Ti Sao ti Dios ket Makagunggona iti Panangisuro

1. Ania ti tema ti asamblea sirkito iti 2014? Ania a saludsod ti masungbatan kabayatan ti programa?

¹ Ti ‘Naindaklan a Manangisuro’ kadatayo a ni Jehova, ti kasayaatan a mannursuro iti uniberso. (Isa. 30:20, 21) Ngem kasano ti panangisuro ni Jehova kadatayo? Isu ket nangipaay iti kasayaatan kadagiti amin a libro—ti naipaltiing a Saona, ti Biblia. Kasano a ti pannursuro ti Dios magunggonaannatayo iti pisikal, mental, emosional, ken espiritual? Mausig ti sungbat daytoy a saludsod kabayatan ti programa ti asamblea sirkitotayo iti 2014. Ti tema ti programa a, “Ti Sao ti Dios ket Makagunggona iti Panangisuro,” ket naibatay iti 2 Timoteo 3:16.

2. Maitampok dagiti kangrunaan a punto babaen ti sungbat dagiti ania a saludsod?

² Siputanyo Dagitoy a Kangrunaan a Punto: Maitampok dagiti kangrunaan a punto ti programa babaen ti sungbat dagiti sumaganad a saludsod:

• Ania ti epekto ti nadiosan a pannursuro iti biagtayo? (Isa. 48:17, 18)

• No ikagumaantayo ti mangaramid kadagiti panagbalbaliw tapno makapagserbitayo ken Jehova iti amin a tiempo, ania ti masiguradotayo? (Mal. 3:10)

• Ania ti rumbeng a reaksiontayo no maipasangotayo kadagiti “karkarna a sursuro”? (Heb. 13:9)

• Kasanotayo a matulad ti ‘wagas ti panangisuro’ ni Jesus? (Mat. 7:28, 29)

• Apay a dagiti mangisursuro iti kongregasion masapul nga isuroda ti bagbagida? (Roma 2:21)

• Kadagiti ania a pamay-an a makagunggona ti Sao ti Dios? (2 Tim. 3:16)

• Ania ti epektona kadagiti tattao ti ‘pannakayugayog’ dagiti nasion? (Hag. 2:6, 7)

• Ania ti namnamaen ni Jehova kadatayo? (Efe. 5:1)

• Apay a masapul nga ikagumaantayo ti agtalinaed iti sursuro ni Jehova? (Luc. 13:24)

3. Apay a napateg a tabunuan ken imdengantayo a naimbag daytoy naintiempuan a programa?

³ Iti umuna a paset ti 2 Timoteo kapitulo 3, sakbay a naisurat dagiti sasao a nakaibatayan ti tema daytoy a programa, dineskribir ni Pablo ti napeggad a tiempo a pakakitaan ti maudi nga al-aldaw. Insuratna: “Dagiti nadangkes a tattao ken dagiti agpampammarang rumang-aydanto manipud dakes nga agturong iti dakdakes pay, a mangyaw-awan ken mayaw-awanda.” (2 Tim. 3:13) Tapno saantayo a mayaw-awan, anian a nagpateg nga imdengan ken yaplikartayo dagiti pannursuro ti Dios! Gapuna, determinadotayo koma a tumabuno ken umimdeng a naimbag iti daytoy a naintiempuan a programa.