‘Maaramid Koma ti Pagayatan ti Dios’
1. Ania ti tema ti programa ti aldaw ti espesial nga asamblea iti 2012, ken apay a maitutop nga usigentayo daytoy?
1 Naparsuatayo gapu iti pagayatan ni Jehova. (Apoc. 4:11) Gapuna, saantayo a maitungpal ti panggep ti pannakaparsuatayo no saantayo nga ammuen ken aramiden ti pagayatan ti Dios. Saan a kaskarina daytoy gapu ta masapul a labanantayo ti pagannayasantayo a mangaramid kadagiti ‘bambanag a pagayatan ti lasag ken ti pampanunot’ wenno kadagiti “pagayatan dagiti nasion.” (Efe. 2:3; 1 Ped. 4:3; 2 Ped. 2:10) No awan ti tulong ti Dios, mabalin pay ketdi a ‘matiliwnatayo a sibibiag ti Diablo maipaay iti pagayatanna.’ (2 Tim. 2:26) Ti programa ti aldaw ti espesial nga asambleatayo iti 2012 tulonganna ti tunggal maysa kadatayo nga agbiag a maitunos iti maikatlo a kangrunaan a kiddaw nga insuro ni Jesus nga ikararagtayo—“maaramid koma ti pagayatam.”—Mat. 6:9, 10.
2. Ania dagiti saludsod a masungbatan bayat ti programa?
2 Dagiti Saludsod a Masungbatan: Bayat a dumngegkayo iti programa, siputanyo ti sungbat dagitoy a saludsod: Ania ti sabali pay a napateg nga aramidentayo malaksid iti panangdengngeg iti Sao ti Dios? Kasanotayo a maammuan no ania ti pagayatan ti Dios kadatayo? Apay a nasken a sidadaantayo a tumulong iti amin a kita ti tattao? Kasanotayo a maaddaan iti napnuan kaipapanan ken makapnek a biag? Dakayo nga ubbing ken agtutubo, ania ti masapul a paneknekanyo ken Jehova? Ania dagiti gunggona a masagraptayo no aramidentayo ti pagayatan ni Jehova? Apay a napateg a patibkeren ken paregtaentayo dagiti sabsabali itan?
3. Kasanotayo a magunggonaan a naan-anay iti daytoy a naespirituan a probision?
3 Siguraduenyo a tumabuno ken dumngegkayo a naimbag iti programa. Mabalin nga addanto Bethelite wenno agdaldaliasat a manangaywan nga agserbi kas bumisbisita nga ispiker. Sakbay ken kalpasan ti programa, saankayo a bumdeng a makiinnestoria kenkuana ken iti asawana, no naasawaan. Inton makaawidkayon, saankayo koma nga agbalin a “maysa a manglipat a managdengngeg,” no di ket repasuenyo a sangapamiliaan ti programa ken pagsasaritaanyo no kasanoyo a maaramid a naan-anay ti pagayatan ti Dios.—Sant. 1:25.
4. Apay a napateg nga ipangpangrunatayo ti panangaramid iti pagayatan ti Dios?
4 Iti din agbayag, madadaelton dagidiay mangpempennek kadagiti bukodda a tarigagay ken dagidiay saan a mayat a mangaramid iti pagayatan ni Jehova. (1 Juan 2:17) Gapuna, agyamantayo ta insagana ni Jehova daytoy a naintiempuan nga impormasion a tumulong kadatayo a mangipangpangruna iti pagayatan ti Dios!