“Mangted iti Naan-anay a Panangsaksi”
1. No maipapan iti ministerio, ania a nasayaat nga ulidan ti imbati ni apostol Pablo?
1 “Naan-anay nga itungpalmo ti ministeriom.” (2 Tim. 4:5) Adda karbengan ni apostol Pablo a mangibaga iti daytoy ken ni Timoteo. Kinapudnona, iti nagbaetan ti 47 ken 56 C.E., nairingpas ni Pablo ti tallo a panagdaliasatna kas misionero. Iti libro nga Aramid, maulit-ulit a nadakamat ti “naan-anay a panangsaksi” ni Pablo. (Ara. 23:11; 28:23) Kasanotayo a maaramid dayta iti kaaldawantayo?
2. Kasanotayo a makaipaay iti naan-anay a panangsaksi no mangasabatayo iti binalaybalay?
2 Iti Binalaybalay: Tapno makasaritatayo dagiti tattao a pulos a saan pay a nakangngeg iti naimbag a damag, mabalin a baliwbaliwantayo ti oras nga isasarungkartayo iti pagtaenganda. Ti ulo ti pamilia ket mabalin nga adda iti balayda no rabii wenno iti ngudo ti lawas. Ikagumaantayo nga adda koma makasaritatayo iti tunggal balay ken maulit-ulit a subliantayo dagiti pagtaengan nga awan dagiti bumalayna. Ngem kasano no saan nga agballigi ti panangikagumaantayo a mangdanon kadagiti tattao? Nalabit nasayaat ti resultana no kasabaantayo ida babaen iti surat wenno telepono.
3. Ania dagiti gundaway a mabalinyo ti mangasaba iti publiko ken iti di pormal?
3 Publiko ken Di Pormal: Dagiti adipen ni Jehova ita ipakpakaammoda ti “pudno a sirib” iti amin a dumngeg. No dadduma, ar-aramidenda daytoy “iti mismo a kalsada” wenno “kadagiti publiko a plasa.” (Prov. 1:20, 21) Sipapanunottayo kadi a mangasaba bayat nga aramidentayo dagiti inaldaw nga aktibidadtayo? Maikuna kadi a ‘makumikomtayo unay iti sao,’ wenno, nareggettayo a mangaskasaba? (Ara. 18:5) No kasta, itungtungpaltayo ti obligasiontayo a “mangipaay iti naan-anay a pangsaksi.”—Ara. 10:42; 17:17; 20:20, 21, 24.
4. Kasano a makatulong ti kararag ken panagmennamenna iti panangipaaytayo iti naan-anay a panangsaksi?
4 Nupay kasta, gapu iti kinakapuy wenno kinamanagbabain, mabalin nga agkedkedtayo no dadduma a mangasaba. Sigurado nga ammo ni Jehova ti limitasiontayo. (Sal. 103:14) No tumaud dagiti kasta a situasion, mabalintayo ti agkararag kenkuana a dumawat iti tured a mangasaba. (Ara. 4:29, 31) Maysa pay, kabayatan ti personal a panagadal wenno panagmennamennatayo iti Sao ti Dios, mabalintay nga ipamaysa a parayrayen ti panangapresiartayo iti di magatadan a pateg ti naimbag a damag. (Fil. 3:8) Daytoy ti mangtignay kadatayo a mangasaba a sireregta!
5. Kasanotayo a makatulong iti pannakatungpal ti padto ni Joel?
5 Impadto ni Joel a sakbay a dumteng ti dakkel ken nakaam-amak nga aldaw ni Jehova, dagiti adipen ti Dios ket ‘agtultuloy a mapan’ ken dida ipalubos nga adda aniaman a manglapped kadakuada a mangasaba. (Joel 2:2, 7-9) Sapay koma ta naan-anay a makiramantayo iti daytoy a trabaho a panangasaba a saanton a maulit!