatayo, mabalin a malaglagipto ti bumalay ti reaksiontayo isu a posible a dumngeg inton makasabaan manen. (Roma 12:20, 21) Uray no kasla natibker ti ibubusorna, posible nga awatennanto ti kinapudno. (Gal. 1:13, 14) Aginteres man iti kinapudno wenno saan, maidaydayawtayo ni Jehova ken mapagbalintayo nga ad-adda a makaatrakar ti isursurotayo no agtalinaedtayo a managteppel ken mannakikappia.—2 Cor. 6:3.